2nd Kings Chapter 14 - Paipera Tapu 1868 | Te Paipera Tapu 1868

2nd Kings Chapter 14 - Paipera Tapu 1868

1
No te rua o nga tau o Ioaha tama a Iehoahata kingi o Iharaira i kingi ai a Amatia tama a Ioaha kingi o Hura.
2
E rua tekau ma rima ona tau i a ia ka kingi nei, a, e rua tekau ma iwa nga tau i kingi ai ia ki Hiruharama. Te ingoa o tona whaea ko Iehoarana o Hiruharama.
3
A, he tika tana mahi ki te titiro a Ihowa. Otiia, kihai i rite ki ta tona tupuna, ki ta Rawiri. Rite tonu tana mahi ki nga mea katoa i mea ai tona pāpā a Ioaha.
4
Ko nga wahi tiketike ia kahore i whakakahoretia: i patu whakahere tonu ano te iwi, i tahu whakakakara ki runga ki nga wahi tiketike.
5
A, te ungā o te kingitanga ki tona ringa, na, patua iho e ia ana tangata i patu ra i te kingi i tona pāpā.
6
Ko nga tamariki ia a nga kai kohuru kihai i whakamatea e ia, kia rite ai ki te mea i tuhituhia ki te pukapuka o te ture a Mohi, ki ta Ihowa i whakahau ai, i ki ai, Kaua e whakamatea nga mātua, mo ta nga tamariki, kaua ano hoki e whakamatea nga tamariki mo ta nga matua. Engari mate iho tenei tangata, tenei tangata, mo tona hara ake ano.
7
I patua ano e ia nga Eromi ki te raorao tote, tekau nga mano, a, riro mai ana a Hera i a ia i te whawhaitanga; huaina iho e ia te ingoa ko Iokoteere, e mau nei, a taea noatia tenei ra.
8
Katahi a Amatia ka unga tangata atu ki a Iehoaha tama a Iehoahata tama a Iehu kingi o Iharaira, ka mea, Haere mai, taua ka titiro ki a taua.
9
Na, ka unga tangata atu a Iehoaha kingi o Iharaira ki a Amatia kingi o Hura, hei mea, I unga tangata te tataramoa i Repanona ki te hita i Repanona, i mea, Homai to tamahine hei wahine ma taku tamaiti. Na, te haerenga atu o tetahi kararehe o te parae i Repanona, takahia iho e ia taua tataramoa.
10
I patua ano ra hoki a Eroma e koe, a, whakanuia ana koe e tou ngakau, Ko tenei hei whakapehapehatanga mau; me noho hoki koe ki tou whare. He aha koe ka whakapataritari ai, e kino ai koe, e hinga ai koutou tahi ko Hura.
11
Heoi kihai i rongo a Amatia, na, haere mai ana a Iehoaha kingi o Iharaira, a, titiro ana raua ko Amatia kingi o Hura ki a raua ki Pete-hemehe o Hura.
12
Na, ka patua a Hura i te aroaro o Iharaira, a, rere ana ki tona teneti, ki tona teneti.
13
Na, ka hopukia a Amatia kingi o Hura tama a Iehoaha, tama a Amatia, e Iehoaha kingi o Iharaira ki Pete-hemehe. Katahi tera ka haere mai ki Hiruharama, wahia ana e ia te taiepa o Hiruharama i te kuwaha o Eperaima, tae noa ki te kuwaha o te koki; e wha rau nga whatianga,
14
Tangohia ake hoki e ia te koura katoa, me te hiriwa, me nga oko katoa i kitea ki roto ki te whare o Ihowa, ki roto hoki i nga taonga o te whare o te kingi; me etahi tangata ano hoki hei mea kia ata noho ai ratou, a, hoki ana ki Hamaria.
15
Na, era atu meatanga i mea ai a Iehoaha, me ana mahi toa, me tana whawhaitanga ki a Amatia kingi o Hura kahore ianei i tuhituhia ki te pukapuka o nga meatanga o nga ra o nga kingi o Iharaira?
16
Na, kua moe a Iehoaha ki ona mātua, a, tanumia ana ki Hamaria ki nga kingi o Iharaira, a, ko tana tama ko Ieropoama hei kingi i muri i a ia.
17
A, kotahi tekau ma rima nga tau i ora ai a Amatia tama a Ioaha kingi o Hura i muri iho i te matenga o Iehoaha tama a Iehoahata kingi o Iharaira.
18
Na, era atu meatanga a Amatia, kahore ianei i tuhituhia ki te pukapuka o nga meatanga o nga ra o nga kingi o Hura?
19
Na, ka whakatupu ratou i te he mona ki Hiruharama; a, rere ana ia ki Rakihi; heoi ka unga tangata ano ratou ki te whai i a ia ki Rakihi; a, patua iho ia ki reira.
20
Katahi ia ka kawea mai e ratou i runga i nga hoiho, a, tanumia ana ki Hiruharama ki ona mātua ki te pa o Rawiri.
21
Na, ka mau te iwi katoa o Hura ki a Ataria, tekau ma ono ano hoki ona tau, a, meinga ana ia e ratou hei kingi i muri i tona pāpā i a Amatia.
22
Nāna Erata i hanga, i whakahoki mai ano ki a Hura, i muri iho i te moenga o te kingi ki ona mātua.
23
No te tekau ma rima o nga tau o Amatia tama a Ioaha kingi o Hura i kingi ai a Ieropoama tama a Ioaha kingi o Iharaira ki Hamaria; e wha tekau ma tahi nga tau.
24
A, kino iho tana mahi ki te titiro a Ihowa. Kihai i mahue i a ia tetahi o nga hara o Ieropoama tama a Nepata i mea nei i a Iharaira kia hara.
25
Nāna i whakahoki te rohe a Iharaira, tera i te haerenga atu ki Hamata, a, tae noa ki te moana o te mānia; i rite ai te kupu a Ihowa Atua o Iharaira, tana kupu ra i whakapuakina e tana pononga e Hona poropiti tama a Amitai o Kata-hewhere.
26
I kite hoki a Ihowa i te tukinotanga o Iharaira, he kino rawa; kihai tetahi i tutakina ki roto, i mahue atu ranei, a, kahore he kai whakaora mo Iharaira.
27
Kihai ano hoki a Ihowa i ki kia horoia atu te ingoa o Iharaira i raro i te rangi. Na, ka meinga e ia te ringa o Ieropoama tama a Ioaha hei whakaora mo ratou.
28
Na, era atu meatanga a Ieropoama, me ana mahi katoa, me ana mahi toa, ana whawhai, tana whakahokinga mai i Ramahiku, i Hamata, (tera, i a Hura i mua,) ki a Iharaira, kihai ianei i tuhituhia ki te pukapuka o nga meatanga o nga ra o nga kingi o Iharaira?
29
Na, kua moe a Ieropoama ki ona mātua, ki nga kingi o Iharaira, a, ko tana tama ko Hakaraia hei kingi i muri i a ia.