2nd Kings Chapter 15 - Paipera Tapu 1868 | Te Paipera Tapu 1868

2nd Kings Chapter 15 - Paipera Tapu 1868

1
No te rua tekau ma whitu o nga tau o Ieropoama kingi o Iharaira i kingi ai a Ataria tama a Amatia kingi o Hura.
2
Tekau ma ono ona tau i a ia ka kingi nei, a, e rima tekau ma rua nga tau i kingi ai ia ki Hiruharama. Na, te ingoa o tona whaea ko Iekoria o Hiruharama.
3
A, i tika tana mahi ki te titiro a Ihowa, i rite ki nga mea katoa i mea ai a Amatia tona pāpā.
4
Otiia kihai i whakakahoretia nga wahi tiketike: i patu whakahere tonu ano te iwi, i tahu whakakakara ki runga ki nga wahi tiketike.
5
A, i pakia te kingi e Ihowa. Na, repera tonu iho ia, a mate noa, a, noho ana ia i te whare motuhake. Na, ko Iotama ko te tama a te kingi hei rangatira mo te whare, hei kai whakarite whakawa mo te iwi o te whenua.
6
Na, era atu meatanga a Ataria, me ana mahi katoa, kihai ianei i tuhituhia ki te pukapuka o nga meatanga o nga ra o nga kingi o Hura?
7
Na, kua moe a Ataria ki ona mātua, a, tanumia iho ki ona mātua ki te pa o Rawiri, a, ko Iotama ko tana tama te kingi i muri i a ia.
8
No te toru tekau ma waru o nga tau o Ataria kingi o Hura i kingi ai a Hakaraia tama a Ieropoama ki a Iharaira ki Hamaria; e ono nga marama.
9
A, he kino tana mahi ki te titiro a Ihowa, i rite ki ta ona mātua i mea ai; kihai i mahue i a ia nga hara o Ieropoama tama a Nepata i mea nei i a Iharaira kia hara.
10
Na, ka whakatupu a Harumu tama a Iapehe i te he mona, a, patua ana e ia i te aroaro o te iwi, whakamatea iho, a, ko ia hei kingi i muri i a ia.
11
Na, era atu meatanga a Hakaraia, nana, kua oti te tuhituhi ki te pukapuka o nga meatanga o nga ra o nga kingi o Iharaira?
12
Ko te kupu ano tena a Ihowa i korero ai ia ki a Iehu, i mea ai, E wha nga whakatupuranga o o tamariki e noho ki runga ki te torona o Iharaira. Na, koia rawa ana ia.
13
No te toru tekau ma iwa o nga tau o Utia kingi o Hura i kingi ai Harumu tama a Iapehe; a, kotahi tino marama i kingi ai ia ki Hamaria.
14
I haere mai hoki a Menaheme tama a Kari i Tirita tae tonu mai ki Hamaria, patua iho e ia a Harumu tama a Iapehe ki Hamaria, whakamatea iho; a ko ia hei kingi i muri i a ia.
15
Na, era atu meatanga a Harumu, me tana he i whakatupuria e ia, kua oti ra hoki te tuhituhi ki te pukapuka o nga meatanga o nga ra o nga kingi o Iharaira.
16
Katahi ka patua e Menaheme a Tipiha me nga mea katoa i roto, me ona rohe katoa, o Tirita mai ano; mo ratou kihai i uaki ki a ia; koia i patua ai. Ripiripia ake hoki e ia nga wahine hapu katoa o reira.
17
No te toru tekau ma iwa o nga tau o Ataria kingi o Hura i kingi ai a Menaheme tama o Kari ki a Iharaira ki Hamaria: kotahi tekau nga tau.
18
A, he kino tana mahi ki te titiro a Ihowa. Kihai i mahue i a ia i ona ra katoa nga hara o Ieropoama tama a Nepata i mea nei i a Iharaira kia hara.
19
Na, ka whakaekea mai te whenua e Puru kingi o Ahiria, hoatu ana e Menaheme etahi taranata hiriwa kotahi mano ki a Puru kia awhinatia mai ai ia e tona ringa, kia mau ai te kingitanga ki tona ringa.
20
I tangohia mai hoki e Menaheme te hiriwa i a Iharaira, i nga tangata taonga nui katoa hei hoatutanga māna ki te kingi o Ahiria: e rima tekau nga hekere a tenei, a tenei. Na, hoki ana te kingi o Ahiria, kihai hoki i noho ki taua whenua.
21
Na, era atu meatanga a Menaheme, me ana mahi katoa, kahore ianei i tuhituhia ki te pukapuka o nga meatanga o nga ra o nga kingi o Iharaira?
22
Na ka moe a Menaheme ki ona mātua, a, ko tana tama ko Pekahia hei kingi i muri i a ia.
23
No te rima tekau o nga tau o Ataria kingi o Hura i kingi ai a Pekahia tama a Menaheme ki a Iharaira ki Hamaria: e rua nga tau.
24
A, he kino tana mahi ki te titiro a Ihowa: kihai i mahue i a ia nga hara o Ieropoama tama a Nepata i mea nei i a Iharaira kia hara.
25
Na, ka whakatupuria he hē mona e tetahi o ana rangatira, e Peka tama a Ramaria. Patua iho ia ki Hamaria ki te wahi pai rawa o to te kingi whare, ratou ko Arapoka, ko Arie me ona hoa, nga Kireari, e rima tekau nga tangata. Heoi whakamatea ana ia e ia, a ko ia ano hei kingi i muri i a ia.
26
Na, era atu meatanga a Pekahia, me ana mahi katoa, nana, kua oti te tuhituhi ki te pukapuka o nga meatanga o nga ra o nga kingi o Iharaira.
27
No te rima tekau ma rua o nga tau o Ataria kingi o Hura i kingi ai a Peka tama a Remaria, ki a Iharaira ki Hamaria: e rua tekau nga tau.
28
A, he kino tana mahi ki te titiro a Ihowa; kihai i mahue i a ia nga hara a Ieropoama tama a Nepata i mea nei i a Iharaira kia hara.
29
I nga ra o Peka kingi o Iharaira, ka haere mai Tikirata-pirehere kingi o Ahiria, a, riro ana i a ia a Iiono, a Apere-pete-maaka, a Ianoa, a Kerehe, a Hatoro, a Kireara, a Kariri, te whenua katoa o Napatari, whakahekea atu ana ratou e ia ki Ahiria.
30
Na, ka whakatupu a Hohea tama a Eraha i te he mo Peka tama a Remaria. Patua iho e ia, whakamatea iho; a, ko ia hei kingi i muri i a ia, i te rua tekau o nga tau o Iotama tama a Utia.
31
Na, era atu meatanga a Peka, me ana mahi katoa, kua oti na te tuhituhi ki te pukapuka o nga meatanga o nga ra o nga kingi o Iharaira.
32
No te rua o nga tau o Peka, tama a Remaria kingi o Iharaira i kingi ai a Iotama tama a Utia kingi o Hura.
33
E rua tekau ma rima ona tau i a ia ka kingi nei, a, kotahi tekau ma ono nga tau i kingi ai ki Hiruharama. Na, te ingoa o tona whaea ko Ieruha, he tamahine na Haroko.
34
A, i tika tana mahi ki te titiro a Ihowa, i rite ana mahi ki nga mea katoa a tona pāpā, a Utia.
35
Ko nga wahi tiketike ia kihai i whakakahoretia e ia. I patu whakahere tonu te iwi, i tahu whakakakara ki runga ki nga wahi tiketike. Nāna i hanga to runga kuwaha o te whare o Ihowa.
36
Na, era atu meatanga a Iotama, me ana mahi katoa, kahore ianei i tuhituhia ki te pukapuka o nga meatanga o nga ra o nga kingi o Hura?
37
I aua ra ka timata a Ihowa te unga mai i a Retini kingi o Hiria raua ko Peka tama a Remaria ki a Hura.
38
Na, ka moe a Iotama ki ona mātua, a, tanumia iho ki ona mātua ki te pa o tona tupuna o Rawiri; a, ko Ahata tana tama hei kingi i muri i a ia.