- 1
- No te tekau ma whitu o nga tau a Peka tama a Remaria i kingi ai a Ahata tama a Iotama kingi o Hura.
- 2
- E rua tekau nga tau o Ahata i tona kingitanga ai, a, kotahi tekau ma ono nga tau i kingi ai ia ki Hiruharama. Na, kihai i tika tana mahi ki te titiro a Ihowa, a tona Atua, kihai i rite ki ta tona tupuna ki ta Rawiri.
- 3
- Heoi haere ana ia i te ara o nga kingi o Iharaira; i mea ano hoki i tana tama kia tika na waenganui o te ahi, kia pera ano me nga meatanga whakarihariha a nga tauiwi i peia nei e Ihowa i te aroaro o nga tamariki a Iharaira.
- 4
- I patu whakahere ano ia, i tahu whakakakara ki runga ki nga wahi tiketike, ki nga pukepuke, ki raro ano hoki i nga rakau kouru nui.
- 5
- Na, ko te haerenga mai o Retini kingi o Hiria raua ko Peka tama a Remaria kingi o Iharaira ki Hiruharama, whawhai ai. Heoi whakapaea ana a Ahata e raua. Otiia kihai ia i taea e raua i te whawhaitanga.
- 6
- I taua wa ano ka whakahokia mai a Erata ki Hiria e Retini kingi o Hiria a, peia ana nga Hurai i Erata: na, haere mai ana nga Hiriani ki Erata, nohoia ana a reira, a taea noatia tenei ra.
- 7
- Katahi a Ahata ka unga tangata atu ki a Tikirata-pirehere kingi o Ahiria hei ki atu, He pononga, he tamaiti ahau nau, Haere mai, whakaorangia ahau i te ringa o te kingi o Hiria, i te ringa ano hoki o te kingi o Iharaira, kua whakatika mai nei ki a au.
- 8
- Na, ka mau a Ahata ki te hiriwa, te koura, i kitea ki roto ki te whare o Ihowa, ki nga taonga ano hoki o te whare o te kingi, a, ungā atu ana e ia kia kawea hei whakapati mo te kingi o Ahiria.
- 9
- Na, whakarongo mai ana te kingi o Ahiria ki a ia, a, haere mai ana te kingi o Ahiria ki Ramahiku, horo ana i a ia, whakahekea atu ana e ia ona tangata ki Kiri, whakamatea iho ano hoki a Retini e ia.
- 10
- Na, haere ana a Kingi Ahata, ki te whakatau i a Tikirata-pirehere kingi o Ahiria ki Ramahiku; a, tona kitenga i tetahi aata ki Ramahiku, na, ka ungā atu e Kingi Ahata kia kawea ki a Uria tohunga te ahua o taua aata, me tona ritenga me nga mahinga katoatanga o taua mea.
- 11
- Katahi ka hangā e te tohunga, e Uria, he aata, he mea e rite ana ki nga mea katoa i ungā mai nei e kingi Ahata kia kawea mai i Ramahiku: rite tonu ta te tohunga, ta Uria; tae rawa mai a Kingi Ahata i Ramahiku kua oti.
- 12
- A, te taenga mai o te kingi i Ramahiku, ka kite te kingi i te aata, na, ka whakatata atu te kingi ki te aata, ka whakaeke i te tahunga tinana ki runga.
- 13
- Tahuna ana hoki e ia tana tahunga tinana, tana whakahere toto-kore, ringitia ana tana ringihanga, tauhiuhia ana hoki e ia nga toto o ana whakamarietanga ki runga ki te aata.
- 14
- Na, te aata parahi, tera i te aroaro o Ihowa, nekehia mai ana e ia i mua i te whare, i te takiwa o taua aata, o te whare o Ihowa, a, whakaturia ana ki te taha o taua aata, ki te taha ki te nota.
- 15
- A, i whakahau ano a Kingi Ahata i te tohunga i a Uria, i mea, Tahuna ki runga ki te aata nui te tahunga tinana o te ata, te whakahere toto-kore o te ahiahi, te tahunga tinana a te kingi, me tana whakahere toto-kore, te tahunga tinana a te iwi katoa o te whenua, me ta ratou whakahere toto-kore, me a ratou ringihanga; me tauhiuhi ano hoki e koe ki runga ki taua mea nga toto katoa o te tahunga tinana, me nga toto katoa o te patunga tapu: a, hei mea ui maku te aata parahi.
- 16
- Na, rite tonu ta Uria tohunga i mea ai ki nga mea katoa i whakahaua mai e Kingi Ahata.
- 17
- I tapahia ano hoki e Kingi Ahata nga awhi o nga turanga, tangohia ana e ia te takotoranga wai i runga i ana mea: i tangohia iho ano hoki e ia te moana i runga i nga kau parahi, i tu ra i raro i taua mea, a, whakatakotoria ana ki runga ki te whariki kohatu;
- 18
- Me te taupoki ano hoki mo te hapati i hangā nei e ratou ki roto ki te whare, me te haerenga mai ano hoki o te kingi i waho, whakaangā ketia ana e ia i te whare o Ihowa, he whakaaro ki te kingi o Ahiria.
- 19
- Na, era atu meatanga i mea ai a Ahata kihai ianei i tuhituhia ki te pukapuka o nga meatanga o nga ra o nga kingi o Hura?
- 20
- Na, kua moe a Ahata ki ona mātua, a, tanumia iho ki ona mātua ki te pa o Rawiri, a, ko tana tama ko Hetekia hei kingi i muri i a ia.
Address: 
Phone: 
Email: