- 1
- A, i te kingi e noho ana i tona whare, a ka meinga e Ihowa kia okioki i ona hoa riri katoa i tetahi taha, i tetahi taha.
- 2
- Na, ko te meatanga mai a te kingi ki a Natana poropiti, Na, titiro, kei te noho nei ahau i roto i te whare hita, ko te aaka ia a te Atua e noho ana i roto i nga kakahu.
- 3
- Katahi a Natana ka mea atu ki te kingi, Haere, meatia nga mea katoa i roto i tou ngakau; kei a koe hoki a Ihowa.
- 4
- Na, i taua po ano ka puta mai te kupu a Ihowa ki a Natana, ka mea,
- 5
- Haere, mea atu ki taku pononga ki a Rawiri, Ko te kupu tenei a Ihowa, Mau koia e hanga he whare hei nohoanga moku?
- 6
- Kahore nei hoki ahau i noho i roto i te whare, no te rangi ano i kawea mai ai e ahau nga tamariki a Iharaira i Ihipa, a taea noatia tenei ra; heoi he noho haere taku i roto i te teneti, i te tapenakara.
- 7
- I oku haereerenga katoatanga i roto i nga tamariki katoa a Iharaira i puaki ranei tetahi kupu aku ki tetahi o nga iwi o Iharaira i whakaritea e ahau hei hepara mo toku iwi mo Iharaira, i mea ranei ahau, He aha koutou tē hanga ai i tetahi whare hita moku?
- 8
- Na, kia penei to ki atu aianei ki taku pononga ki a Rawiri, Ko te kupu tenei a Ihowa o nga mano, Naku koe i tango mai i roto i te nohoanga hipi, i te whai hipi, hei rangatira mo toku iwi mo Iharaira.
- 9
- A, i a koe ahau i o haerenga katoa, hautopea atu ana e ahau ou hoa riri katoa i tou aroaro, a meinga ana koe e ahau hei ingoa nui, hei pera ano me te ingoa o nga mea nunui o te whenua.
- 10
- Na, maku ano hoki e whakarite he wahi mo toku iwi mo Iharaira, ka whakatokia ano hoki ratou e ahau kia noho ki to ratou ake, kia kore e oho a muri ake nei; kia mutu ai te tukino a nga tamariki a te kino i a ratou, kei pera me to mua,
- 11
- Me to te wa ano hoki i whakaritea ai e ahau nga kai whakarite whakawa mo toku iwi mo Iharaira, i meinga ai hoki koe e ahau kia okioki i ou hoa riri katoa. Na, ko ta Ihowa kupu tenei ki a koe, Ma Ihowa e hanga he whare mou.
- 12
- A ka tutuki ou ra, ka moe koe ki ou mātua, na, ka whakaarahia e ahau i muri i a koe tou whanau e puta mai i roto i ou whekau, a ka whakapumautia tona kingitanga.
- 13
- Mana e hanga he whare mo toku ingoa, a ka whakapumautia e ahau te torona o tona kingitanga, a, ake ake ake.
- 14
- Ko ahau hei matua ki a ia, a, ko ia hei tamaiti ki a au. Ki te ngau ke tana mahi, ka whiu ahau i a ia ki te whiu a te tangata, ki nga whakapānga a nga tamariki a te tangata.
- 15
- E kore ia e mutu toku aroha ki a ia, e kore e pera me toku ki a Haora i peia atu na e ahau i tou aroaro.
- 16
- Ka tūturu tonu hoki tou whare me tou kingitanga, a, ake ake ake, ki tou aroaro: ka mau tonu tou torona, a, ake nei ake nei.
- 17
- Rite tonu ki enei kupu katoa, ki tenei whakakitenga katoa ano hoki, nga kupu a Natana ki a Rawiri.
- 18
- Katahi ka haere atu a Kingi Rawiri, a, noho ana ki te aroaro o Ihowa, ka mea, Ko wai ahau, e te Ariki, e Ihowa? he aha hoki toku whare, i kawea mai ai ahau e koe ki tenei wahi?
- 19
- He mea iti ano hoki tenei ki tau titiro iho, e te Ariki, e Ihowa, na, kua korerotia nei e koe te whare o to pononga, a tau tini noa atu. Ko ta te tangata tikanga ranei tenei, e te Ariki, e Ihowa?
- 20
- Na, ko te aha ake hei korerotanga ma Rawiri ki a koe? e mohio ana hoki koe, e te Ariki, e Ihowa, ki tau pononga.
- 21
- He whakaaro ki to kupu, na tou ngakau ano hoki, i mea ai koe i enei mea nui katoa, kia mohio ai to pononga.
- 22
- Na, he nui koe, e Ihowa, e te Atua: kahore hoki he rite mou, kahore atu hoki he atua; ko koe anake: e rite tonu ana ki nga mea katoa i rongo ai o matou taringa.
- 23
- Ko tehea iwi hoki o te whenua hei rite mo tou iwi mo Iharaira, i haere nei te Atua ki te hoko hei iwi māna ake, kia meinga ai he ingoa mona, kia mahia ai ano hoki nga mea nui e wehingia ana, he whakaaro ki a koutou, hei mea mo tou whenua, i te aroaro o tou iwi i hokona nei e koe i roto i Ihipa, i roto i nga tauiwi i o ratou atua ano hoki?
- 24
- Kua whakapumautia nei hoki e koe mou tou iwi a Iharaira hei iwi mou, a, ake, ake, ake: me koe hoki, e Ihowa hei Atua mo ratou.
- 25
- Na, whakamanā aianei, e Ihowa, e te Atua, te kupu i korerotia e koe mo to pononga ratou ko tona whare, a, ake ake ake, meatia ano hoki tau i korero ai.
- 26
- Kia whakanuia ano hoki tou ingoa, a ake ake ake, kia korerotia, Ko Ihowa o nga mano te Atua o Iharaira. A, kia tūturu tonu te whare o to pononga, o Rawiri, ki tou aroaro.
- 27
- Nau nei hoki, e Ihowa o nga mano, e te Atua o Iharaira, i whakapuaki mai ki to pononga, i mea, Ka hangā e ahau he whare mou: koia te ngakau o to pononga i anga ai ki te inoi i tenei inoi ki a koe.
- 28
- Na, ko koe, e te Ariki, e Ihowa, taua Atua nei, he pono hoki au kupu, kua korerotia mai ano hoki e koe tenei mea pai ki to pononga.
- 29
- Na, kia pai koe ki te manaaki i te whare o to pononga, kia pumau tonu ai ki tou aroaro: he kupu mai hoki nau, na te Ariki, na Ihowa, a, hei au manaakitanga he manaakitanga mo te whare o to pononga, a, ake ake ake.
Address: 
Phone: 
Email: