2nd Samuel Chapter 8 - Paipera Tapu 1868 | Te Paipera Tapu 1868

2nd Samuel Chapter 8 - Paipera Tapu 1868

1
Na, muri iho ka patua nga Pirihitini e Rawiri, a hinga ana ratou i a ia: a, tangohia mai ana e Rawiri a Meteke-ama i te ringa o nga Pirihitini.
2
I patua ano e ia a Moapa, a, ruritia ana ratou ki te aho; i whakatakotoria hoki ratou ki te whenua: na, e rua nga aho i ruritia ai ratou, he mea mo te whakamate; rite tonu hoki te roa o te aho mo te whakaora. Na, ka waiho nga Moapi e Rawiri hei pononga, a homai ana he hakari e ratou.
3
A, i patua ano hoki e Rawiri a Hararetere tama a Rehopo kingi o Topa, i tona haerenga ki te whakahoki mai i tana rohe i Awa Uparati.
4
Na, kotahi mano ana hariata i riro mai i a Rawiri, e whitu rau ano hoki nga hoia eke hoiho, a e rua tekau mano nga tangata haere i raro. Na, whakangongea ana e Rawiri nga hoiho o nga hariata katoa; i whakatoea ia e ia etahi o ratou, mo nga hariata kotahi rau.
5
A, te haerenga mai o nga Hiriani o Ramahiku ki te whakauru i a Harare-tere kingi o Topa, na, patua iho e Rawiri o nga Hiriani e rua tekau ma rua mano tangata.
6
A, i whakanohoia ano e Rawiri etahi hoia pupuri ki Hiria, i Ramahiku: a ka waiho nga Hiriani hei pononga homai hakari ma Rawiri. Na, whakaorangia ana a Rawiri e Ihowa i ana haerenga katoatanga.
7
I tangohia ano e Rawiri nga pukupuku koura o nga tangata a Hararetere, a kawea mai ana ki Hiruharama.
8
A, nui whakaharahara te parahi i tangohia mai e Kingi Rawiri i roto i Petaha, i Perotai, i nga pa o Hararetere.
9
A, te rongonga o Toi kingi o Hamata kua patua e Rawiri te ope katoa a Hararetere,
10
Na, ka tono mai a Toi i a Iorama i tana tamaiti ki a Kingi Rawiri ki te oha ki a ia, ki te manaaki hoki i a ia; mona i whawhai ki a Hararetere, i patu hoki i a ia: (he hoa riri hoki a Harareere no Toi:) na, i tona ringa ano hoki etahi mea hiriwa, etahi mea koura, etahi mea parahi.
11
Whakatapua ake ano hoki era e Kingi Rawiri ma Ihowa hei tapiri mo te hiriwa, mo te koura, i whakatapua e ia a nga iwi katoa i hinga nei i a ia.
12
A Hiria, a Moapa, a nga tamariki a Amona, a nga Pirihitini, a Amareke, me nga taonga ano hoki o Hararetere tama a Rehopo kingi o Topa.
13
Na, ka whai ingoa a Rawiri i tona hokinga mai i te patu i nga Hiriani i te raorao tote; kotahi tekau ma waru mano ratou.
14
A, i whakanohoia ano e ia etahi hoia pupuri ki Eroma; he mea whakanoho ki Eroma katoa ana hoia pupuri, a ka meinga nga Eromi katoa hei pononga ma Rawiri. A, whakaorangia ana a Rawiri e Ihowa i ana haerenga katoatanga.
15
Na, ko Rawiri te kingi o Iharaira katoa; a i mahi ano a Rawiri i te whakarite whakawa, i te tika ano hoki, mo tona iwi katoa.
16
A, ko Ioapa tama a Teruia te rangatira ope, ko Iehohapata tama a Ahi-ruru te kai whakamaharahara.
17
Ko Haroko tama a Ahitupu, raua ko Ahimereke tama a Apiatara, nga tohunga; ko Heraia hoki te kai tuhituhi;
18
A, ko Penaia tama a Iehoiara te rangatira mo nga Kereti, mo nga Pereti; ko nga tama ia a Rawiri nga tino rangatira.