- 1
- I hangā ano e ia te aata parahi, e rua tekau nga whatianga tona roa, a, e rua tekau nga whatianga tona whanui, kotahi tekau hoki nga whatianga tana tiketike.
- 2
- I hangā ano e ia tetahi moana, he mea whakarewa, tekau nga whatianga o tetahi pareparenga ki tetahi pareparenga, he mea porotaka, e rima whatianga tona tiketike: e toru tekau nga whatianga o te aho i paea ai.
- 3
- A, i raro i taua mea ko etahi mea e rite ana ki te kau, a taka noa, taka noa: kotahi tekau ki te whatianga; i te taha o te moana, a taka noa, taka noa. E rua nga rarangi o nga kau i whakarewaina, i taua mea ano e whakarewaina ana.
- 4
- I runga i nga kau kotahi tekau ma rua taua moana e tu ana, e toru e anga ana ki te nota, e toru e anga ana ki te hauauru, e toru e anga ana ki te tonga, e toru e anga ana ki te rawhiti: na, i runga i aua kau te moana; a, i anga whakaroto a muri katoa o ratou.
- 5
- A, he whanuitanga ringaringa tona matotoru, rite tonu te hanganga o tona niao ki to te niao o te kapa, he puawai rengarenga ona, e toru mano nga pati o roto o taua moana ina ki.
- 6
- I hangā ano e ia etahi oko horoi kotahi tekau, a whakaturia ana e rima ki te taha ki matau, e rima ki te taha ki maui, hei mea horoi. Ko nga mea i whakaekea e ratou hei tahunga tinana i horoia e ratou ki aua mea; ko te moana ia hei mea horoi ma nga tohunga.
- 7
- I hangā ano e ia nga turanga rama koura kotahi tekau, he mea i rite tonu ki te tikanga mo aua mea, whakaturia ana e ia ki te temepara; e rima ki matau, e rima ki maui.
- 8
- I hangā ano e ia nga tepu kotahi tekau, whakaturia ana e ia ki te temepara, e rima ki matau, e rima ki maui. I hangā ano e ia nga peihana koura kotahi rau.
- 9
- I hangā ano e ia te marae mo nga tohunga, me te marae nui, me nga tatau mo te marae; whakakikoruatia iho e ia nga tatau o aua wahi ki te parahi.
- 10
- Na, te moana, whakatakotoria ana e ia ki te taha ki matau o te pito ki te rawhiti, ki te ritenga atu o te tonga.
- 11
- I hangā ano e Hurama nga pāta, nga koko pungarehu, nga peihana. Na, kua oti i a Hurama te mahi i waiho hei mahinga mana mo Kingi Horomona i roto i te whare o te Atua.
- 12
- Ara, nga pou e rua, me nga mea tuā peihana nei, nga whakapaipai e rua i te pito ki runga o nga pou e rua, nga kupenga e rua hei kopaki mo nga peihana e rua o nga whakapaipai i te pito ki runga o nga pou;
- 13
- Me nga pamekaranete e wha nga rau i nga kupenga e rua; e rua nga rarangi pamekaranete i tetahi kupenga hei kopaki mo nga peihana e rua o nga whakapaipai i nga pou.
- 14
- I hangā ano e ia nga turanga; i hangā ano nga oko horoi i runga i nga turanga.
- 15
- Kotahi te moana, a, tekau ma rua nga kau i raro i taua moana.
- 16
- Nga pāta ano hoki, me nga koko pungarehu, me nga marau, me o ratou mea katoa, i hangā era e tona pāpā, e Hurama, ma Kingi Horomona mo te whare o Ihowa, kanapa tonu te parahi.
- 17
- I whakarewaina aua mea e te kingi ki te mānia o Horano, ki te wahi onematua i te takiwa o Hukota, o Tererata.
- 18
- Heoi hangā ana e Horomona enei oko katoa, he tini noa iho; kihai hoki i kitea te taimaha o te parahi.
- 19
- I hangā ano e Horomona nga oko katoa, mo te whare o te Atua, me te aata koura, me nga tepu, hei takotoranga mo te taro aroaro;
- 20
- Me nga turanga rama, me o ratou rama e tahuna nei ki mua i te ahurewa, (ko te tikanga hoki tena;) he mea para-kore te koura.
- 21
- Ko nga puawai, ko nga rama, ko nga kokopi, he mea koura era, he koura pai rawa;
- 22
- Me nga kuku, me nga peihana, me nga koko, me nga tahu-kakara, he mea para-kore te koura; me te tapokoranga atu ki te whare, ona tatau o roto ki te wahi tino tapu, me nga tatau o te whare o te temepara, he mea koura.
Address: 
Phone: 
Email: