- 1
- Na, i Hiharia tetahi tangata ko Koroniria te ingoa, he keneturio no te pu i karangatia nei ko to Itari;
- 2
- He tangata karakia ia, e wehi ana i te Atua, ratou ko tona whare katoa, he maha ana mahi atawhai ki te iwi, me te inoi tonu ano ki te Atua.
- 3
- I kite nui ia, i te mea ka tata ki te iwa o nga haora o te ra, i tetahi anahera a te Atua, he mea whakakite mai, e haere mai ana ki a ia, e mea ana hoki ki a ia, E Koroniria.
- 4
- Na, ka titiro pu atu ia ki a ia, a ka wehi, ka mea, He aha koia, e te ariki? Ka ki mai tera ki a ia, Kua puta ake o inoi me o mahi atawhai, hei whakamaharatanga ki te aroaro o te Atua.
- 5
- Na, hei aianei ka tono tangata atu ki Hopa, ki te tiki i a Haimona, te rua nei o ona ingoa ko Pita:
- 6
- He manuhiri ia na Haimona kai mahi hiako, kei te taha nei o te moana tona whare: māna e korero atu ki a koe tau e mea ai.
- 7
- A, te rironga o te anahera i korero nei ki a Koroniria, tokorua ana tāngata i karangatia e ia, me tetahi hoia karakia no te hunga e piri tonu ana ki a ia;
- 8
- A ka oti enei mea katoa te korero ki a ratou, ka tonoa ratou e ia ki Hopa.
- 9
- Na, i te aonga ake, i a ratou e haere ana, a ka whakatata ki te pa, ka kake a Pita ki runga ki te tuanui, i te ono o nga haora, ki te inoi:
- 10
- Na, ka nui tona mate kai, ka mea ia ki te kai: otira, i a ratou e taka ana, ka puta te ngakau matakite ki a ia;
- 11
- Na, ka kite i te rangi e mawhera ana, me tetahi mea e heke iho ana ki a ia, ano he kakahu nui, he mea here i nga pito e wha, a tatu rawa ki te whenua:
- 12
- A i runga ano i taua mea nga mea waewae wha katoa o te whenua, me nga kararehe mohoao, me nga mea ngokingoki, me nga manu o te rangi.
- 13
- Na, ko te putanga mai o te reo ki a ia, E Pita, e ara; patua, e kai.
- 14
- Na, ko te kianga atu a Pita, Kahore, e te Ariki; kiano hoki ahau i kai i te mea noa, i te mea poke.
- 15
- Na, ka tuaruatia ano te reo ki a ia, Ko ā te Atua i mea ai kia ma, aua e whakanoatia e koe.
- 16
- A ka toru nga meatanga o tenei: ka whakahokia atu taua mea ki te rangi.
- 17
- Heoi, i a Pita e whakaaroaro ana i roto i a ia ki te tikanga o te mea i kitea nei, na, ko nga tāngata i tonoa e Koroniria kua ui ki te whare o Haimona, a e tu ana i te kuwaha,
- 18
- E karanga ana, e ui ana, me kahore he manuhiri i kona a Haimona, te rua nei o ona ingoa ko Pita.
- 19
- A, i a Pita e whakaaro ana ki taua mea i kitea nei, ka mea te Wairua ki a ia. Nana, tokotoru enei tāngata e rapu nei ki a koe.
- 20
- Na, whakatika, heke atu, haere tahi koutou, kei ruarua koe; naku hoki ratou i tono mai.
- 21
- Na, ka haere iho a Pita ki aua tāngata i tonoa mai ki a ia e Koroniria; ka mea, Ko ahau tenei e rapua nei e koutou: he aha tenei e tu nei koutou?
- 22
- Na, ka mea ratou, Ko Koroniria ra he keneturio, he tangata tika, e wehi ana i te Atua, e korerotia paitia ana e te iwi katoa o nga Hurai, kua whakamaharatia ia e tetahi anahera tapu kia tikina mai koe ki tona whare, kia rongo ai ia ki etahi kupu i a koe.
- 23
- Na, karangatia ana ratou e ia ki roto hei manuhiri māna. A i te aonga ake ka haere tahi ratou ko Pita; i haere tahi ano hoki etahi teina no Hopa.
- 24
- Na, i te aonga ake, ka tomo ratou ki Hiharia. A e tatari ana a Koroniria ki a ratou, kua oti hoki te huihui mai ona whanaunga, me ona hoa tupu.
- 25
- Na, i a Pita e tomo atu ana, ka tutaki a Koroniria ki a ia, hinga ana ki ona waewae, koropiko atu ana.
- 26
- Otira ka whakaara a Pita i a ia, ka mea, E tu ki runga; he tangata ano hoki ahau.
- 27
- Na, ka korerorero raua, a, te tomokanga ki roto, ka kite he tokomaha kua mene mai.
- 28
- Na, ko tana meatanga atu ki a ratou, E mātau ana koutou e kore e tika kia huihui te tangata o nga Hurai, kia haere atu ranei ki te tangata iwi ke: otiia kua whakakitea e te Atua ki a au kia kaua e kiia te tangata he noa, he poke.
- 29
- Koia ahau i haere mai ai, tē whai kupu i taku tikinga ake: na, ka ui nei ahau, he aha te mea i tikina ake ai ahau?
- 30
- Ka mea atu a Koroniria, I te noho puku ahau a taea noatia tenei haora, i te wha o enei ra ka pahemo nei; a i te iwa o nga haora, ka inoi ahau i roto i toku whare; na, ko te turanga o tetahi tangata i toku aroaro, kanapa tonu te kakahu,
- 31
- Ka mea mai, E Koroniria, kua rangona to inoi, e maharatia ana hoki āu mahi atawhai i te aroaro o te Atua.
- 32
- Na, tonoa he tangata ki Hopa, ki te tiki i a Haimona, te rua nei o ona ingoa ko Pita; he manuhiri ia i roto i te whare o Haimona kai mahi hiako, i te taha o te moana; ka tae mai ia, māna e korero ki a koe.
- 33
- Na, tono tonu atu ahau ki a koe; a tika tonu tau mahi, tou haerenga mai. Na, tenei matou katoa kei te aroaro o te Atua, whakarongo ai ki nga mea katoa i whakaritea e te Atua ki a koe.
- 34
- Na, ka puaki te mangai o Pita, ka mea, He pono, ka kite ahau kahore a te Atua whakapai kanohi.
- 35
- Engari ki te wehi tetahi tangata o nga tini iwi ki a ia, ki te mahi tika, ka paingia e ia.
- 36
- Te kupu i homai e ia kia whakapuakina ki nga tamariki a Iharaira, hei kauwhau i te rongo ka mau i a Ihu Karaiti: (ko ia te Ariki o te katoa:)
- 37
- E mātau ana ano koutou ki taua kupu, i kauwhautia nei puta noa i Huria, no Kariri te timatanga, i muri iho i te iriiringa i kauwhautia e Hoani;
- 38
- He mea mo Ihu o Nahareta i whakawahia nei e te Atua ki te Wairua Tapu ki te kaha: a haereere ana ki te mahi pai, ki te whakaora i te hunga katoa i pehia e te rewera; no te mea i a ia te Atua.
- 39
- A ko matou nga kai whakaatu o nga mea katoa, i mea ai ia ki te whenua o nga Hurai, ki Hiruharama ano hoki; a whakamatea ana ia e ratou, he mea whakairi ki runga ki te rakau:
- 40
- I whakaarahia ake tenei tangata e te Atua i te toru o nga ra, a meinga ana kia kitea nuitia;
- 41
- Ehara i te mea e nga iwi katoa, engari e nga kai whakaatu i whiriwhiria e te Atua i mua, ara e matou i kai tahi i inu tahi nei me ia, i muri iho i tona aranga ake i te mate.
- 42
- A i mea mai ano ia ki a matou kia kauwhau ki te iwi, kia whakaatu atu, ko ia ta te Atua i whakarite ai hei Kai whakarite whakawa mo nga tāngata ora, mo nga tāngata mate.
- 43
- He kai whakaatu nga poropiti katoa mona, ara ma tona ingoa ka whiwhi ai ki te murunga hara nga tāngata katoa e whakapono ana ki a ia.
- 44
- I a Pita ano e korero ana i enei kupu, ka tau iho te Wairua Tapu ki te hunga katoa e whakarongo ana ki te kupu.
- 45
- A miharo ana te hunga whakapono o te kotinga, nga mea i haere tahi mai i a Pita, no te mea kua ringihia mai ano hoki te Wairua Tapu, kua homai ki nga tauiwi;
- 46
- I rongo hoki ratou ki nga reo i korero ai, i whakanui ai ratou i te Atua. Katahi ka oho atu a Pita,
- 47
- E ahei ano te whakakahore e tetahi te wai, kei iriiria enei, kua whiwhi tahi nei me tatou ki te Wairua Tapu?
- 48
- Na, ka mea ia kia iriiria ratou i runga i te ingoa o te Ariki. A ka tohe ratou kia noho ia i etahi ra.
Address: 
Phone: 
Email: