- 1
- A i rongo nga apotoro me nga tuakana i Huria, kua tango ano hoki nga tauiwi ki te kupu a te Atua.
- 2
- Na, te taenga atu o Pita ki Hiruharama, ka whakawakia ia e te hunga o te kotinga,
- 3
- I mea ratou, I haere koe ki roto ki nga tāngata kihai i kotia, a kai tahi ana koutou.
- 4
- Na, ka timata a Pita, ka korero whakatepe atu ki a ratou, ka mea,
- 5
- I te pa ahau i Hopa e inoi ana: a ka kite moemoea i tetahi whakakitenga, ko tetahi mea e heke iho ana, ano he kakahu nui, he mea tuku iho i te rangi ki nga pito e wha; a tae tonu mai ki a au:
- 6
- A ka titiro pu atu ahau ki reira, ka whakaaro ahau, a ka kitea nga mea waewae wha o te whenua, me nga kararehe mohoao, me nga mea ngokingoki, me nga manu o te rangi.
- 7
- A ka rongo ano ahau i te reo e mea mai ana ki a au, E ara, e Pita; patua, e kai.
- 8
- Heoi ka ki atu ahau, Kahore, e te Ariki kiano hoki tetahi mea e noa ana e poke ana i tapoko noa ki toku mangai.
- 9
- Na, ka whakahokia mai ano e te reo ki a au i te rangi, ko te rua o nga meatanga, Ko ā te Atua i mea ai kia ma, ana e whakanoatia e koe.
- 10
- A ka toru nga meatanga o tenei: ka hutia katoatia ake ano ki te rangi.
- 11
- Na, i reira pu ano kua tae mai nga tāngata tokotoru ki te whare i noho ai ahau, he mea tono mai no Hiharia ki ahau.
- 12
- Na, ka mea mai te Wairua ki a au kia haere tahi matou, kia kaua ahau e ruarua. I haere tahi ano hoki i a au enei teina tokoono, a tomo ana matou ki roto ki te whare o taua tangata:
- 13
- Na, ka korerotia mai e ia ki a matou tona kitenga i te anahera, i tona whare e tu ana, e mea ana ki a ia, Tonoa etahi tāngata ki Hopa, tikina a Haimona, te rua nei o ona ingoa ko Pita;
- 14
- Māna e korero ki a koe etahi kupu, e ora ai koutou ko tou whare katoa.
- 15
- A, taku timatanga ki te korero, ka tau iho te Wairua Tapu ki a ratou, ka pera ano me ia ki a tatou i te timatanga.
- 16
- Katahi ahau ka mahara ki te kupu a te Ariki, ki tana i mea ai, I iriiri ra a Hoani ki te wai; ko koutou ia ka iriiria ki te Wairua Tapu.
- 17
- Na, ka rite nei ta te Atua mea i hoatu ai ki a ratou, ki tana nei ki a tatou, ki te hunga kua whakapono ki te Ariki ki a Ihu Karaiti; he aha ahau, hei arai i ta te Atua?
- 18
- Ano ka rongo ratou ki enei mea, mutu pu ta ratou korero, heoi ka whakakororia i te Atua, ka mea, Koia hoki, kua homai e te Atua ki nga tauiwi te ripeneta e ora ai.
- 19
- Na, te hunga i whakamararatia i te tukinotanga i puta ake i to Tepene, haereere ana ratou, a tae noa ki Piniki, ki Kaiperu, ki Anatioka, me te kauwhau ano i te kupu ki nga Hurai anake, kahore ki etahi atu.
- 20
- Etahi tāngata hoki o ratou no Kaiperu, no Hairini, a haere ana ki Anatioka, korero ana ki nga tāngata whaka-Kariki, kauwhau ana i te Ariki i a Ihu.
- 21
- A i a ratou te ringa o te Ariki: he tokomaha rawa hoki i whakapono, i tahuri ki te Ariki.
- 22
- Na, te taenga atu o te rongo o enei mea ki nga taringa o te hahi i Hiruharama, ka tonoa e ratou a Panapa kia haere ki Anatioka.
- 23
- A, tona taenga atu, tona kitenga i te aroha noa o te Atua, ka hari, ka whakahau i a ratou katoa kia u te ngakau, kia piri atu ki te Ariki.
- 24
- He tangata pai hoki ia, kī tonu i te Wairua Tapu i te whakapono: a he nui te hunga i honoa ki te Ariki.
- 25
- Me i reira ka haere atu a Panapa ki Tarahu, ki te rapu i a Haora:
- 26
- A, tona kitenga i a ia, ka kawea ia ki Anatioka. A kotahi to raua tino tau i huihui ai ki te hahi, he nui hoki te hunga i whakaakona. A i mātua huaina nga akonga he Karaitiana ki Anatioka.
- 27
- I aua ra ka haere mai etahi poropiti i Hiruharama ki Anatioka.
- 28
- A ka whakatika tetahi o ratou, ko Akapu te ingoa, ka korero, he mea whakaako e te Wairua, meake ko te matenga nui i te hiakai pa ai ki te whenua, a puta noa: i puta ano hoki tenei i nga ra o Karauria Hiha.
- 29
- Na, ka whakatakoto tikanga nga akonga, ara nga mea i whai rawa, tenei tangata tenei tangata, kia tonoa he mea ma nga tuakana e noho ana i Huria:
- 30
- I pera ano ratou, i mea kia kawea ki nga kaumatua e nga ringa o Panapa raua ko Haora.
Address: 
Phone: 
Email: