Acts Chapter 7 - Paipera Tapu 1868 | Te Paipera Tapu 1868

Acts Chapter 7 - Paipera Tapu 1868

1
Katahi ka mea atu te tohunga nui, He pono ranei enei mea?
2
Na, ko tana meatanga mai, E hoa ma, e aku tuakana, e aku mātua, whakarongo; I puta mai te Atua o te kororia ki to tatou matua ki a Aperahama, i a ia i Mehopotamia, i te mea kiano i noho noa ki Karana,
3
I mea ki a ia, Haere atu i tou whenua, i ou whanaunga, a haere mai ki te whenua e whakakitea e ahau ki a koe.
4
Na, ko tana haerenga mai i te whenua o nga Karari, noho ana ki Karana: a, te matenga o tona pāpā, ka whakahekea mai ia ki tenei whenua e noho nei koutou.
5
A kihai i hoatu tetahi kāinga mona i konei, kahore noa iho he turanga waewae: heoi i mea mai ia, e homai a konei hei kāinga mona, mo tona whanau ano hoki i muri i a ia, i te mea kahore ano ana tamariki.
6
I penei ano te korero a te Atua, e noho manene tona whanau ki te whenua ke: ka meinga hoki hei pononga, a e wha rau o nga tau e tukinotia ai.
7
Na, te iwi e meinga ai ratou hei pononga, ka whakawakia e ahau, e ai ta te Atua: muri iho i tenei ka puta mai ratou, a ka karakia i tenei wahi ki a au.
8
A i hoatu ano e ia ki a ia te kawenata o te kotinga: a whanau ake tana tamaiti ko Ihaka, a i te tuawaru o nga ra ka kotia; a na Ihaka a Hakopa; na Hakopa hoki nga tupuna kotahi tekau ma rua.
9
Na, ka hae nga tupuna, a hokoa ana a Hohepa ki Ihipa: otira i a ia te Atua;
10
Nāna ia i whakaora i ona matenga katoa, a hoatu ana ki a ia he pai he matauranga, i te aroaro o Parao kingi o Ihipa; a meinga ana e tera hei kawana mo Ihipa, mo tona whare katoa ano hoki.
11
Na, ko te putanga mai o te mate kai ki te whenua katoa o Ihipa, o Kanana, he nui te mate: kihai rawa i kitea he oranga e o tatou mātua.
12
Ano ka rongo a Hakopa, e whai witi ana a Ihipa, ka mātua tonoa e ia o tatou mātua.
13
A i te rua o nga haerenga ka whakaaturia a Hohepa ki ana tuakana; a ka kitea e Parao te iwi o Hohepa.
14
Na, ka tono tangata atu a Hohepa ki te tiki i tona pāpā i a Hakopa, me ana huānga katoa, e whitu tekau ma rima nga wairua.
15
Na, ka haere atu a Hakopa ki Ihipa, a ka mate, a ia, me o tatou mātua.
16
Ka kawea ki Hikeme, ka whakatakotoria ki roto ki te urupa i hokoa e Aperahama, he mea hoko ki te moni i nga tamariki a Emora pāpā o Hikeme.
17
Ano ka tata te wa mo te mea i korerotia i mua i oatitia e te Atua ki a Aperahama, ka tupu te iwi, ka tini haere ki Ihipa,
18
A whakatika noa tetahi atu kingi kihai nei i mohio ki a Hohepa.
19
Tinihangatia ana e tenei to tatou iwi, whakatupuria kinotia ana o tatou mātua, meinga ana kia makā atu a ratou tamariki kei ora.
20
I taua wa ka whanau a Mohi, he mea ataahua ki te Atua, e toru nga marama i whangainga ai ia i roto i te whare o tona pāpā.
21
A ka oti ia te maka atu, ka tangohia ake e te tamahine a Parao, a atawhaitia ana hei tamaiti māna.
22
Na, ka whakaakona a Mohi ki nga whakaaro mohio katoa o nga Ihipi, kaha rawa te kupu, te mahi.
23
A ka tino wha tekau ona tau, ka mea a roto o tona ngakau, kia kite ia i ona tuakana, i nga tamariki a Iharaira.
24
A ka kite ia i tetahi e whakatupuria kinotia ana, ka awhinatia mai e ia, a rapua ana e ia he utu mo te mea i tukinotia, patua e ia te Ihipi.
25
Hua noa e mohio ona tuakana, nona te ringa a homai ai e te Atua te whakaoranga mo ratou: heoi kihai ratou i mohio.
26
Na, i te aonga ake ka puta ano ia ki etahi e whawhai ana ki a raua, ka tohe kia houhia ta raua rongo, ka mea, E hoa ma, he teina he tuakana korua; he aha tetahi ka kino ai ki tetahi?
27
Heoi turakina atu ana ia e te tangata nona te hē ki tona hoa, i mea mai, Na wai koe i mea hei rangatira hei kai whakarite whakawa mo maua?
28
E mea ana koe ki te whakamate i a au, me koe i whakamate i te Ihipi i nanahi?
29
Na, ka oma a Mohi i taua korero, a noho manene ana i te whenua o Miriana; a whanau ana ki reira ana tarnariki tokorua.
30
A ka tino rite nga tekau e wha o nga tau, ka puta mai ki a ia i te koraha o maunga Hinai tetahi anahera a te Ariki, i roto i te mura ahi i te rakau.
31
A, te tirohanga atu a Mohi, ka miharo ki taua mea i kitea ra: a i a ia e whakatata ana ki te matakitaki, ka puaki mai te reo o te Ariki ki a ia,
32
Ko ahau te Atua o ou mātua, te Atua o Aperahama, te Atua o Ihaka, te Atua o Hakopa. Heoi wiri noa a Mohi, kihai i ngoto te titiro atu.
33
Na ko te kianga atu a te Ariki ki a ia, Wetekia nga hu o ou waewae: he whenua tapu hoki te wahi e tu na koe.
34
Kua kite ahau, kua kite ahau i te matenga o toku iwi i Ihipa, kua rongo hoki i to ratou auetanga, a kua heke iho nei ki te whakaora i a ratou. Na, haere mai, me tono koe e ahau ki Ihipa.
35
Ko taua Mohi i whakakahoretia ra e ratou, i mea ra ratou, Na wai koe i mea hei rangatira hei kai whakarite whakawa? ko ia ano i tonoa e te Atua hei rangatira, hei kai whakaora, he mea ki mai na te anahera i puta mai ki a ia i roto i te rakau.
36
Nāna ratou i arahi mai ki waho, i muri iho i tana mahinga i nga mea whakamiharo i nga tohu ki te whenua o Ihipa, ki te moana Whero, ki te koraha, i nga tau e wha tekau.
37
Ko taua Mohi ano tenei nāna nei i mea ki nga tamariki a Iharaira, Ma te Ariki ma to koutou Atua e whakaara ake he poropiti mo koutou, i roto i o koutou teina, he penei ano me ahau; ko ia ta koutou e rongo ai.
38
Ko ta te hahi tangata tenei i te koraha, ko te hoa o te anahera i korero ki a ia i maunga Hinai, o o tatou mātua ano hoki: i riro mai ano hoki i a ia nga ture ora kia homai ki a tatou:
39
Kihai nei o tatou mātua i pai ki te whakarongo ki a ia, heoi peia ana ia e ratou, a hoki ana o ratou ngakau ki Ihipa,
40
A mea ana ratou ki a Arona, Hangā ma tatou etahi atua hei haere ki mua i a tatou: ko tenei Mohi hoki i arahina mai ai tatou i te whenua o Ihipa, e kore tatou e mātau i ahatia ranei.
41
Heoi hangā ana e ratou he kuao kau i aua ra, a kawea atu ana he patunga tapu ma taua whakapakoko, a koa ana o ratou ngakau ki nga mahi a o ratou ringaringa.
42
Na, ka tahuri te Atua, ka tukua ratou kia karakia ki te ope o te rangi: kia pera me te mea i tuhituhia ki te pukapuka a nga poropiti, E te whare o Iharaira, i homai koia e koutou ki a au nga patunga tapu me nga whakahere, i nga tau e wha tekau i te koraha?
43
Na, kua mau koutou ki te tapenakara a Moroka, ki te whetu o to koutou Atua o Remapana, ki nga whakapakoko i hangā e koutou hei koropikonga atu; na, maku koutou e kawe atu ki ko atu i Papurona.
44
I o tatou tupuna te tapenakara o te whakaaturanga i te koraha, tana hoki i whakarite ai, i mea ai ki a Mohi kia hangā e ia, kia rite ki te ahua i kite ai ia.
45
A, te rironga mai i o tatou tupuna, na, mauria mai ana e ratou ko Hohua ki te whenua o nga tauiwi, i peia nei e te Atua i te aroaro o o tatou tupuna, a taea noatia nga ra i a Rawiri;
46
Na, i paingia tera e te Atua, a ka mea kia kitea tetahi tapenakara mo te Atua o Hakopa.
47
Na Horomona ia i hanga he whare mona.
48
He ahakoa e kore a te Runga rawa e noho ki nga whare i hangā e te ringa, ko ta te poropiti hoki tena i mea ai,
49
Ko te rangi taku torona, ko te whenua taku turanga waewae: he whare pehea ta koutou e hanga ai moku? e ai ta te Ariki: a ko tehea te wahi e okioki ai ahau?
50
Ehara koia i toku ringaringa nana enei mea katoa i hanga?
51
E te hunga kakī maro, kahore nei i kotia te ngakau, te taringa, tutū tonu koutou ki te Wairua Tapu: rite tonu ta koutou ki ta o koutou tupuna.
52
Ko tehea o nga poropiti kihai i whakatupuria kinotia e o koutou mātua? a marū iho i a ratou te hunga i poropititia ai te haerenga mai o te Tika: ko koutou nei ona kai tuku, ona kai whakamate:
53
Kua riro mai ano hoki i a koutou te ture, he mea whakatakoto mai na nga anahera, heoi kihai i mau i a koutou.
54
A, to ratou rongonga i enei mea, mamae pu o ratou ngakau, tetea noa iho nga niho ki a ia.
55
Otiia kī tonu ia i te Wairua Tapu, a titiro pu atu ana ki te rangi, ka kite i te kororia o te Atua, me Ihu e tu ana ki te ringaringa matau o te Atua;
56
Na, ko tana kianga atu, Nana, ka kite ahau i nga rangi e tuwhera ana, me te Tama a te tangata e tu ana i te ringaringa matau o te Atua.
57
Na, nui atu to ratou reo ki te hamama, purua ana o ratou taringa, tahi tonu te amohanga mai ki a ia,
58
Makā ana e ratou ki waho o te pa, akina iho ki te kamaka: i whakatakotoria ano hoki e nga kai whakaatu o ratou kakahu ki nga waewae o tetahi taitamariki, ko Haora te ingoa.
59
Heoi akina ana a Tepene ki te kamaka e ratou, i a ia e karanga ana, e mea ana, E te Ariki, e Ihu, tenei toku wairua ki a koe.
60
Na, tukua ana e ia nga turi, a nui atu tona reo ki te karanga, E te Ariki, aua tenei hara e whakairia ki a ratou. A, tana korerotanga i tenei, ka moe.