- 1
- A i whakaae ano a Haora ki tona matenga. Na, he nui te whakatoinga o te hahi i Hiruharama i taua wa: a marara katoa atu ana ratou, puta noa i nga wahi o Huria, o Hamaria; kahore ia nga apotoro.
- 2
- A, na te hunga whakaaro a Tepene i kawe atu, i tanu, he nui hoki te tangihanga i tangihia ai ia e ratou.
- 3
- Ko Haora ia, raru ana i a ia te hahi, tomo ana ia ki roto ki tenei whare ki tenei whare, toia ana nga tāngata nga wāhine, a hoatu ana ki roto ki te whare herehere.
- 4
- Na, nga mea i marara atu, haere noa atu ana ratou me te kauwhau i te kupu.
- 5
- I haere atu ano hoki a Piripi ki te pa o Hamaria, a kauwhau ana i a te Karaiti ki a ratou.
- 6
- Na, kotahi ano te ngakau o nga tāngata ki te whakarongo ki nga mea i korero ai a Piripi, i a ratou e rongo ana e kite ana i nga merekara i mea ai ia.
- 7
- I puta mai hoki nga wairua poke i roto i te tini e nohoia ana, he nui hoki te reo ki te karanga: he tokomaha ano hoki nga pararutiki, nga kopa, i whakaorangia.
- 8
- A, nui atu te hari o taua pa.
- 9
- Na, ko tetahi tangata ko Haimona te ingoa, e mahi makutu ana i mua i roto i taua pa, e ki ana he tangata nui ia, a miharo noa te iwi o Hamaria.
- 10
- A i whakarongo katoa ki a ia te iti te rahi, i mea, Ko te kaha nui o te Atua tenei tangata.
- 11
- I whakarongo ai ratou ki a ia, kua roa ke hoki to ratou miharotanga ki ana mahi makutu.
- 12
- Ano ka whakapono ratou ki a Piripi, e kauwhau ana i nga mea o te rangatiratanga o te Atua, o te ingoa hoki o Ihu Karaiti, ka iriiria ratou, nga tāngata, nga wāhine.
- 13
- Me Haimona ano hoki, i whakapono ano ia, i iriiria, a u ana ki a Piripi; a, tona kitenga i nga merekara, i nga tohu nunui i meinga, ka miharo.
- 14
- A ka rongo nga apotoro i Hiruharama, ko Hamaria kua tango i te kupu a te Atua, ka tonoa ki a ratou a Pita raua ko Hoani:
- 15
- To raua taenga atu, ka inoi mo ratou kia riro mai te Wairua Tapu i a ratou:
- 16
- (Kahore ano hoki ia i tau noa ki tetahi o ratou: i iriiria kautia i runga i te ingoa o te Ariki o Ihu.)
- 17
- Me i reira ka whakapakia nga ringaringa ki a ratou, a ka riro mai te Wairua Tapu.
- 18
- A, te kitenga o Haimona, na te pānga o nga ringaringa o nga apotoro i hoatu ai te Wairua Tapu, ka mauria mai he moni ki a ratou,
- 19
- Ka mea ia, Homai hoki ki a au tenei mana, kia riro mai ai te Wairua Tapu ki te tangata e whakapakia atu e oku ringaringa.
- 20
- Na, ko te meatanga mai a Pita ki a ia, Kia pirau ngatahi korua ko tou moni, ina koe ka mea, ma te moni ka whiwhi ai ki nga mea e homai ana e te Atua.
- 21
- Kahore he wahi mou kahore he taunga mou ki tenei mea: kahore hoki i tika tou ngakau i te aroaro o te Atua.
- 22
- Na, ripenetatia tenei kino au, inoi atu ki te Atua, me kore e murua te whakaaro a tou ngakau.
- 23
- Kua kite hoki ahau i a koe, kei te au kawa, kei te here o te kino.
- 24
- Na, ko te whakahokinga mai a Haimona, ka mea, Ma korua e inoi atu moku ki te Ariki, kei pa mai ki a au tetahi o nga mea kua korerotia na e korua.
- 25
- A ka mutu ta raua whakaatu, ta raua kauwhau i te kupu a te Ariki, ka hoki atu ki Hiruharama, a he maha nga kāinga o nga Hamari i kauwhautia ai e raua te rongo pai.
- 26
- Na, ka ki atu tetahi anahera o te Ariki ki a Piripi, ka mea, Whakatika, haere ki te tonga, ki te ara e maro atu ana i Hiruharama ki Kaha; he wahi koraha tena.
- 27
- Whakatika ana ia, haere ana: na, ko tetahi tangata o Itiopia, he unaka, he tangata nui na Kanarahi kuini o nga Itiopia, ko te kai tiaki ia o ana taonga katoa, i haere mai ki Hiruharama ki te karakia,
- 28
- A e hoki ana, e noho ana i runga i tona hariata, me te korero i a Ihaia poropiti.
- 29
- Na, ko te meatanga a te Wairua ki a Piripi, Haere, awhitia atu ki te hariata ra.
- 30
- Heoi oma atu ana a Piripi, a ka rongo ki a ia e korero ana i a Ihaia poropiti, ka mea atu, E mātau ana ranei koe ki tau e korero na?
- 31
- Ano ra ko ia, Me pehea koia, ki te kore tetahi e arataki i a au? Na, ka mea ia ki a Piripi kia eke ki runga, noho tahi ai raua.
- 32
- A, te wahi o te Karaipiture i korero nei ia, ko ia tenei, Ano he hipi i arahina ia kia patua; a me te reme i te aroaro o tona kai kukuti e wahangu ana, kihai i kuihi tona waha:
- 33
- I tona whakaitinga i whakakorea he whakarite whakawa mona: ma wai hoki tona whakatupuranga e korero? kua tangohia hoki ia kei ora ki te whenua.
- 34
- Na, ka oho mai te unaka, ka mea atu ki a Piripi, Tena koa, mo wai tenei korero a te poropiti? mona ranei, mo te tangata ke ranei?
- 35
- Na, ka puaki te mangai o Piripi, a ka timata i taua Karaipiture ano, kauwhautia ana e ia a Ihu ki a ia.
- 36
- A i raua e haere ana i te ara, ka tae ki tetahi wai: a ka mea te unaka, Na, he wai; he aha ahau tē iriiria ai?
- 37
- Mea atu ana a Piripi, Ki te whakapono katoa tou ngakau, e ahei ano. Na, ka whakahokia mai e ia, a ka mea, E whakapono ana ahau ko Ihu Karaiti te Tama a te Atua.
- 38
- Katahi tena ka mea kia tu te hariata: a heke atu ana raua tokorua ki te wai, a Piripi raua ko te unaka, a iriiria ana ia e ia.
- 39
- A, to raua haerenga ake i te wai, kahakina atu ana a Piripi e te Wairua o te Ariki, a heoi ano to te unaka kitenga i a ia: na, haere hari ana ia i tona ara.
- 40
- Ko Piripi ia i kitea ki Ahota: na, haereere ana ia ki te kauwhau ki nga pa katoa, tae noa ki Hiharia.
Address: 
Phone: 
Email: