Deuteronomy Chapter 1 - Paipera Tapu 1868 | Te Paipera Tapu 1868

Deuteronomy Chapter 1 - Paipera Tapu 1868

1
Ko nga kupu enei i korero ai a Mohi ki a Iharaira katoa i tenei taha o Horano, i te koraha, i te mania i te ritenga atu o Tupu, i waenganui o Parana, o Topera, o Rapana, o Hateroto, o Rihahapa.
2
(Kia kotahi tekau ma tahi nga ra e haere atu ai i Horepa, ki te tika na Maunga Heira, ka tae ki Karehe-parenea.)
3
No te wha tekau o nga tau, no te tekau ma tahi o nga marama, no te ra tuatahi o te marama, ka korerotia atu e Mohi ki nga tamariki a Iharaira, nga mea katoa i ako mai ai a Ihowa ki a ia kia korerotia ki a ratou;
4
I muri iho i tana patunga i a Hihona kingi o nga Amori, i noho ra i Hehepona, i a Oka hoki, i te kingi o Pahana, i noho ra i Ahataroto i Eterei.
5
I timata a Mohi i tenei taha o Horano, i te whenua o Moapa, te whakapuaki i tenei ture: i mea ia:
6
I korero mai a Ihowa to tatou Atua ki a tatou i Horepa, i mea, Ka roa ta koutou nohoanga ki tenei maunga:
7
Anga atu, hapainga atu, haere ki te maunga o nga Amori, ki nga wahi katoa hoki e tata ana ki reira, o te mania, o nga pukepuke, o te raorao hoki, o te taha hoki ki te tonga, o te tahatika ano hoki o te moana, ki te whenua o nga Kanaani, ki Repanona hoki, puta noa ki te awa nui, ki te awa ki Uparati.
8
Na, kua tukua atu nei e ahau te whenua ki to koutou aroaro: haere, tangohia hoki te whenua i oati ai a Ihowa ki o koutou mātua, ki a Aperahama, ki a Ihaka, ratou ko Hakopa kia hoatu mo ratou, mo to ratou uri hoki i muri i a ratou.
9
A, i korero atu ano ahau ki a koutou i taua wa, i mea, E kore e ahei i a au anake te pikau i a koutou:
10
Kua whakanui a Ihowa to koutou Atua i a koutou, a tenei koutou te rite nei inaianei ki nga whetu o te rangi te tini.
11
(Ma Ihowa, ma te Atua o o koutou mātua, e tapiri mai ano a muri i a koutou ki nga mano tini atu i a koutou e noho nei, mana koutou e manaaki, e pera ano me tana i korero ai ki a koutou!)
12
Me pehea e taea ai e ahau anake ta koutou whakararu, to koutou whakataimaha, me ta koutou ngangau?
13
Whakaritea mai e koutou etahi tangata tupato, whai wakaaro, e mohiotia ana e o koutou iwi, a maku ratou e mea hei upoko mo koutou.
14
Na, ka whakahokia mai e koutou ki a au, a ka mea, He mea pai tau e ki mai na kia meatia e matou.
15
Na, ka tango ahau i nga upoko o o koutou iwi, i nga mea whakaaro e mohiotia ana, a meatia iho ratou e ahau hei upoko mo koutou, hei rangatira mo nga mano, hei rangatira hoki mo nga rau, hei rangatira mo nga rima tekau, hei rangatira hoki mo nga tekau, hei kai whakahauhau hoki mo o koutou iwi.
16
A i ki atu ano ahau i taua wa ki o koutou kai whakatikatika, i mea, Whakarangona nga kupu a o koutou teina, a tetahi, a tetahi, kia tika hoki ta koutou whakariterite i te whakawa a te tangata, a tona teina, a te tangata ke hoki e noho ana i a ia.
17
Kei whakaaro koutou ki te kanohi ina whakariterite, kia rite ta koutou whakarongo ki te iti ki te rahi; kei wehi koutou i te kanohi o te tangata; no te mea, na te Atua te whakariteritenga; a ko te mea e ngaro ana i a koutou, ka kawe mai ki a au, a maku e whakarongo atu.
18
A whakahaua ana e ahau i reira nga mea katoa e mahi ai koutou.
19
A ka turia mai e tatou i Horepa, na haerea katoatia ana e tatou taua koraha nui, e wehingia ana, i kite ra koutou i te huarahi o te maunga o nga Amori; i pera tonu me ta Ihowa me ta to tatou Atua i whakarite mai ai ki a tatou; na, ka tae mai tatou ki Karehe-parenea.
20
Na, ko taku meatanga atu ki a koutou, Kua tae mai nei koutou ki te maunga o nga Amori, ka homai nei e Ihowa e to tatou Atua ki a tatou.
21
Nana, ka tukua nei te whenua e Ihowa e to Atua ki tona aroaro: haere ki runga, tangohia, kia rite ai ki ta Ihowa ki ta te Atua o ou matua i ki mai ai ki a koe; kaua e wehi, kaua hoki e pawera.
22
Na, ko te whakatatanga mai o koutou katoa ki a au, ta koutou meatanga mai, Kia tono atu tatou i etahi tangata ki mua i a tatou, a ma ratou e whakataki ta tatou whenua, e whakahoki mai te korero ki a tatou, mo te huarahi e haere ai tatou ki runga, mo nga pa hoki ka haere atu nei tatou ki reira.
23
A i pai ano taua kupu ki a au: na, ka tango ahau i etahi tangata kotahi tekau ma rua i roto i a koutou, tataki kotahi o tenei iwi o tenei iwi.
24
A ka tahuri ratou, ka haere ki runga ki te maunga, a ka tae atu ki te awaawa o Ehekora, ka tirotiro hoki i taua wahi.
25
A ka tango ratou i etahi o nga hua o te whenua ki o ratou ringaringa, a maua ana ki raro ki a tatou, i whakahoki ake ano ratou i te kupu ki a tatou, i mea, He pai te whenua ka homai nei e Ihowa e to tatou Atua ki a tatou.
26
Heoi, kihai koutou i pai ki te haere ki runga; na ka tutu ki te kupu a Ihowa a to koutou Atua:
27
A amuamu ana koutou i roto i o koutou teneti, mea ana, He kino no Ihowa ki a tatou i whakaputaina mai ai tatou e ia i te whenua o Ihipa, kia hoatu ai tatou ki te ringa o nga Amori, kia hunā ai tatou.
28
Kia haere tatou ki runga ki hea? kua ngohe nei hoki o tatou ngakau i o tatou tuakana, i a ratou i mea ra, E nui ana te iwi, e roroa ana i a tatou; ko nga pa e nui ana, taiepa rawa, a, tutuki noa ki te rangi: i kite ano hoki matou i nga tamariki a nga Anakimi ki reira,
29
Na, ko taku meatanga atu ki koutou, Kei pawera koutou, kei wehi i a ratou.
30
Ko Ihowa ko to koutou Atua, te haere atu nei i mua i a koutou, mana ta koutou pakanga; ka rite ano ki nga mea katoa i mea ai ia ki to koutou aroaro i Ihipa, i tana whakaaro ki a koutou;
31
I te koraha ano hoki i kite ai koe i ta Ihowa i ta to Atua wahanga i a koe, i a ia e pera ana me te tangata e waha ana i tana tamaiti, i te huarahi katoa i haere na koutou, a tae noa mai koutou ki tenei wahi.
32
Heoi, i tenei mea ano, kihai koutou i whakapono ki a Ihowa ki to koutou Atua,
33
I haere ra i mua i a koutou i te huarahi, hei whakataki i tetahi wahi mo koutou, e noho ai koutou, i te po i roto i te ahi, hei whakaatu mai ki a koutou i te huarahi e haere ai koutou, a i roto i te kapua i te awatea.
34
A ka rongo a Ihowa i o koutou reo e korero ana, na ka riri ia, ka oati hoki, ka mea,
35
E kore rawa tetahi o enei tangata o tenei whakatupuranga kino e kite i taua whenua pai i oati ai ahau kia hoatu ki o koutou mātua.
36
Heoi ano ko Karepe tama a Iepune, e kite ia i taua wahi; a ka hoatu e ahau ki a ia, ki ana tamariki hoki, te whenua i haerea e ia, mona i tino whai i a Ihowa.
37
A i riri mai ano a Ihowa ki a au, mo koutou hoki, i mea mai, E kore ano hoki koe e tae ki reira.
38
Ko Hohua tama a Nunu, e tu ana i tou aroaro, e tae ia ki reira: whakatenatenangia ia; ta te mea mana a Iharaira e whakawhiwhi ki tera wahi.
39
Ko a koutou potiki hoki, i mea na koutou ka waiho hei pārau, me a koutou tamariki kihai nei i mohio i taua ra ki te pai ki te kino, e tae ratou ki reira, a ka hoatu e ahau a reira ki a ratou, a e whiwhi ratou ki tera whenua.
40
Ko koutou ia, tahuri atu koutou, haere atu ki te koraha, na te huarahi ki te Moana Whero.
41
Na, ka whakahokia mai e koutou a ka mea mai ki a au, Kua hara matou ki a Ihowa; ka haere matou ki runga, ki te whawhai, kia rite ai ki nga mea katoa i whakahau mai ai a Ihowa to tatou Atua ki a tatou. A, whitikiria ana e koutou, e ia tangata e ia tangata, ana mea mo te riri, na, ka mea koutou ki te haere ki runga ki te maunga.
42
Katahi ka mea mai a Ihowa ki a au, Mea atu ki a ratou, Kaua koutou e haere ki runga, kaua ano hoki e tu ki te riri; ta te mea kahore ahau i roto i a koutou; kei patua koutou ki te aroaro o o koutou hoa riri.
43
Na, ka korero atu ahau ki a koutou; a kihai koutou i rongo, heoi, ka tutu koutou ki te kupu a Ihowa, na, hikaka ana koutou, haere ana ki runga ki te maunga.
44
Na, ka puta mai nga Amori, e noho ana i taua maunga, ki te tu i a koutou, a whai mai ana ratou i a koutou, pera ana me te pi, a patua iho koutou e ratou i Heira, a taea noatia a Horema.
45
Na, ka hoki mai koutou, ka tangi ki te aroaro o Ihowa; otiia kihai a Ihowa i whakarongo ki to koutou reo, kihai ano hoki i anga tona taringa ki a koutou.
46
Na, ka noho koutou ki Karehe, a, maha noa nga ra, rite tonu ki nga ra i noho ai koutou.