- 1
- Na, ka whakatata mai nga mātua ariki o nga hapu o nga tamariki a Kireara ko ia nei te tama a Makiri, a he tama tera na Manahe, no nga hapu o nga tamariki a Hohepa, a ka korero ki te aroaro o Mohi, ki te aroaro ano hoki o nga rangatira o nga mātua ariki nga tamariki a Iharaira:
- 2
- A ka mea, I whakahau a Ihowa i toku ariki kia hoatu te whenua hei kāinga tupu mo nga tamariki a Iharaira, he mea rota: i whakahaua ano toku ariki e Ihowa kia hoatu te wahi o Teropehara o to matou teina ki ana tamahine.
- 3
- Na, ki te marenatia ratou ki etahi o nga tamariki o era iwi o nga tamariki a Iharaira, na, ka titorehia atu to ratou wahi i te wahi o o matou mātua, a ka tapiritia atu ki te wahi o te iwi e riro atu ai ratou, a ka titorehia atu i te wahi i meatia hei kāinga tupu mo matou.
- 4
- A, te takanga mai o te iupiri a nga tamariki a Iharaira, na, ka tapiritia atu to ratou wahi ki te wahi o te iwi e riro atu ai ratou, a ka titorehia atu to ratou kāinga i te kāinga o te iwi o o matou mātua.
- 5
- Na, ka whakahau atu a Mohi ki nga tamariki a Iharaira, he mea ki mai na Ihowa, a ka mea, He tika nga kupu a te iwi o nga tamariki a Hohepa.
- 6
- Ko ta Ihowa kupu tenei i whakahau ai mo nga tamahine a Teropehara; a mea ana, Me marena ratou ki a ratou e pai ai; otiia me marena ki te hapu o te iwi o to ratou papa.
- 7
- A e kore e riro ke te kāinga tupu o tetahi iwi i tetahi iwi atu i roto i nga tamariki a Iharaira: ka whai hoki nga tamariki a Iharaira, ia tangata ia tangata ki te kāinga o te iwi o o ratou mātua.
- 8
- Me marena ano hoki nga tamahine katoa, i a ratou nei tetahi kāinga o tetahi o nga iwi o nga tamariki a Iharaira, ki tetahi tangata o te hapu o te iwi o o ratou papa; kia mau ai te kāinga tupu o ona mātua i tenei tangata i tenei tangata o nga tamariki a Iharaira.
- 9
- Kei riro ke hoki te kāinga tupu o tetahi iwi i tetahi atu iwi; engari me whai nga iwi o nga tamariki a Iharaira, ia tangata ia tangata, ki o ratou kāinga ake.
- 10
- Rite tonu ki ta Ihowa i whakahau ai ki a Mohi, ta nga tamahine a Teropehara i mea ai:
- 11
- Na, ka riro a Mahara, a Tirita, a Hokora, a Mirika, a Noa, nga tamahine a Teropehara, hei wahine ma nga tama a nga teina o to ratou papa.
- 12
- I marenatia hoki ki nga hapu o nga tama a Manahe, ko ia nei te tama a Hohepa, a i mau to ratou kāinga tupu ki te iwi o te hapu o to ratou papa.
- 13
- Ko nga whakahaunga enei me nga whakariteritenga i whakahaua e Ihowa, i whakapuakina hoki e Mohi ki nga tamariki a Iharaira i nga mānia o Moapa i te wahi o Horano e tata ana ki Heriko.
Address: 
Phone: 
Email: