- 1
- A i korero a Ihowa ki a Mohi i nga mania o Moapa, i te wahi o Horano e tata ana ki Heriko, i mea,
- 2
- Whakahaua nga tamariki a Iharaira kia homai e ratou ki nga Riwaiti etahi pa o o ratou kāinga kua riro mai nei i a ratou hei nohoanga; me hoatu ano hoki e koutou ki nga Riwaiti nga wahi o waho o aua pa, a, tawhio noa.
- 3
- A ko nga pa hei nohoanga mo ratou, ko nga wahi hoki o waho ake mo a ratou kararehe, mo o ratou taonga, me a ratou kirehe katoa.
- 4
- Kia kotahi mano whatianga hoki o nga wahi o waho ake o nga pa e hoatu e koutou ki nga Riwaiti, o te taiepa atu ano o te pa, a haere whakawaho, a, tawhio noa.
- 5
- Me ruri atu ano e koutou i waho o te pa; i te taha ki te rawhiti kia rua mano whatianga, i te taha ki te tonga kia rua mano whatianga, i te taha ki te hauauru kia rua mano whatianga, i te taha hoki ki te nota kia rua mano whatianga, a hei waenganui te pa: ko nga wahi tenei mo ratou o waho i nga pa.
- 6
- A kia ono nga pa whakaora i roto i nga pa e hoatu e koutou ki nga Riwaiti; me hoatu e koutou hei rerenga atu mo te kai whakamate: kia wha tekau hoki ma rua nga pa e tapiritia mai e koutou ki ena.
- 7
- Nga pa katoa e hoatu e koutou ki nga Riwaiti, kia wha tekau ma waru: era, me nga wahi o waho ake.
- 8
- A hei roto i te wahi tuturu o nga tamariki a Iharaira nga pa e hoatu e koutou; kia maha mai i roto i nga mea maha, kia ouou hoki i roto i nga mea ouou, kia rite ki tona kāinga e riro i a ia ona pa e hoatu e ia tangata ki nga Riwaiti.
- 9
- A i korero ano a Ihowa ki a Mohi, i mea,
- 10
- Korero atu ki nga tamariki a Iharaira, mea atu ki a ratou, E whiti koutou i Horano ki te whenua o Kanaana;
- 11
- Na, ka whakarite i etahi pa mo koutou hei pa whakaora, hei rerenga atu mo te tangata whakamate, i whakamate nei i te tangata, otiia ehara i te mea totika.
- 12
- A ka waiho e koutou hei pa whakaora kei mate i te kai takitaki; kei mate te tangata whakamate, kia tu ra ano ia ki te aroaro o te whakaminenga, kia whakawakia.
- 13
- A kia ono nga pa e waiho e koutou hei whakaora, o nga pa e hoatu nei e koutou.
- 14
- Kia toru nga pa e hoatu e koutou i tenei taha o Horano, kia toru hoki nga pa e hoatu e koutou i te whenua o Kanaana; me waiho hei pa whakaora.
- 15
- Hei whakaora enei pa e ono mo nga tamariki a Iharaira, mo te manene, mo te nohonoa i roto i a koutou: hei rerenga atu mo nga tangata i mate ai tetahi, otiia ehara i te mea totika.
- 16
- Otiia ki te patu ia i a ia ki te mea rino, a ka mate, he kai kohuru ia: kia mate, mate rawa, te kai kohuru.
- 17
- Ki te patu ano hoki ia i a ia ki te kohatu i whiua e ia kia mate ai, a ka mate, he kai kohuru ia: kia mate, mate rawa, te kai kohuru.
- 18
- Ki te patu ranei ia i a ia ki te mea rakau a te ringa kia mate ai ia, a ka mate, he kai kohuru ia: kia mate, mate rawa, te kai kohuru.
- 19
- Ma te kai takitaki toto ake ano e whakamate te kai kohuru; e whakamate ia i a ia ina tutaki ki a ia.
- 20
- Ki te mea ano hoki he ngakau kino tona, a ka wero ia i a ia; ki te whanga atu ranei ia, a ka epaina atu ia kia mate;
- 21
- Ki te mauahara ranei a ka patu i a ia ki tona ringaringa e mate ai ia; kia mate, mate rawa, te kai patu, he kai kohuru ia: e whakamatea te kai kohuru e te kai takitaki toto, ina tutaki ki a ia.
- 22
- Tena ko tenei, he oho noa ake tana wero i a ia, a ehara i te mea mauahara; ki te epaina ranei e ia tetahi mea ki a ia, a kihai i whanga atu;
- 23
- Ki te patua ranei ia ki tetahi kohatu, ki te mea e mate ai te tangata, a kihai i kitea atu, na kua u ki a ia, a ka mate, kahore ano hoki ona mauahara ki a ia, kihai ano hoki i rapu i te he mona.
- 24
- Katahi ka whakarite te whakaminenga i nga korero a te kai patu, i a te kai takitaki toto hoki; kia rite ki enei ritenga.
- 25
- A ka whakaorangia mai e te whakaminenga te kai whakamate i roto i te ringa o te kai takitaki toto, me whakahoki ano hoki ia e te whakaminenga ki tona pa whakaora, i rere atu ai ia, a ka noho ia ki reira, a, mate noa te tino tohunga i whakawahia ki te hinu tapu.
- 26
- Ki te puta kau atu te kai whakamate ki waho o te rohe o tona pa whakaora, i rere atu nei ia;
- 27
- A ka pono ki a ia te kai takitaki toto ki waho o te rohe o tona pa whakaora, a ka patua te kai whakamate e te kai takitaki toto, e kore e whakairia he toto ki runga i a ia:
- 28
- Me noho hoki ia i roto i tona pa whakaora, kia mate ra ano te tino tohunga; a, muri iho i te matenga o te tino tohunga ka hoki te kai whakamate ki tona whenua tupu.
- 29
- Na, hei tikanga whakarite whakawa enei ma koutou, puta noa i o koutou whakatupuranga i o koutou nohoanga katoa.
- 30
- Ki te patu tetahi i te tangata, ma te mangai o nga kai whakaatu e whakamatea ai te kai kohuru: kaua ano hoki te kai whakaatu kotahi e whakapuaki i te he o tetahi tangata, hei mea kia mate ai ia.
- 31
- Kaua ano hoki e tangohia he utu mo te kai kohuru kia ora, ki te mea he hara tona e mate ai: engari kia mate ia, mate rawa.
- 32
- Kaua ano hoki e tangohia he utu mo te tangata i rere ki tona pa whakaora, kia hoki ia ki te whenua noho ai; kia mate ra ano te tohunga.
- 33
- Kei poke i a koutou te whenua e noho ai koutou: ma nga toto hoki e poke ai te whenua: heoi ano hoki te mea hei pure i nga toto i whakahekea ki te whenua, ko nga toto o te kai whakaheke.
- 34
- Kaua e whakapokea te whenua e noho ai koutou, e noho ai ahau: no te mea e noho ana ahau a Ihowa i waenganui i nga tamariki a Iharaira.
Address: 
Phone: 
Email: