Numbers Chapter 34 - Paipera Tapu 1868 | Te Paipera Tapu 1868

Numbers Chapter 34 - Paipera Tapu 1868

1
A i korero ano a Ihowa ki a Mohi, i mea,
2
Whakahaua atu nga tamariki a Iharaira, mea atu ki a ratou, E tae koutou ki te whenua o Kanaana; (ko te whenua tenei e riro i a koutou hei kāinga tupu, ara, te whenua o Kanaana, me ona rohe:)
3
Na, kei te koraha o Tini te taha ki a koutou whaka-te-tonga, haere tonu i te rohe o Eroma; a hei rohe ki a koutou ki te tonga te pito rawa o te moana tote, tera i te rawhiti:
4
Na, ka piko mai ta koutou rohe i te tonga ki te pikitanga o Akarapimi, a whiti tonu atu ki Tini: na, ka rere mai i te tonga, Karehe-parenea, haere, a, Hatara-tara, whiti tonu atu ki Atamono:
5
Na, ka piko atu te rohe i Atamono, a, te awa o Ihipa, a marere atu ki te moana.
6
Na, te rohe ki te taha ki te hauauru, ko te moana nui hei rohe ki a koutou: ko ta koutou rohe ki te hauauru tenei.
7
A ko tenei ta koutou rohe ki te nota: me whakatakoto mai e koutou i te moana nui ki Maunga Horo.
8
Me whakatakoto mai ano hoki i Maunga Horo ki te haerenga atu ki Hamata, a kei Terara nga putanga atu o te rohe:
9
A ka tae te rohe ki Tipirono, a kei Hatara-enana ona putanga atu; ko te rohe tenei ki a koutou whaka-te-nota.
10
Me whakatakoto mai ano hoki e koutou ta koutou rohe ki te rawhiti i Hatara-enana ki Hepama:
11
A ka haere mai te rohe i Hepama ki Ripira ki raro ki te taha ki te rawhiti o Aina; a ka haere tonu mai te rohe ki raro, a ka tae ki te taha ki te rawhiti o te moana o Kinereta:
12
A ka haere te rohe ki Horano, a kei te moana tote ona putanga: ko te whenua tenei mo koutou, me ona rohe, a, tawhio noa.
13
Na, ka whakahau a Mohi i nga tamariki a Iharaira, ka mea, Ko te whenua tenei e meatia ki te rota hei kāinga pumau mo koutou, i whakahaua nei e Ihowa kia hoatu ki nga iwi e iwa, ki tetahi taanga hoki o tetahi iwi:
14
Kua whiwhi hoki te iwi o nga tamariki a Reupena, tenei whare tenei whare o o ratou mātua, me te iwi o nga tamariki o Kara, tenei whare tenei whare o o ratou mātua; kua whiwhi ano hoki tetahi taanga o te iwi o Manahe ki to ratou wahi:
15
Kua whiwhi nga iwi e rua me tetahi taanga o tetahi iwi ki to ratou wahi ki tenei taha o Horano, ki te wahi e tata ana ki Heriko, ki te taha ki te rawhiti, ki te putanga mai o te ra.
16
A i korero a Ihowa ki a Mohi, i mea,
17
No nga ingoa enei o nga kai tuwha i te whenua mo koutou: ko Ereatara tohunga raua ko Hohua tama a Nunu.
18
Me tango mai ano hoki tetahi rangatira o tenei iwi o tenei iwi hei tuwha mo te whenua.
19
Nga ingoa hoki o ana tangata: ko Karepe tama a Iepune o te iwi o Hura.
20
Ko to te iwi hoki o nga tamariki a Himeona, ko Hemuere tama a Amihuru.
21
Ko to te iwi o Peniamine ko Erirara tama a Kihirono.
22
Ko te rangatira hoki o te iwi o nga tamariki a Rana, ko Puki tama a Iokiri.
23
Ko te rangatira o nga tamariki a Hohepa, ara, o te iwi o nga tamariki a Manahe, ko Haniere tama a Epora.
24
Ko te rangatira hoki o te iwi o nga tamariki a Eperaima, ko Kemuere tama a Hipitana.
25
Ko te rangatira hoki o te iwi o nga tamariki a Hepuruna, ko Eritapana tama a Paranaka.
26
Ko te rangatira hoki o te iwi o nga tamariki a Ihakara, ko Paratiere tama a Atana.
27
Ko te rangatira hoki o te iwi o nga tamariki a Ahera, ko Ahihuru tama a Heromi.
28
Ko te rangatira hoki o te iwi o nga tamariki a Napatari, ko Perahere tama a Amihuru.
29
Ko enei a Ihowa i whakahau ai hei tuwha i te kāinga mo nga tamariki a Iharaira i te whenua o Kanaana.