Deuteronomy Chapter 14 - Paipera Tapu 1868 | Te Paipera Tapu 1868

Deuteronomy Chapter 14 - Paipera Tapu 1868

1
He tamariki koutou na Ihowa na to koutou Atua: kaua koutou e haehae, kaua hoki e tiwhaina a waenganui o o koutou kanohi mo te tupapaku.
2
He iwi tapu hoki koe no Ihowa no tou Atua, a, kua whiriwhiri a Ihowa i a koe hei iwi mona, motuhake rawa i nga iwi katoa i te mata o te whenua.
3
Kaua e kainga tetahi mea whakarihariha.
4
Ko nga kararehe enei e kai ai koutou: ko te kau, ko te hipi, ko te koati,
5
Ko te hāta, me te anaterope, me te parotiri, me te koati kōwao, me te pikareka, me te kau mohoao, me te temera.
6
Ko nga kararehe katoa hoki e tararua ana te matimati, e weherua ana hoki te titorehanga, e rua nei nga matimati, a e whakahoki ake ana i te kai i roto i nga kararehe, ko ena me kai e koutou.
7
Otiia, kaua e kainga enei o nga mea e whakahoki ake ana i te kai, o nga mea hoki e tararua ana nga matimati, e titore pu ana; ko te kamera, ko te hea, me te hawhana: no te mea e whakahoki ake ana ratou i te kai, otiia kihai i tararua te matimati; hei mea poke ena ki a koutou.
8
Me te poaka hoki, no te mea e titore ana nga matimati, otiia e kore e whakahokia ake te kai; hei mea poke tena ki a koutou: kaua e kainga o ratou kikokiko, kaua hoki e pa atu ki o ratou tinana mate.
9
Ko enei a koutou e kai ai o nga mea katoa o roto i te wai: ko nga mea katoa e whai tara ana, e whai unahi ana, ta koutou e kai ai:
10
A, ko nga mea kahore he tara, kahore he unahi i a ratou, kaua e kainga; hei mea poke ena ki a koutou.
11
Ko nga manu poke-kore katoa me kai e koutou.
12
A, tenei ano nga mea e kore e kainga e koutou: ko te ekara, ko te wawahiiwi, me te ahipare,
13
Me te kireti, me te kaiaia, me te whatura, me nga mea pera,
14
Me nga raweni katoa, me nga mea pera,
15
Me te ruru, me te kahupo, me te kuko, me te kahu, me nga mea pera,
16
Me te ruru nohinohi, me te ruru nui, me te wani,
17
Me te perikana, me te kia-ekara, me te kawau,
18
Me te taaka, me te heroni, me nga mea pera, me te rapiwingi, me te pekapeka.
19
Me nga mea ngokingoki katoa e rere a manu ana, hei mea poke ena ki a koutou: kaua e kainga.
20
Ko nga manu poke-kore katoa me kai e koutou.
21
Kei kai koutou i tetahi mea i mate maori: me hoatu ki te manene i roto i ou tatau, a mana tena mea e kai; me hoko atu ranei ki tetahi tangata iwi ke: no te mea hoki he iwi tapu koe no Ihowa no tou Atua. Kaua e kohuatia he kuao koati ki te waiu o tona whaea.
22
Whakamotuhaketia nga whakatekau o nga hua katoa o o purapura, e tupu ake ana i te mara i tenei tau i tenei tau.
23
Me kai hoki ki te aroaro o Ihowa o tou Atua, ki te wahi e whiriwhiri ai ia kia waiho tona ingoa ki reira, nga whakatekau o to witi, o to waina, o to hinu hoki, me nga matamua ano o o kau, o o hipi hoki; kia akona ai koe kia wehi i a Ihowa i tou Atua i nga ra katoa.
24
A ki te roa rawa to huarahi, a, e kore tena mea e taea e koe te kawe; ki te mamao atu i a koe te wahi e whiriwhiri ai a Ihowa tou Atua kia waiho tona ingoa ki reira, ina manaakitia koe e Ihowa e tou Atua:
25
Na, me hoko e koe tena mea ki te moni, me takai hoki te moni ki roto ki tou ringa, ka haere ki te wahi e whiriwhiri ai a Ihowa tou Atua:
26
Na, ka hokona atu e koe te moni ki nga mea katoa e hiahia ai tou ngakau, ki nga kau, ki nga hipi ranei, ki te waina ranei, ki te wai kaha ranei, ki nga mea katoa hoki e mate-nuitia ana e tou ngakau: ka kai ai ki reira ki te aroaro o Ihowa o tou Atua, ka hari hoki, koutou, ko tou whare,
27
Ko te Riwaiti, i roto i ou kuwaha; kaua ia e whakarerea; he mea hoki, kahore ona wahi, kāinga tupu ranei i roto i a koe.
28
Hei te mutunga o nga tau e toru ka mauria mai e koe ki waho nga whakatekau katoa o o hua o tena tau, ka whakatakoto ai ki ou kuwaha:
29
Na, ka haere mai te Riwaiti, (no te mea kahore ona wahi, kāinga tupu ranei i roto i a koe,) me te manene, me te pani, me te pouaru, i roto nei i ou tatau, a ka kai ratou, ka makona; kia manaaki ai a Ihowa tou Atua i a koe i nga mahinga katoatanga a tou ringa e mahi ai koe.