Deuteronomy Chapter 13 - Paipera Tapu 1868 | Te Paipera Tapu 1868

Deuteronomy Chapter 13 - Paipera Tapu 1868

1
Ki te whakatika mai i roto i a koe he poropiti, he tangata moemoea ranei, a ka homai e ia ki a koe he tohu, he merekara ranei;
2
A ka puta mai te tohu, te merekara ranei, i korero ai ia ki a koe, i mea ai, Tatou ka whai ki nga atua ke, kihai nei i mohiotia e koe, ka mahi atu hoki ki a ratou;
3
Kei whakarongo koe ki nga korero a taua poropiti, a taua tangata moemoea ranei: ta te mea, e whakamatamatau ana a Ihowa to koutou Atua i a koutou, kia mohio ai e whakapaua ana ranei o koutou ngakau katoa, o koutou wairua katoa ki te aroha ki a Ihowa ki to koutou Atua.
4
Me whai koutou ki a Ihowa ki to koutou Atua, ko ia hoki ta koutou e wehi ai, me pupuri ana whakahaunga, me whakarongo hoki ki tona reo, me mahi atu ano hoki ki a ia, me awhi atu ki a ia.
5
A, taua poropiti ra, taua tangata moemoea ranei, me whakamate; mona hoki i mea kia whakarerea a Ihowa to koutou Atua, i tangohia mai ai koutou i te whenua o Ihipa, i hokona ai hoki koe i roto i te whare pononga, kia panā atu koe i te huarahi i whakahau ai a Ihowa tou Atua ki a koe kia haerea. Penei ka whakakorea atu e koe te kino i roto i a koe.
6
Ki te whakaki puku to teina, te tama a to whaea, to tamaiti ranei, to tamahine ranei, te hoa wahine ranei i tou uma, tou hoa ranei e rite ana ki tou ngakau, ki te mea mai, Tatou ka haere, ka mahi ki nga atua ke, kihai nei koe i mohio, koutou tahi ko ou mātua;
7
Ki etahi o nga atua o nga iwi i tetahi taha ou, i tetahi taha e tata ana ki a koe, kei tawhiti atu ranei i a koe, i tetahi pito o te whenua, paku noa ki tetahi pito o te whenua;
8
Kei whakaae koe ki a ia, kei whakarongo ki a ia; kaua ano hoki to kanohi e aroha ki a ia, kaua koe e tohu i a ia, kaua hoki e huna i a ia:
9
Engari patua rawatia e koe; ko tou ringa te pa wawe atu ki a ia, hei whakamate i a ia, muri iho ko te ringa o te iwi katoa.
10
A, me aki ia e koe ki te kohatu, kia mate; mona i whai kia whakapeautia ketia koe i a Ihowa i tou Atua i tangohia mai ai koe i te whenua o Ihipa, i te whare pononga.
11
A ka rongo a Iharaira katoa, ka wehi, e kore hoki e mahi i te pena me tena mea kino i roto i a koutou i muri iho.
12
Ki te rongo koe i roto i tetahi o ou pa, e homai e Ihowa e tou Atua ki a koe hei nohoanga, e korerotia ana,
13
Kua haere atu etahi tangata, he tamariki na Periara, i roto i a koe, kua whakapeau ke hoki i nga tangata o to ratou pa, kua mea Tatou ka haere, ka mahi atu ki nga atua ke, kihai nei i mohiotia e koutou;
14
Na, me rapu e koe, me ore atu, me te ui marie ano; na, he pono, he tika rawa te korero, kua mahia tena mea whakarihariha i roto i a koe;
15
Tukitukia rawatia nga tangata o taua pa ki te mata o te hoari, whakamotitia a reira, me nga mea katoa i roto, me ana kararehe, ki te mata o te hoari.
16
Ko nga taonga katoa hoki o reira me kohi ki waenganui o tona huarahi, ka tahu ai e koe te pa, me ona taonga katoa, ki te ahi, a rupeke noa, hei mea ki a Ihowa ki tou Atua: me waiho hoki a reira hei puranga mo a mua tonu atu; kaua e hangā a muri ake nei.
17
Kei piri hoki ki tou ringaringa tetahi wahi o te mea kua oti nei te kanga: kia tahuri ai a Ihowa i te muranga o tana riri, kia whakaputaina mai ai ano hoki e ia ki a koe he atawhai, kia atawhai ai hoki ia i a koe, kia whakanui ai i a koe, kia rite ai ki tana i oati ai ki ou mātua;
18
Ina whakarongo koe ki te reo o Ihowa o tou Atua, ina pupuri i ana whakahaunga katoa, e whakahau atu nei ahau i tenei ra ki a koe, ina mahi hoki i te mea e tika ana i te tirohanga a Ihowa a tou Atua.