Deuteronomy Chapter 20 - Paipera Tapu 1868 | Te Paipera Tapu 1868

Deuteronomy Chapter 20 - Paipera Tapu 1868

1
E haere koe ki te whawhai ki ou hoa riri, a ka kite i nga hoiho me nga hariata, me te iwi e nui ana i a koe, kei wehi koe i a ratou; kei a koe hoki a Ihowa tou Atua i kawea mai ai koe i te whenua o Ihipa.
2
A ka whakatata koutou ki te whawhai, na, ka haere mai te tohunga, a ka korero ki te iwi,
3
Ka mea ki a ratou, Whakarongo, e Iharaira, e whakatata atu ana koutou aianei ki te whawhai ki o koutou hoa riri: kei hopī o koutou ngakau, kei wehi, kaua hoki e potatutatu, kaua ano hoki e pawera i to ratou aroaro;
4
Ko Ihowa hoki ko to koutou Atua e haere tahi ana i a koutou, mana ta koutou whawhai ki o koutou hoa riri, mana koutou e whakaora.
5
Me korero ano hoki nga kai whakahauhau ki te iwi, me ki atu, Tenei ranei tetahi tangata kua hangā e ia tetahi whare hou, a kahore ano i taia tona kawa? haere, hoki atu ki tou whare, kei mate ki te whawhaitanga, a he tangata ano mana e ta tona kawa.
6
Tenei ranei tetahi tangata kua whakatokia e ia he mara waina, a kahore ano i kainga nga hua? haere, hoki atu ki tou whare; kei mate ki te whawhaitanga, a he tangata ano mana e kai.
7
Tenei ranei tetahi tangata kua oti tetahi wahine te taumau mana, a kahore ano i tangohia mai e ia? haere, hoki atu ki tou whare; kei mate ki te whawhaitanga, a he tangata ano mana ia e tango.
8
A me korero ano nga kai whakahauhau ki te iwi, me ki atu, Tenei ranei tetahi tangata e wehi ana, e hopī ana te ngakau? haere, hoki atu ki tou whare; kei ngohe hoki nga ngakau o ona teina, kei rite ki tona ngakau.
9
A ka mutu te korero a nga kai whakahauhau ki te iwi, na me whakarite e ratou etahi rangatira ope hei upoko mo to iwi.
10
Ka whakatata atu koe ki te tatau ki tetahi pa, na, me karanga atu e koe te rangimarietanga ki reira.
11
A ki te mea he rangimarietanga tana e whakahoki mai ai ki a koe, a ka whakapuaretia ki a koe, katahi ka waiho nga tangata katoa e kitea e koe ki reira hei kai homai takoha ki a koe, a hei apa ratou mau.
12
Ko tenei, e kore e mau ta reira rongo ki a koe, a ka anga ki te whawhai ki a koe, katahi ka whakapaea e koe:
13
A ka hoatu e Ihowa e tou Atua ki ou ringa, na me patu e koe nga tane katoa o reira ki te mata o te hoari.
14
Ko nga wahine ia me nga tamariki, nga kararehe, me nga mea katoa i roto i te pa, nga taonga katoa o reira, me tango e koe mau; a ka pau i a koe nga mea a ou hoa riri, e hoatu ana e Ihowa e tou Atua ki a koe.
15
Ko tenei tau e mea ai ki nga pa katoa e mamao rawa atu ana i a koe, ehara nei i te pa no enei iwi.
16
Ko nga pa ia o enei iwi, e hoatu nei e Ihowa e tou Atua ki a koe hei kāinga tupu, kaua e whakaorangia tetahi mea e whai manawa ana:
17
Engari me whakangaro rawa ratou e koe, nga Hiti, nga Amori, nga Kanaani, nga Perihi, nga Hiwi, nga Iepuhi, kia rite ki ta Ihowa ki ta tou Atua i whakahau ai ki a koe:
18
Kei whakaakona koutou e ratou ki te mahi i a ratou mahi whakarihariha katoa e mahia nei e ratou ki o ratou atua; a ka hara koutou ki a Ihowa ki to koutou Atua.
19
E maha nga ra e whakapaea ai e koe he pa, e tauria ai kia horo, kei kore i a koe nga rakau o reira, kei akina atu ki te toki: no te mea hei kai ena mau; kaua ano hoki e tuakina, (he oranga hoki mo te tangata te rakau o te parae,) hei mea mau mo te whakapaenga:
20
Ko nga rakau ia e mohio ai koe ehara i te rakau kai, ka kore ano ena i a koe, ka tuakina hoki; a ka hangā he taiepa whakapae mo te pa e whawhai ana ki a koe, a, horo noa.