- 1
- Kia mahara ra ki tou Kai hanga i nga ra o to tamarikitanga, i te mea kahore ano kia tae noa mai nga ra o te kino, a kahore ano kia tata mai nga tau e ki ai koe, Kahore aku ahuareka ki enei tau;
- 2
- I te mea kahore ano kia pouri noa te ra, te māramatanga, te marama, me nga whetu, a kahore ano kia hoki mai nga kapua i muri i te ua:
- 3
- I te ra e wiri ai nga kai tiaki o te whare, a ka piko iho nga tangata marohirohi, ka mutu ano hoki ta nga kai huri, no te mea he torutoru ratou, ka pouri ano hoki nga mea e titiro mai nei i nga matapihi,
- 4
- I te mea ano ka tutakina nga tatau i nga huarahi, a ka iti iho te haruru o te huri, ka ara ia i te tangi o te manu, ka whakahokia iho ano hoki ki raro nga kotiro katoa o te waiata;
- 5
- Mataku noa iho ano hoki ratou i te mea tiketike, he wehi ano kei te huarahi, ka tupu ano te aramona, ka taimaha ano hoki te mawhitiwhiti, ka iti haere te hiahia; ka haere nei hoki te tangata ki tona whare tūturu; a ka haereere nga kai tangi i nga huarahi.
- 6
- I te mea kahore ano kia mawheto noa te aho hiriwa, a ka pakaru te oko koura, ka pakaru ano hoki te hāka ki te puna, ka pakaru ano te wīra ki te poka wai.
- 7
- Na, hoki ana te puehu ki te whenua, ki te pera ano me ia i mua, a hoki ana ano te wairua ki te Atua nana nei i homai.
- 8
- He horihori, he tino horihori, e ai ta te kai kauwhau; he horihori te katoa.
- 9
- Na, no te mea he mea whakaaro nui te kai kauwhau, koia i whakaakona ai ano hoki e ia te iwi ki te matauranga; tana hoki he whakaaro marie, he rapu, he ata whakatakoto i nga whakatauki maha.
- 10
- I whai te kai kauwhau kia kitea nga kupu ahuareka: he mea tika ano te mea i tuhituhia, he kupu pono.
- 11
- Nga kupu a te hunga whakaaro nui koia ano kei nga werowero, kei nga whao i titia e nga kai huihui, he mea i homai e te hepara kotahi.
- 12
- Kia ai ano hoki enei hei whakatupato i a koe, e taku tamaiti; te tuhituhi i nga pukapuka maha kahore he mutunga; te korerotanga nui ano hoki he hanga whakamauiui i te kikokiko.
- 13
- Kia whakarongo atu tatou ki te whakamutunga o te mea katoa: E wehi ki te Atua, puritia ana whakahaunga: ko nga mea katoa hoki tenei ma te tangata.
- 14
- No te mea ka whakawakia nga mahi katoa e te Atua, te mea huna ano hoki, ahakoa pai, ahakoa kino.
Address: 
Phone: 
Email: