- 1
- Na Paora, na te apotoro a Ihu Karaiti, ta te Atua hoki i pai ai, ki te hunga tapu e noho ana i Epeha, ara ki te hunga whakapono i roto i a Karaiti Ihu:
- 2
- Kia tau ki a koutou te aroha noa, me te rangimarie, he mea na te Atua na to tatou Matua, na te Ariki hoki na Ihu Karaiti.
- 3
- Kia whakapaingia te Atua te Matua o to tatou Ariki o Ihu Karaiti, nana nei tatou i manaaki ki nga manaakitanga katoa a te wairua ki nga mea o te rangi i roto i a te Karaiti;
- 4
- I runga i te tikanga i whiriwhiria ai tatou e ia i roto i a ia, i mua o te orokohanganga o te ao, hei hunga tapu kahore hoki he koha i tona aroaro i runga i te aroha.
- 5
- He mea whakarite hoki tatou nāna i mua, kia meinga hei tamariki māna, he mea na Ihu Karaiti, ta tona whakaaro hoki i pai ai,
- 6
- Hei whakamoemititanga mo te kororia o tona aroha noa, i atawhaitia ai tatou i roto i tana i aroha ai.
- 7
- Kei roto nei i a ia to tatou whakaoranga i runga i ona toto, ara, te murunga o nga hē; he hua hoki no tona aroha noa.
- 8
- I hira rawa nei ki a tatou, i runga i nga whakaaro nui i nga whakaaro mohio katoa;
- 9
- A whakakitea mai ana e ia ki a tatou tana pai i ngaro ra, tana hoki i ahuareka ai, tana i whakatakoto ai i mua i roto ano i a ia:
- 10
- Mo te tikanga ina rite nga wa, kia huihuia nga mea katoa i roto i a te Karaiti, nga mea i to rangi, me nga mea i te whenua; i roto ano i a ia:
- 11
- I whakawhiwhia nei hoki matou i roto i a ia, he mea whakarite i mua, he pera me tana i whakatakoto ai, e mahia ana hoki e ia nga mea katoa, i runga i ta tona whakaaro i pai ai:
- 12
- Kia ai matou hei whakamoemititanga mo tona kororia, ara matou te hunga kua tumanako wawe ki a te Karaiti.
- 13
- Me koutou hoki tumanako ana koutou ki a ia, i to koutou rongonga ai ki te kupu o te pono, ki te rongo pai o to koutou oranga: a, to koutou whakaponotanga ki a ia, na, hiritia ana koutou te Wairua Tapu i korerotia mai i mua:
- 14
- Ko ia nei te wahi tuatahi o nga taonga mo tatou, kia whakaorangia ra ano te mea i hokona, hei whakamoemititanga mo tona kororia.
- 15
- Na konei ahau i taku rongonga ai ki to koutou whakapono ki te Ariki ki a Ihu, ki te aroha ano hoki ki te hunga tapu katoa,
- 16
- Kahore e mutu taku whakawhetai mo koutou, i a au e mahara nei ki a koutou i aku inoinga;
- 17
- Kia hoatu ki a koutou e te Atua o to tatou Ariki o Ihu Karaiti, e te Matua o te kororia, te wairua o te whakaaro nui, o te whakakitenga i te mea ka mohio nei ki a ia:
- 18
- Kia whakamaramatia nga kanohi o to koutou hinengaro; kia mātau ai koutou ki te mea o tana karanga e tumanakohia atu nei, ki te kororia nui hoki o tona taonga i roto i te hunga tapu,
- 19
- Ki te nui whakaharahara hoki o tona kaha ki a tatou ki te hunga e whakapono nei, ara, te mahinga a te mana o tona kaha,
- 20
- I mahi ai ia i roto i a te Karaiti i tana whakaarahanga i a ia i te mate, a whakanohoia ana ia ki tona ringa matau ki nga wahi i te rangi,
- 21
- Ki runga ake i nga kawanatanga katoa, i te mana, i te kaha, i te rangatiratanga, i nga ingoa katoa hoki e karangatia ana, ehara i te mea ko o tenei ao anake, ko o tera ao ano hoki
- 22
- A tukua ana e ia nga mea katoa ki raro ki ona waewae, a meinga ana ia hei upoko i runga i nga mea katoa mo te hahi,
- 23
- Ko tona tinana nei ia, ki tonu i a ia ko ia nei te kai whakaki o nga mea katoa i roto i te katoa.
Address: 
Phone: 
Email: