- 1
- I mua ano hoki he tupapaku koutou i nga hē i nga hara;
- 2
- I runga hoki koutou i era i mua e haereere ana, ko ta tenei ao tikanga hoki, ko ta te rangatira o te kaha o nga kapua, o te wairua e mahi nei inaianei i roto nga tamariki a te tutū.
- 3
- Ko nga hoa hoki era i mua o tatou katoa i a tatou e noho ana i runga i nga hiahia o to tatou kikokiko, e mahi ana i nga mea e paingia ana e te kikokiko e nga whakaaro; i to tatou maoritanga ano hoki he tamariki tatou na te riri, he pera ano me era atu.
- 4
- Ko ta te Atua ia tenei, ranea rawa hoki tana mahi tohu, nui atu tona aroha i arohaina mai ai tatou e ia,
- 5
- Na, i te mea he tupapaku tatou i nga hē, whakaorangia ngatahitia ana tatou e ia me te Karaiti, (he aroha noa i whakaorangia ai koutou;)
- 6
- A whakaarahia ngatahitia ana e ia, whakanohoia ngatahitia ana ki nga wahi o te rangi i roto i a Karaiti Ihu:
- 7
- Kia whakakitea ai e ia i nga wa e haere ake nei te nui whakaharahara o tona aroha noa, i a ia ka ngawari mai nei ki a tatou i roto i a Karaiti Ihu.
- 8
- Na te aroha noa hoki koutou i whakaorangia ai i runga i te whakapono; ehara ano hoki tenei i te mea na koutou: he mea homai noa na te Atua:
- 9
- Ehara i nga mahi, kei whakamanamana te tangata.
- 10
- He mahinga hoki tatou nāna, he mea hanga i roto i a Karaiti Ihu mo nga mahi pai, i whakaritea e te Atua i mua hei haereerenga ma tatou.
- 11
- Na, kia mahara koutou he tauiwi koutou i mua no te wahi ki te kikokiko, a e kiia ana ko te kotinga kore e tenei e kiia nei ko te kotinga, ara to te kikokiko, he mea na te ringaringa;
- 12
- I taua wa he mea motu ke atu koutou i a te Karaiti, ehara i te tangata whenua no Iharaira, he tangata ke ki nga kawenata o te mea i whakaaria mai i mua, kahore he tumanakotanga atu, he hunga Atua-kore i te ao:
- 13
- Tena ko tenei i roto i a Karaiti Ihu ko koutou, ko te hunga i tawhiti i mua, kua meinga e nga toto o te Karaiti kia tata.
- 14
- Ko ia hoki to tatou rangimarie, nāna hoki i mea nga mea e rua kia kotahi, a whakahoroa iho e ia te paatu e arai ana i waenga;
- 15
- Whakakahoretia ana hoki e ia ki tona kikokiko te mauahara, ara, te ture i nga kupu ako, i nga tikanga; kia hangā ai i roto i a ia te tokorua hei kotahi, hei tangata hou, a mau ake te rongo i a ia;
- 16
- Kia houhia ai ano hoki e ia te rongo a te tokorua ki te Atua i roto i te tinana kotahi, he meatanga na te ripeka, ko tana mea hoki ia hei whakamate mo te mauahara:
- 17
- A haere mai ana ia, kauwhau ana i te rangimarie ki a koutou i tawhiti, ki a matou hoki e tata ana.
- 18
- Nāna hoki tatou, te tokorua nei, i whai tatanga atu ai i roto i te Wairua kotahi ki te Matua.
- 19
- Na, i muri nei ehara koutou i te tangata ke i te manene, engari he tangata whenua koutou tahi ko te hunga tapu, no te whare ano hoki o te Atua;
- 20
- He mea hanga ki runga ki te turanga a nga apotoro ratou ko nga poropiti, ko Ihu Karaiti ano hei tino kamaka mo te kokonga;
- 21
- Kei roto nei i a ia te whare katoa, he mea ata hono marie, e neke ake ana hei whare tapu i roto i te Ariki:
- 22
- Me koutou ano e hangā tahitia ana i roto i a ia, hei nohoanga mo te Atua, he mea na te Wairua.
Address: 
Phone: 
Email: