- 1
- Na konei taku ta Paora, he herehere nei au na Karaiti Ihu, hei mahi ki a koutou ki nga tauiwi;
- 2
- Kua rongo pea koutou ki te tikanga mo te aroha noa o te Atua, kua homai nei ki a au hei mea ki a koutou:
- 3
- Ara tana whakakitenga mai tana whakaaturanga mai i te mea ngaro ki a au; (he pera hoki me ena kupu torutoru i tuhituhia na e au i mua;
- 4
- A ka oti i a koutou tena te korero, ka mohio koutou ki taku matauranga ki te mea ngaro a te Karaiti;)
- 5
- I era whakatupuranga kihai tenei i whakakitea ki nga tamariki a te tangata, kihai i penei me te whakakitenga inaianei e te Wairua ki ana apotoro tapu ratou ko nga poropiti;
- 6
- Ara mo nga tauiwi kia uru tahi ki nga taonga, ka whakakotahitia te tinana, ka whiwhi ngatahi ki ana mea i whakaaria i mua i roto i a te Karaiti, he meatanga na te rongo pai:
- 7
- I meinga nei ano ahau hei minita mo taua rongo pai, i runga i ta te aroha noa o te Atua, i homai noa nei ki a au he mahinga na tona kaha.
- 8
- I homai ano tenei aroha noa ki a au ki te iti rawa o te hunga tapu katoa, kia kauwhautia e ahau i roto i nga tauiwi te taonga o te Karaiti e kore nei e taea te rapu;
- 9
- Kia whakakitea ano hoki e ahau ki nga tāngata katoa te whiwhinga tahitanga ki te mea ngaro, ki te mea i hunā nei i era wa noa atu i roto i te Atua, nāna nei ta te Karaiti hanganga i nga mea katoa:
- 10
- Kia kitea ai ki te hahi inaianei e nga rangatiratanga e nga mana i nga wahi o te rangi, te maha o nga whakaaro nui o te Atua;
- 11
- Ana hoki i whakatakoto ai i mua noa atu, he mea mahi nāna i roto i to tatou Ariki i a Karaiti Ihu:
- 12
- Kei roto nei i a ia to tatou maiatanga me to tatou whakatatanga atu i te mea e u nei te whakaaro, he meatanga na te whakapono ki a ia.
- 13
- Koia ahau ka mea atu nei kia kaua koutou e ngakau-kore i oku tukinotanga mo koutou; ko to koutou kororia hoki tenei.
- 14
- Na konei i tuturu ai oku turi ki te Matua o to tatou Ariki o Ihu Karaiti,
- 15
- Nona nei te ingoa e huaina ana ki nga hapu katoa i te rangi i te whenua,
- 16
- Kia rite tana ki tona kororia e nui rawa nei, kia hoatu e ia ki a koutou kia meinga to roto tangata e tona Wairua kia marohirohi i te kaha;
- 17
- Kia noho a te Karaiti ki roto ki o koutou ngakau he mea whakapono; me te whai pakiaka me te whai turanga ano koutou i runga i te aroha,
- 18
- Kia uru ai koutou ki ta te hunga tapu katoa, ara, kia taea e te whakaaro te whanui, te roa, te hohonu, te tiketike;
- 19
- Kia mohio ano hoki ki te aroha o te Karaiti e kore nei e taea te mohio; kia tino kī rawa ai koutou i te Atua.
- 20
- Na, e kaha nei ia ki te mea i nga mea nui whakaharahara, nui noa atu i nga mea katoa e inoi ai e whakaaro ai tatou, he penei ano me te kaha e mahi nei i roto i a tatou,
- 21
- Waiho atu i a ia te kororia i roto i te hahi i runga i a Karaiti Ihu, a, nga whakapaparanga katoa, ake ake ake. Amine.
Address: 
Phone: 
Email: