- 1
- Koia ahau, ta te Ariki herehere, ka whakahau atu nei i a koutou kia rite ta koutou haere, ki te karangatanga i karangatia ai koutou,
- 2
- Kia papaku rawa te ngakau, kia māhaki, kia manawanui, kia ata hanga tetahi ki tetahi i runga i te aroha;
- 3
- Me whai kia mau te kotahitanga o te Wairua, he mea paihere na te rangimarie.
- 4
- Kotahi tonu te tinana, kotahi te Wairua, pera hoki me to koutou karangatanga, kotahi tonu te mea o to koutou karangatanga hei tumanakotanga atu;
- 5
- Kotahi Ariki, kotahi whakapono, kotahi iriiringa,
- 6
- Kotahi Atua, ko te Matua o nga mea katoa, kei runga nei ia i nga mea katoa, puta noa ia i nga mea katoa, kei roto hoki i a koutou katoa.
- 7
- Na, kua oti te aroha noa te homai ki tenei ki tenei o tatou, i runga i te mehua o ta te Karaiti homaitanga.
- 8
- Na reira hoki ia i mea ai, Tona kakenga atu ki runga, whakaraua ana e ia nga whakarau, a hoatu mea ana ia ma nga tāngata.
- 9
- (Na, tona kakenga ki runga ra, he aha to tena ki te kahore ia i mātua heke atu ki nga wahi o raro rawa o te whenua?
- 10
- Tera i heke atu ra, ko ia ano i kake atu nei ki runga ake i nga rangi katoa, kia kī ai nga mea katoa i a ia.)
- 11
- A homai ana e ia ko etahi, hei apotoro; ko etahi, hei poropiti; ko etahi, hei kai kauwhau i te rongo pai; ko etahi, hei hepara, hei kai whakaako;
- 12
- Kia tino rite ai te hunga tapu, he mea mo te mahi minita, hei hanga i te whare, ara, i te tinana o te Karaiti:
- 13
- Kia tae katoa ra ano tatou ki te kotahitanga o te whakapono, o te matauranga hoki ki te Tama a te Atua, ki te tino tangata, ki te mehua o te tino kaumatuatanga e tutuki ai ki to te Karaiti:
- 14
- Kia mutu ai to tatou tamarikitanga, kei akina kei kahakihakina e nga hau katoa o te whakaako, he maminga na te tangata, he tinihanga e mahia ai te whakapohehe;
- 15
- Kia korero pono i runga i te aroha, kia neke ake tatou ki roto ki a ia i nga mea katoa, ko te upoko nei ia ko te Karaiti:
- 16
- Nona nei te tinana katoa, he mea whakapiri marie, he mea ata hono e nga meatanga a nga hononga katoa, whakarite rawa ki te nui o te mahinga o ia wahi o ia wahi, e mea ana i te tinana kia neke ake, hei whare e hanga ana i a ia i runga i te aroha.
- 17
- Na, ko taku tenei e ki nei, e whakaatu nei i roto i te Ariki, kia kāti ta koutou haere pera me era atu tauiwi, e haere nei i runga i te tekanga noatanga o to ratou hinengaro,
- 18
- Kua oti nei te whakapouri o ratou whakaaro, kua tangata ketia ki to te Atua oranga, i te kuaretanga i roto i a ratou, he pakeke hoki no o ratou ngakau:
- 19
- Kahore o ratou ohoohonga, a tukua ana ratou e ratou ano ki te hiahia taikaha; riro pu ratou ki te mahi i nga mea poke katoa.
- 20
- Ko koutou ia kihai i pera ta koutou ako i a te Karaiti;
- 21
- Ki te mea kua rongo koutou ki a ia, a kua whakaakona e ia ki nga mea e rite ana ki te pono i roto i a Ihu:
- 22
- Mo te tangata tawhito i to mua whakahaere kia whakarerea e koutou; he mea pirau nei hoki ia i runga i nga hiahia tinihanga;
- 23
- Kia whakahoutia hoki koutou, ara, te wairua o to koutou hinengaro;
- 24
- Kia kakahuria iho hoki ki a koutou te tangata hou, no ta te Atua nei te hanganga i runga i te tika i te tapu o te pono.
- 25
- Na, whakarerea atu te teka; kia pono te korero ki tona hoa ki tona hoa: he wahi hoki tatou tetahi no tetahi.
- 26
- Kia riri, a kaua e hara: kei toene te ra ki ta koutou riri:
- 27
- Kaua hoki tetahi wahi e tukua ki te rewera.
- 28
- Te tangata tahae, me whakamutu tana tahae: engari me mahi, ko ona ringaringa ano hei mahi i te mea pai, kia whai rawa ai ia hei hoatutanga mana ki te rawa-kore.
- 29
- Kei puta tetahi kupu kino i o koutou mangai, engari hei te mea e pai ana hei hanga i te whare, kia whiwhi ai ki te pai nga tāngata e rongo ana.
- 30
- Kaua hoki e whakapouritia te Wairua Tapu o te Atua, nana nei koutou i hiri mo te ra o te whakaoranga.
- 31
- Kia wehea rawatia atu i roto i a koutou te nanakia, te riri, te aritarita, te ngangau, te korero kino, me te mauahara katoa:
- 32
- Kia ngawari ta koutou tikanga tetahi ki tetahi, kia pai te ngakau, me te hohou noa iho i te rongo tetahi ki tetahi, kia pera ano me te Atua i hohou nei i te rongo ki a koutou i roto i a te Karaiti.
Address: 
Phone: 
Email: