- 1
- Na, kia rite ta koutou ki ta te Atua, kia pera ano me nga tamariki e arohaina ana;
- 2
- Haere hoki i runga i te aroha, kia pera ano me te Karaiti i aroha ki a tatou, a homai ana i a ia ano mo tatou hei whakahere, hei patunga tapu ki te Atua, hei kakara pai.
- 3
- Te puremu ia, me nga mahi poke katoa, me te apo, kaua ena e whakahuatia i roto i a koutou, kia rite ki ta te hunga tapu tikanga;
- 4
- Kaua ano hoki te mea whakama, te korero wairangi, te korero maminga, kahore nei i tika, erangi ia te whakawhetai.
- 5
- E mātau ana hoki koutou ki tenei, e kore tetahi tangata puremu, poke ranei, apo ranei, he kai karakia nei hoki ia ki te whakapakoko, e whai wahi ki te rangatiratanga o te Karaiti, ara o te Atua.
- 6
- Kei tinihangatia koutou e te tangata ki nga kupu tekateka noa: na enei mea hoki te riri a te Atua e puta nei ki nga tamariki a te tutū.
- 7
- Na, kaua koutou e uru ki ta ratou.
- 8
- He pouri hoki koutou i mua, tena ko tenei he mārama i roto i te Ariki: kia rite to koutou haere ki to nga tamariki o te mārama:
- 9
- Kei runga hoki te hua o te Wairua i te pai katoa i te tika i te pono;
- 10
- Me whakamatau ano e koutou ta te Ariki e pai ai.
- 11
- Kei uru ano hoki ki nga mahi hua kore o te pouri, engari ano whakahengia iho.
- 12
- He mea whakama hoki te whakahua kau i nga mea ngaro e meinga nei e ratou.
- 13
- Na, nga mea katoa e whakahengia ana ma te māramatanga e whakakite: he māramatanga hoki nga mea katoa e whakakite ana.
- 14
- Koia hoki tana kupu nei, Maranga, e tenei e moe nei, ara ake i te mate, a ma te Karaiti koe e whakamarama.
- 15
- Na, kia mahara ki to koutou haere kia tupato, kei rite ki ta nga whakaaro-kore, engari ki ta nga whakaaro nui;
- 16
- Hokona te taima ma koutou, he kino hoki nga ra.
- 17
- Mo konei ra kei whakaaro-kore koutou, engari kia mātau ki ta te Ariki e pai ai.
- 18
- Kaua hoki e haurangi i te waina, he toreretanga hoki tena ki te hē; engari kia kī koutou i te Wairua;
- 19
- Ta koutou korero ki a koutou ano, hei te waiata tapu, hei te himene, hei te waiata wairua; waiata, himene atu, i roto i o koutou ngakau ki te Ariki;
- 20
- Me te whakawhetai atu ki te Atua, ara ki te Matua, i nga wa katoa, mo nga mea katoa, i runga i te ingoa o to tatou Ariki o Ihu Karaiti;
- 21
- Kia ngohengohe koutou tetahi ki tetahi i runga i te wehi ki te Atua.
- 22
- E nga wahine, kia ngohengohe ki a koutou tāne ake, hei mea ki te Ariki.
- 23
- No te mea hoki ko te tāne te upoko o te wahine, e rite ana hoki ki a te Karaiti, ko te upoko ia o te hahi: ko te kai whakaora ano ia o te tinana.
- 24
- Na, e ngohengohe ana te hahi ki ta te Karaiti, kia pera ano hoki nga wāhine ki a ratou tāne ake i nga mea katoa.
- 25
- E nga tāne, arohaina a koutou wāhine, kia pera hoki me te Karaiti i aroha nei ki te hahi, a hoatu ana i a ia ano mo taua hahi;
- 26
- Hei hahi e whakatapua e ia, mā rawa i a ia i te horoinga ki te wai, he mea na te kupu,
- 27
- Hei hahi e tapaea atu e ia ki a ia ano, kororia rawa, tē whai ira, korukoru, tetahi atu mea pera ranei, engari kia tapu kia koha kore.
- 28
- Me aroha e nga tāne a ratou wāhine me te mea ko o ratou tinana ake ano. Te tangata e aroha ana ki tana wahine ake, e aroha ana ki a ia ake ano.
- 29
- Kahore hoki tetahi kia kino noa ki tona kikokiko ake; engari e atawhai ana, e whakaahuru ana, e pera tonu ana me ta te Ariki ki te hahi:
- 30
- He wahi hoki tatou no tona tinana, ara, no tona kikokiko, no ona wheua.
- 31
- Mo konei ra ka whakarerea ai e te tangata tona pāpā tona whaea, a ka piri ki tana wahine, a ko raua tokorua hei kikokiko kotahi.
- 32
- He nui tenei mea ngaro; otiia mo te Karaiti raua ko te hahi taku korero.
- 33
- Na kia rite ki tona aroha ki a ia ake ano to koutou aroha to tenei to tenei ki tana wahine ki tana wahine; me te wahine ano hoki, kia hopohopo ia ki tana tane.
Address: 
Phone: 
Email: