- 1
- E nga tamariki, kia ngohengohe ki o koutou mātua i roto i te Ariki: ko te mea tika hoki tenei.
- 2
- Whakahonoretia tou pāpā me tou whaea; ko te ture tuatahi tenei i runga i te kupu whakaari;
- 3
- Kia hua ai te pai ki a koe, kia roa ai hoki tou noho i te whenua.
- 4
- Me nga mātua hoki, kei whakapataritari koutou i a koutou tamariki kia riri: engari whakatupuria ake ratou i runga i te whakaakoranga i te whakatupatoranga a te Ariki.
- 5
- E nga pononga, kia ngohengohe ki o koutou rangatira o te wahi ki te kikokiko, me te mea ko te Karaiti, me te mataku me te wiri ano koutou, kia tapatahi ano te ngakau:
- 6
- Kaua hei ta te kanohi mahi, ko ta te whakamanawareka tangata hoki ia; engari hei ta nga pononga a te Karaiti, e mahi a ngakau ana i ta te Atua i pai ai;
- 7
- Kia pai te whakaaro ina mahi, hei mea ki te Ariki, a ehara i te mea ki te tangata:
- 8
- Kia mātau hoki, na, te pai e mea ai te tangata, ka whakawhiwhia mai ano ia ki tenei e te Ariki, ahakoa pononga ahakoa rangatira.
- 9
- E nga rangatira, kia pera ano hoki ta koutou ki a ratou, kāti te whakawehi: kia mātau hoki he Ariki ano to koutou kei te rangi; kahore ano hoki ana whakapai kanohi.
- 10
- Heoi, e aku teina, kia whai kaha koutou i roto i te Ariki, i te mana ano hoki o tona kaha.
- 11
- Kakahuria iho nga mea whawhai katoa a te Atua, kia taea ai e koutou nga mahi tinihanga a te rewera te tu ki te riri.
- 12
- Ehara hoki ta tatou i te pakanga ki nga toto ki te kikokiko, engari ki nga rangatiratanga, ki nga mana, ki nga ariki o te pouri o tenei ao, ki nga wairua kino o nga wahi i te rangi.
- 13
- Mo konei kia mau ki nga mea whawhai katoa a te Atua, kia taea ai e koutou te tu atu ki te riri i te ra kino, a, ka poto i a koutou nga mea katoa te mahi kia tu.
- 14
- E tu ra, he mea whitiki o koutou hope ki te pono, kakahuria iho ano hoki ko te tika hei pukupuku;
- 15
- Herea iho te rongo pai o te rangimarie hei hu mo nga waewae, kia takatu ai;
- 16
- Mo waho i enei mea katoa e mau ki te whakapono hei whakangungu rakau, e taea ai e koutou te tinei nga matia muramura katoa a te wairua kino.
- 17
- E mau hoki ki te ora hei potae, ki te hoari hoki a te Wairua, ara, ki te kupu a te Atua:
- 18
- Kia pau te inoi me te tohe, me inoi i nga wa katoa i roto i te Wairua, kia mataara hoki koutou ki tenei mea nei ano, me te u tonu ki te tohe mo te hunga tapu katoa;
- 19
- Moku ano hoki, kia homai he kupu ki a au, kia maia te puaki o toku mangai, ki te whakaatu i te mea ngaro, ara, i te rongo pai;
- 20
- Ko tana karere nei au i roto i te mekameka; ara kia maia ahau ki taua korero, kia rite taku korero ki te mea i tika.
- 21
- Na, kia mātau ai hoki koutou ki aku mea, ki aku mahi, ma Tikiku e whakaatu nga mea katoa ki a koutou, he teina aroha nei ia, he minita pono i roto i te Ariki:
- 22
- Kua tonoa atu na ia e ahau ki a koutou mo tenei mea nei ano, kia mātau ai koutou ki a matou mea, kia whakamarie ai ano hoki ia i o koutou ngakau.
- 23
- Kia tau ki nga teina te rangimarie, te aroha, me te whakapono, he mea na te Atua Matua, na te Ariki hoki na Ihu Karaiti.
- 24
- Kia tau te aroha noa ki te hunga katoa, e hē-kore ana te aroha ki to tatou Ariki ki a Ihu Karaiti. Amine.
Address: 
Phone: 
Email: