- 1
- A i korero mai a Ihowa ki a Mohi raua ko Arona i te whenua o Ihipa, i mea,
- 2
- Me waiho tenei marama hei timatanga mo nga marama ki a koutou: hei timatanga tenei mo nga marama o to koutou tau.
- 3
- Korero atu korua ki te huihuinga katoa o Iharaira, mea atu, Kei te tekau o nga ra o tenei marama ka tango ai ratou, ia tangata ia tangata, i tetahi reme ma ratou, kia rite ki nga whare o nga mātua, kia tu nga whare i te reme:
- 4
- A ki te tokoouou nga tangata o te whare, ko te reme te nui ana, ma raua ko tona hoa noho tata ki tona whare e tango tetahi, he mea whakarite ki te tokomahatanga o nga tangata; whakaritea te tokomahatanga o nga tangata mo te reme, ki ta tera tangata ki ta tera tangata e kai ai.
- 5
- Kei whai koha ta koutou reme, hei te tane, hei te tau-tahi; tangohia mai i roto i nga hipi, i roto ranei i nga koati:
- 6
- A me tiaki e koutou taea noatia te tekau ma wha o nga ra o tenei marama ano: a ma te whakaminenga katoa o Iharaira rupekerupeke e patu i te ahiahi.
- 7
- A me tango e ratou tetahi wahi o nga toto, ka ta atu ai ki nga pou e rua, ki te korupe hoki o te tatau o nga whare e kainga ai tena mea e ratou.
- 8
- A me kai e ratou te kikokiko i taua po ano, he mea tunu ki te ahi, me nga taro rewena-kore hoki; he puwha kawa hoki ta ratou e kinaki ai ki taua mea.
- 9
- Kaua e kainga te tahi wahi ona e mata ana, kua kohuatia ranei ki te wai, engari kia tunua ki te ahi; ko tona pane, ko ona waewae, me ona whekau.
- 10
- Kaua hoki e whakatoea tetahi wahi ona ki te ata; a te wahi ona i toe ki te ata, tahuna e koutou ki te ahi.
- 11
- A, me penei ta koutou kai i taua mea; kia whitikiria o koutou hope, hei o koutou waewae o koutou hu, ko o koutou tokotoko hoki ki a koutou ringaringa; kia hohoro hoki te kai: ko te kapenga hoki a Ihowa tena.
- 12
- Ta te mea, ka tika atu ahau ra waenganui o te whenua o Ihipa i tenei po, ka patu hoki i nga whanau matamua katoa i te whenua o Ihipa, i te tangata a tae iho ana ki te kararehe; a ka puta aku whakawakanga ki nga atua katoa o Ihipa: ko Ihowa ahau.
- 13
- A, hei tohu mo koutou te toto i nga whare e noho ai koutou; a ka kite ahau i te toto, na ka kape ahau i a koutou, e kore ano hoki te whiu e pa ki a koutou hei whakamate, ina patu ahau i te whenua o Ihipa.
- 14
- A, hei whakamaharatanga mo koutou tenei ra; hei konei koutou tuku ai i te hakari ki a Ihowa, tuku iho ki o koutou whakatupuranga; ko te ture tenei ake nei ake nei, kia hakaritia e koutou tenei ra.
- 15
- E whitu nga ra e kai ai koutou i te taro rewena-kore; kei te ra tuatahi ano ka whakakorea ai te rewena o o koutou whare; ta te mea ki te kai tetahi i te taro rewena i te ra tuatahi, a taea noatia te whitu o nga ra, ka hatepea atu taua tangata i roto i a Iharaira.
- 16
- A hei te ra tuatahi he huihuinga tapu, hei te ra tuawhitu hoki he huihuinga tapu mo koutou; kaua tetahi mahi e mahia i aua ra; heoi ano ko te kai ma tenei tangata ma tenei tangata ta koutou e raweke ai.
- 17
- Kia mau hoki koutou ki te hakari o te taro rewena-kore; no te mea, no tenei rangi pu ano i whakaputaina atu ai e ahau o koutou ropu i te whenua o Ihipa: mo konei, kia mau koutou ki tenei ra, tuku iho ki o koutou whakatupuranga; hei tikanga tenei ake nei ake nei.
- 18
- Kei te marama tuatahi, kei te tahi tekau ma wha o nga ra o te marama, i te ahiahi, ka kai koutou i te taro rewena-kore, a tae noa ki te rua tekau ma tahi o nga ra o te marama, i te ahiahi.
- 19
- Kaua he rewena e kitea i o koutou whare i nga ra e whitu; ta te mea ki te kai tetahi i te mea kua rewenatia, ina, ka hatepea atu taua tangata i roto i te huihui o Iharaira, ahakoa tangata ke, ahakoa tangata whenua ranei.
- 20
- Kaua e kainga tetahi mea kua rewenatia; hei te taro rewena-kore he kai ma koutou i o koutou nohoanga katoa.
- 21
- Na, ka karanga atu a Mohi ki nga kaumatua katoa o Iharaira, a ka mea ki a ratou, Tikina, tangohia mai ma koutou he reme, kia rite ki o koutou hapu ririki, patua hoki te kapenga.
- 22
- A tangohia he paihere hihopa, ka tuku ki te toto i roto i te peihana, na ka taia atu te korupe me nga pou e rua ki te toto i roto i te peihana; kaua hoki tetahi o koutou e puta atu ki waho o te kuwaha o tona whare, a taea noatia te ata.
- 23
- He mea hoki, Ka haere atu a Ihowa ki te patu i nga Ihipiana; a ka kite ia i te toto i te korupe, i nga pou e rua hoki, na ka kapea e Ihowa te kuwaha, e kore hoki e tukua e ia te kai whakamate kia haere ki roto ki o koutou whare patu ai.
- 24
- Kia mau hoki koutou ki tenei mea, hei ture mou, mo o tamariki hoki, ake ake ake.
- 25
- A tenei ake, i te wa e tae ai koutou ki te whenua e homai e Ihowa ki a koutou, ki tana i korero ai, na, kia mau koutou ki tenei mahi.
- 26
- A tenei ake, ki te mea a koutou tamariki ki a koutou, He aha tenei e mahia nei e koutou?
- 27
- Na, ka mea atu koutou, Ko te patunga ra i ta Ihowa kapenga, nana ra i kape nga whare o nga tamariki a Iharaira i Ihipa, i a ia i patu i nga Ihipiana, a whakaorangia ake o matou whare. Na, tuohu ana te iwi, koropiko ana.
- 28
- Na, ka haere nga tamariki a Iharaira, a mea ana i ta Ihowa i whakahau ai ki a Mohi raua ko Arona, pera ana ratou.
- 29
- Nawai-a, ka waenganui po, na, patua ana e Ihowa nga whanau matamua katoa i te whenua o Ihipa, te matamua a Parao e noho ana i runga i tona torona, a tae iho ana ki te matamua a te herehere i roto i te whare herehere; me te whanau matamua katoa ano hoki a te kararehe.
- 30
- A, te marangatanga ake o Parao i te po, ratou ko ana tangata katoa, me nga Ihipiana katoa; na, he nui te tangi i Ihipa; kahore hoki he whare i kore i te tupapaku.
- 31
- Na, ka karanga ia ki a Mohi raua ko Arona i te po, a ka mea, Whakatika, haere atu i roto i toku iwi, koutou ko nga tamariki a Iharaira; haere ki te mahi ki a Ihowa ki te pera me ta koutou i ki ai.
- 32
- Tangohia hoki a koutou hipi, a koutou kau hoki, a koutou i ki ai, a haere; me te manaaki ano hoki i a au.
- 33
- A whakatatutatu atu ana nga Ihipiana ki te iwi, kia tonoa wawetia atu ai ratou i te whenua; i mea hoki ratou, Ka mate katoa tatou.
- 34
- A maua atu ana e te iwi ta ratou paraoa pokepoke, i te mea kahore ano i rewenatia noatia, ko a ratou pokepokenga paraoa i takaia ki roto ki a ratou kakahu, a makā iho ki o ratou pokohiwi.
- 35
- A i whakarite ano nga tamariki a Iharaira i te kupu a Mohi; a tonoa ana e ratou nga mea hiriwa, me nga mea koura, me nga kakahu, i nga Ihipiana:
- 36
- A na Ihowa i mea kia paingia te iwi e nga Ihipiana, a hoatu ana e ratou: a pahuatia ana e ratou nga Ihipiana.
- 37
- Na, ka turia atu e nga tamariki a Iharaira i Ramehehe a, Hukota, tata tonu nga tane ki nga mano e ono rau, he mea haere i raro, hāunga nga tamariki.
- 38
- A he nui hoki te whakauru i haere tahi atu me ratou; me nga hipi hoki, me nga kau, he tini ke te kararehe.
- 39
- A tunua iho e ratou etahi taro rewena-kore i te paraoa pokepoke i maua mai e ratou i Ihipa, kahore hoki i rewenatia; no te mea hoki i peia mai ratou i Ihipa, kihai hoki i ahei te noho iho, kihai hoki ratou i taka i te o mo ratou.
- 40
- Na, te nohoanga o nga tamariki a Iharaira, i noho ra ki Ihipa, e wha rau e toru tekau nga tau.
- 41
- A i te mutunga iho o nga tau e wha rau e toru tekau, i taua ra pu ano, na, ka puta mai nga mano katoa o Ihowa i te whenua o Ihipa.
- 42
- He po maharatanga nui tena ki a Ihowa, mo to ratou whakaputanga mai i te whenua o Ihipa: ko taua po tenei o Ihowa hei maharatanga ma nga tamariki katoa a Iharaira, tuku iho ki o ratou whakatupuranga.
- 43
- A i mea mai ano a Ihowa ki a Mohi raua ko Arona, Ko te tikanga tenei mo te kapenga: Kaua tetahi tangata ke e kai i tena mea;
- 44
- Engari nga pononga katoa a te tangata i utua ki te moni, kia oti te kokoti e koe, ka kai ai i tena mea.
- 45
- Kaua te manene, te kai mahi ranei, e kai i tena mea.
- 46
- Kia kotahi ano te whare e kainga ai; kaua e mauria e koe tetahi wahi o te kikokiko ki waho i te whare; kaua ano hoki e whatiia tetahi wheua ona.
- 47
- Ma te huihuinga katoa o Iharaira tena mahi.
- 48
- Na, ki te mea e noho ana tetahi tangata ke ki a koe, a e mea ana ki te whakarite i te kapenga a Ihowa, kotia ana tane katoa, ka whakatata mai ai ia ki tena mahi; a ka rite ia ki te tangata whenua: kaua hoki tetahi tangata kihai i kotia e kai i tena mea.
- 49
- Kia kotahi ano te ture mo te tangata whenua, raua ko te tangata ke e noho ana i roto i a koutou.
- 50
- A pera ana nga tamariki katoa a Iharaira; me ta Ihowa i ako ai ki a Mohi raua ko Arona, pera ana ratou.
- 51
- Heoi, no taua ra pu ano i whakaputaina mai ai e Ihowa nga tamariki a Iharaira i te whenua o Ihipa, tenei ropu tenei ropu o ratou.
Address: 
Phone: 
Email: