Exodus Chapter 13 - Paipera Tapu 1868 | Te Paipera Tapu 1868

Exodus Chapter 13 - Paipera Tapu 1868

1
A i korero mai a Ihowa ki a Mohi, i mea,
2
Whakatapua moku nga mea matamua katoa; ko nga mea katoa a nga tamariki a Iharaira, e oroko-puta mai ana i te kopu, ko a te tangata, ko a te kararehe, maku.
3
A i mea atu a Mohi ki te iwi, Kia mahara ki tenei ra i haere atu ai koutou i Ihipa, i te whare pononga; he kaha hoki te ringaringa i whakaputaina atu ai koutou e Ihowa i konei: kaua hoki te taro rewena e kainga.
4
Ko te ra tenei i haere atu ai koutou, ko Apipi te marama.
5
A tenei ake, i te wa e kawea ai koe e Ihowa ki te whenua o nga Kanaani, o nga Hiti, o nga Amori, o nga Hiwi, o nga Iepuhi, i oati ai ia ki ou mātua ka hoatu ki a koe, he whenua e rerengia ana e te waiu e te honi, ko reira koe mahi ai i tenei mea, i tenei marama ano.
6
E whitu nga ra e kai ai koe i te taro rewena-kore, a hei te ra whitu te hakari a Ihowa.
7
E whitu nga ra e kainga ai te taro rewena-kore: aua hoki te taro rewena e kitea ki a koe; aua ano e kitea ki a koe he rewena puta noa i o rohe katoa.
8
A mau e korero atu ki to tamaiti i taua ra, e mea, Mo ta Ihowa i mea ai ki a au tenei, i taku haerenga mai i Ihipa.
9
A hei tohu tena mea ki a koe i tou ringaringa, hei whakamahara hoki ki waenganui i ou kanohi; kia mau ai te ture a Ihowa i roto i tou waha: he kaha hoki te ringa i whakaputaina atu ai koe e Ihowa i Ihipa.
10
Mo reira kia mau ki tenei tikanga i tona wa ano i whakaritea ai, i tenei tau i tenei tau.
11
A tenei ake, i te wa e kawea ai koe e Ihowa ki te whenua o nga Kanaani, ki tana i oati ai ki a koutou ko ou mātua, a ka hoatu a reira e ia ki a koe,
12
Ko reira wehea ai e koe ma Ihowa nga mea katoa e orokoputa mai ana i te kopu, me nga whanau matamua katoa o au kararehe, ko nga tane ma Ihowa.
13
Otiia, me utu e koe ki te reme nga mea matamua katoa a te kaihe; a ki te kahore e utua e koe, whatiia tona kaki: ko nga matamua katoa hoki a te tangata, i roto i o tamariki, me utu e koe.
14
A tenei ake, ki te ui mai to tamaiti ki a koe a mua, ki te mea mai, He aha tenei? katahi koe ka mea atu ki a ia, He kaha te ringa i whakaputaina mai ai matou e Ihowa i Ihipa, i te whare pononga:
15
A i te mea ka tumaro a Parao, a kihai matou i tukua kia haere, na, patua iho e Ihowa nga matamua katoa o te whenua o Ihipa, te matamua a te tangata, te matamua ano hoki a te kararehe: no reira i patua ai e ahau ma Ihowa nga mea katoa e oroko-puta mai ana i te kopu, nga tane; ko nga matamua katoa ia a aku tamariki e utua ana e ahau.
16
A hei tohu ki tou ringa tena mea, hei pare ki waenganui i ou kanohi: he kaha hoki te ringaringa i whakaputaina mai ai matou e Ihowa i Ihipa.
17
A te tukunga atu o te iwi e Parao kia haere, kihai a Ihowa i arahi i a ratou na te huarahi i te whenua o nga Pirihitini, ahakoa tata; i mea hoki te Atua, Kei awangawanga te iwi, ua kite ratou i te pakanga, a ka hoki ki Ihipa:
18
Engari i arahina awhiotia te iwi e te Atua na te huarahi i te koraha o te Moana Whero: a haere topuni atu ana nga tamariki a Iharaira i te whenua o Ihipa.
19
A i maua atu ano e Mohi nga wheua o Hohepa; nana hoki i whakaoati marie nga tamariki a Iharaira, i mea, Ka tikina mai koutou, ka ata tirohia e te Atua; a ma koutou e mau atu oku wheua i konei.
20
A ka turia atu e ratou i Hukota, a noho rawa atu i Etama, i te pito o te koraha.
21
A haere atu ana a Ihowa i mua i a ratou, i te pou kapua i te awatea, hei arahi i a ratou i te huarahi; a i te pou kapura i te po, hei whakamarama i a ratou; kia haere ai ratou i te ao i te po.
22
Kihai i tangohia e ia te pou kapua i te aroaro o te iwi i te awatea, me te pou kapura hoki i te po.