- 1
- Kei puaki i a koe te korero tito noa: kei totoro tahi tou ringa me te tangata kino, kei meinga hei kai whakaatu teka.
- 2
- Kei whai tahi me te tokomaha ki te kino; kaua ano hoki e hamumu i te totohenga, hei mea kia riro ai i ta te tokomaha, hei whakapeau-ke i te tika:
- 3
- Kaua ano hoki e whakanuia te rawa-kore, ina totohe ia.
- 4
- Ki te tutaki koe ki te kau a tou hoa riri, ki tana kaihe ranei, e atiti noa atu ana, me ata whakahoki mai e koe ki a ia.
- 5
- Ki te kite koe i te kaihe a tou hoa riri e takoto ana i raro i tana pikaunga, a ka ngakau-kore koe ki te whakaara, me ata whakaara tahi e korua.
- 6
- Kei whakapeaua ketia e koe te whakarite whakawa mo to tangata rawa-kore, ina totohe ia.
- 7
- Kia matara atu koe i te mea teka; kaua ano hoki e whakamatea te tangata hara-kore raua ko te tangata tika: e kore hoki ahau e whakatika i te tangata hara.
- 8
- Kaua ano hoki e tango i te utu whakapati: he mea whakamatapo hoki to utu whakapati i te kanohi kite, he mea whakaparori-ke hoki i nga kupu a te hunga tika.
- 9
- Kaua ano hoki e tukinotia te manene; e mohio ana hoki koutou ki te ngakau o te manene; he manene hoki koutou i mua i te whenua o Ihipa.
- 10
- Kia ono hoki nga tau e rui ai koe i tou oneone, e kohikohi ai hoki i ona hua:
- 11
- I te whitu ia me waiho kia takoto kau ana, a ka kai nga tangata rawa-kore o tou iwi; a ma nga kirehe o te parae a ratou toenga e kai. Kia pena ano koe ki to mara waina, ki to mara oriwa.
- 12
- E ono nga ra e mahi ai koe i au mahi, a i te whitu ka okioki: kia okioki ai to kau, me to kaihe, kia whai taangamanawa ai hoki te tamaiti a to pononga wahine, raua ko te manene.
- 13
- Kia tupato ano hoki koutou ki nga mea katoa kua korerotia atu nei e ahau ki a koutou: kaua hoki e whakahuatia te ingoa o nga atua ke, kei rangona ano hoki ki tou mangai.
- 14
- E toru nga wa o te tau e tuku hakari ai koe ki a au.
- 15
- Kia mau ki te hakari o te taro rewena-kore: (e whitu nga ra e kai ai koe i te taro rewena-kore, e pera ai me taku i whakahau ai ki a koe, i te wa ano i whakaritea o te marama o Apipi; no reira hoki koe i haere mai ai i Ihipa: kaua ano hoki ratou e puta kau mai ki toku aroaro:)
- 16
- Me te hakari o te kotinga, o te matamua o au mahi, i rui ai koe ki te mara: me te hakari o te kohikohinga i te mutunga o te tau, ina oti te kohikohi mai e koe o mahi i te mara.
- 17
- E toru nga wa o te tau e kitea ai o tane katoa ki te aroaro o te Ariki o Ihowa.
- 18
- Kaua e whakaherea tahitia me te taro rewena te toto o taku patunga tapu; kei toe ano hoki ki te ata te ngako o taku hakari.
- 19
- Me kawe e koe ki te whare o Ihowa o tou Atua nga mea mataati o nga matamua o tou oneone. Kaua e kohuatia te kuao koati ki te waiu o tona whaea.
- 20
- Nana, ka tonoa nei e ahau he Anahera ki mua i a koe, hei tiaki i a koe i te ara, hei kawe hoki i a koe ki te wahi i whakaritea e ahau.
- 21
- Kia tupato ki a ia, whakarongo hoki ki tona reo, kaua e whakapataritari ki a ia; no te mea e kore ia e whakarere noa iho i o koutou hara: kei a ia nei hoki toku ingoa.
- 22
- Ki te ata whakarongo ia koe ki tona reo, ki te mea hoki i nga mea katoa e korero ai ahau; na, ko ahau hei hoa riri mo ou hoa riri, hei hoa whawhai hoki ki ou hoa whawhai.
- 23
- No te mea ka haere taku anahera ki mua i a koe, hei kawe i a koe ki nga Amori, ki nga Hiti, ki nga Perihi, ki nga Kanaani, ki nga Hiwi, ratou ko nga Iepuhi: a ka hunā ratou e ahau.
- 24
- Kei koropiko koe ki o ratou atua, kei mahi hoki ki a ratou, kei rite hoki au mahi ki a ratou mahi: engari me turaki rawa e koe, me wawahi rawa ano hoki a ratou whakapakoko.
- 25
- A me mahi koutou ki a Ihowa ki to koutou Atua, a ka manaakitia e ia to taro, me tou wai; ka whakakorea atu ano hoki e ahau te mate i roto i a koe.
- 26
- E kore tetahi mea e whanau whakatahe, e pakoko ranei, i tou whenua: ka ata tutuki ano i a au te maha o ou ra.
- 27
- Ka tukua atu e ahau taku wehi ki mua ki a koe, a ka whakamatea nga iwi katoa e haere atu nei koe ki a ratou, ka meinga ano hoki e ahau kia tahuri nga tuara o ou hoa riri katoa ki a koe.
- 28
- Ka ungā ano e ahau te horonete ki mua i a koe, a mana e pei nga Hiwi, nga Kanaani, me nga Hiti i tou aroaro.
- 29
- E kore ratou e peia e ahau i tou aroaro i te tau kotahi; kei ururuatia te whenua, a ka nui rawa i a koe te kirehe o te parae.
- 30
- Ka peia rikirikitia atu ratou e ahau i tou aroaro, kia hua ra ano koe, kia riro mai ra ano hoki te whenua i a koe.
- 31
- A ka whakatakotoria e ahau to rohe ki te Moana Whero, a tae noa ki te Moana o nga Pirihitini, ki te koraha hoki, a tae noa ki te awa: ka tukua atu nei hoki e ahau ki o koutou ringaringa nga tangata o te whenua, a ka peia ratou e koe i tou aroaro.
- 32
- Kaua e whakarite kawenata ki a ratou, ki o ratou atua ranei.
- 33
- Kaua ratou e noho ki tou whenua, kei mea ratou i a koe kia hara ki a au: ta te mea, ki te mahi koe ki o ratou atua, ka ai tena hei rore mou.
Address: 
Phone: 
Email: