- 1
- Na ka mea ia ki a Mohi, Piki ake ki a Ihowa, koutou ko Arona, ko Natapa, ko Apihu, kia whitu tekau ano hoki o nga kaumatua o Iharaira; a me koropiko mai koutou i tawhiti.
- 2
- Ko Mohi anake hoki e whakatata mai ki a Ihowa: ko ratou ia, kaua ratou e whakatata mai; me te iwi hoki, kaua ratou e piki tahi ake me ia.
- 3
- Na, ka haere a Mohi, a ka korerotia e ia ki te iwi nga kupu katoa a Ihowa, me nga whakariteritenga katoa: a kotahi ano te reo o te iwi katoa ki te whakahoki mai, ka mea ratou, Ka meatia e matou nga mea katoa i korerotia mai e Ihowa.
- 4
- Na, ka tuhituhia e Mohi nga kupu katoa a Ihowa; a ka maranga wawe ia i te ata, a hangā ana e ia tetahi aata ki raro iho i te maunga, me nga pou kotahi tekau ma rua, mo nga iwi kotahi tekau ma rua o Iharaira.
- 5
- I ungā ano e ia etahi taitamariki o nga tamariki a Iharaira, hei whakaeke i nga tahunga tinana, hei patu hoki i nga puru hei patunga whakamarie ki a Ihowa.
- 6
- Na, ka tango a Mohi i tetahi wahi o te toto, a makā ana e ia ki roto ki nga peihana; ko tetahi wahi hoki o te toto i taia atu ki te aata.
- 7
- Na, ka mau ia ki te pukapuka o te kawenata, a korerotia atu ana ki nga taringa o te iwi: a ka mea ratou, Ko nga mea katoa i kiia mai na e Ihowa ka meatia e matou, ka rongo ano hoki matou.
- 8
- Na, ka mau a Mohi ki te toto, a taia atu ana e ia ki te iwi, me te ki ano ia, Nana, te toto nei o te kawenata e whakaritea nei e Ihowa ki a koutou mo enei mea katoa.
- 9
- Na, ka piki atu a Mohi, ratou ko Arona, ko Natapa, ko Apihu, me nga kaumatua e whitu tekau o Iharaira;
- 10
- Na, ka kite ratou i te Atua o Iharaira: a kei raro iho i ona waewae me te mea ko te hapira i hangā hei whariki, he rite tonu ano hoki ki te tino rangi te mārama.
- 11
- A kihai i torona atu tona ringaringa ki tetahi o nga rangatira o nga tamariki a Iharaira: heoi, ka titiro atu ratou ki te Atua, ka kai hoki, ka inu.
- 12
- Na, ka mea a Ihowa ki a Mohi, Piki ake ki a au ki te maunga, a hei kona koe noho ai: a ka hoatu e ahau ki a koe nga papa kohatu, me te ture, me te whakahaunga kua oti nei i ahau te tuhituhi; hei whakaako mau ki a ratou.
- 13
- Na, ko te whakatikanga ake a Mohi, raua ko tana tangata ko Hohua: a ka piki atu a Mohi ki te maunga o te Atua.
- 14
- I mea ano ia ki nga kaumatua, Taria ake maua i konei, kia hoki mai ra ano maua ki a koutou: na, ko Arona raua ko Huru tena hei hoa mo koutou: ki te whai mea tetahi tangata, me haere ia ki a raua.
- 15
- Na, piki ana a Mohi ki te maunga, a e taupokina ana te maunga e te kapua:
- 16
- A i tau iho te kororia o Ihowa ki runga ki Maunga Hinai; a, e ono nga ra i taupokina ai a reira e te kapua; a i te whitu o nga ra ka karanga mai ia ki a Mohi i waenganui o te kapua.
- 17
- A i rite te ahua o te kororia o Ihowa ki te ahi e kai ana i runga i te tihi o te maunga, i te tirohanga a nga tamariki a Iharaira.
- 18
- Na, ka haere a Mohi ki waenganui o te kapua. A pikitia ana e ia te maunga: a e wha tekau nga ra o Mohi ki runga ki te maunga, e wha tekau hoki nga po.
Address: 
Phone: 
Email: