- 1
- Me hanga ano hoki e koe te tapenakara; kia kotahi tekau nga pīhi rinena miro pai, he puuru hoki, he papura, he ngangana: me whatu ki roto etahi kerupima; kia tohunga rawa te mahi.
- 2
- Kia rua tekau ma waru whatianga te roa o te pīhi kotahi, kia wha hoki whatianga te whanui o te pīhi kotahi: kia rite ano hoki te nui o nga pīhi katoa.
- 3
- Me hono nga pīhi e rima tetahi ki tetahi; me era atu pīhi e rima hoki, me hono tetahi ki tetahi.
- 4
- Me hanga ano hoki e koe etahi koropiko puuru ki te taha o tetahi pīhi, ki te taha e honoa ana: me pena ano hoki e koe ki te taha ki waho o tetahi pīhi, ki te taha e honoa mai ai te rua.
- 5
- Kia rima tekau nga koropiko e hangā e koe ki tetahi pīhi, kia rima tekau hoki nga koropiko e hangā e koe ki te taha o te pīhi e honoa mai ai te rua, kia mau ai nga koropiko tetahi ki tetahi.
- 6
- Me hanga ano e koe etahi toromoka koura, kia rima tekau, ka hono ai i nga pīhi ki nga toromoka: a ka kotahi te tapenakara.
- 7
- Me hanga ano hoki etahi pīhi ki te huruhuru koati, hei teneti mo runga i te tapenakara: kia kotahi tekau ma tahi nga pīhi e hangā e koe.
- 8
- Kia toru tekau whatianga te roa o tetahi pīhi, kia wha hoki nga whatianga te whanui o tetahi pīhi; kia rite tonu ano hoki te nui o nga pīhi kotahi tekau ma tahi.
- 9
- A me hono nga pīhi e rima ki a ratou ano, me nga pīhi e ono ki a ratou ano; a me whawhati e koe te ono o nga pīhi ki te wahi ki mua o te tapenakara.
- 10
- Me hanga ano e koe nga koropiko e rima tekau ki te taha ki waho o tetahi pīhi o tera i te hononga, me nga koropiko e rima tekau ki te taha o te pīhi e honoa mai ai te rua.
- 11
- A me hanga ano etahi toromoka parahi, kia rima tekau, a ka kuhua nga toromoka ki nga koropiko, kia honoa hoki te teneti kia kotahi.
- 12
- A ko te wahi i kohirahira atu o nga pīhi o te teneti, te taha o te pīhi i mahue atu ra, me whakapahika ki waho atu o te tuarongo o te tapenakara.
- 13
- A te wahi e roa iho ana o nga pīhi o te teneti, kia kotahi whatianga o tetahi pito, kia kotahi whatianga o tetahi pito e purero iho i nga taha o te tapenakara, i tetahi taha i tetahi taha, hei uhi.
- 14
- Me hanga ano e koe etahi hiako hipi, he mea kua oti te whakawhero, hei uhi mo te teneti, me etahi hiako pateri, hei uhi mo waho atu.
- 15
- Me hanga ano etahi papa mo te tapenakara, ki te hitimi te rakau, he mea whakatu.
- 16
- Kia kotahi tekau whatianga te roa o te papa, kia kotahi hoki whatianga me te hawhe te whanui o te papa kotahi.
- 17
- Kia rua nga arero o te papa kotahi, kia ririte ki a raua: kia pena tonu tau e mea ai ki nga papa katoa o te tapenakara.
- 18
- Na, me hanga e koe nga papa mo te tapenakara, kia rua tekau nga papa, mo te taha ki te tonga whaka-te-tonga.
- 19
- Me hanga ano e koe nga turanga hiriwa e wha tekau mo raro iho i nga papa e rua tekau; kia rua nga turanga ki raro i tetahi papa mo ona arero e rua, kia rua hoki turanga ki raro i tetahi papa mo ona arero e rua.
- 20
- Kia rua tekau hoki nga papa mo te rua o nga taha o te tapenakara, mo te taha ki te nota:
- 21
- Me nga turanga hiriwa e wha tekau o aua mea, nga turanga e rua mo raro i tetahi papa, me nga turanga e rua mo raro i tetahi atu papa.
- 22
- A mo te pakitara o te tapenakara whaka-te-hauauru me hanga e koe kia ono nga papa.
- 23
- Kia rua ano hoki nga papa e hangā e koe mo nga koki o te tapenakara i taua pakitara ano.
- 24
- A me hono aua papa i raro, me hono ano hoki i runga rawa ki te mowhiti kotahi: me pena aua papa e rua; me waiho mo nga koki e rua.
- 25
- Na, ka waru ena papa, me nga turanga hiriwa; kotahi tekau ma ono nga turanga; e rua nga turanga mo raro i tetahi papa, e rua hoki nga turanga mo raro i tetahi atu papa.
- 26
- Me hanga ano hoki e koe etahi kaho, ki te hitimi te rakau; kia rima mo nga papa o tetahi taha o te tapenakara,
- 27
- Kia rima hoki nga kaho mo nga papa o tetahi atu taha o te tapenakara, kia rima hoki nga kaho mo nga papa o tetahi pito o te tapenakara, ara, o te tuarongo whaka-te-hauauru.
- 28
- A ko to waenga kaho, i waenganui o nga papa, ka rere atu ki tetahi pito ki tetahi pito.
- 29
- A me whakakikorua e koe nga papa ki te koura, me hanga ano hoki nga mowhiti ki te koura hei kuhunga mo nga kaho: me whakakikorua ano hoki nga kaho ki te koura.
- 30
- Na, me whakaara e koe te tapenakara; kia rite hoki ki tona tauira i whakakitea atu ki a koe i runga i te maunga.
- 31
- Me hanga ano hoki e koe he arai ki te mea puuru, ki te papura ki te ngangana, ki te rinena miro pai; kia tohunga rawa te mahinga: kia whatua ano hoki he kerupima ki roto:
- 32
- Ka whakairi ai ki runga ki nga pou kohai e wha, he mea whakakikorua ki te koura: me koura nga matau ki runga ano i nga turanga hiriwa e wha.
- 33
- A me whakairi ake e koe te arai ki raro iho i nga toromoka kia kawea ai e koe ki reira ki roto i te arai te aaka o te whakaaturanga; a ko te arai hei wehe ma koutou i te wahi tapu i te wahi tino tapu.
- 34
- Me whakatakoto ano e koe te taupoki whakamarietanga ki runga ki te aaka o te whakaaturanga, ki te wahi tino tapu.
- 35
- Me whakatu ano e koe te tepara ki waho mai o te arai, me te turanga rama ki te ritenga atu o te tepara, ki te taha o te tapenakara whaka-te-tonga: me whakatu hoki e koe te tepara ki te taha ki te nota.
- 36
- A me hanga ano e koe he pa mo te whatitoka o te teneti, ki te mea puuru, ki te papura, ki te ngangana, ki te rinena miro pai, he mea whakairo ki te ngira.
- 37
- Me hanga ano e koe mo te pa kia rima nga pou hitimi, ka whakakikorua hoki ki te koura, me koura nga matau o aua mea; me whakarewa ano hoki e koe etahi turanga parahi e rima mo aua mea.
Address: 
Phone: 
Email: