- 1
- Me hanga ano hoki e koe tetahi aata, ki te hitimi te rakau, kia rima nga whatianga te roa, kia rima hoki whatianga te whanui; kia tapa wha o te aata: kia toru hoki nga whatianga tona teitei.
- 2
- Me hanga ano hoki ona haona ki nga koki e wha: kia kotahi te rakau o taua mea o ona haona: me whakakikorua ano hoki ki te parahi.
- 3
- Me hanga ano e koe ona takotoranga mo ona pungarehu, me ona koko pungarehu, me ona peihana, me ona marau, me ona takotoranga ahi: me hanga ona mea katoa ki te parahi.
- 4
- Me hanga ano hoki e koe mo taua mea he kaanga ahi ki te parahi, he mea ripekapeka; a me hanga ki runga i taua mea ripekapeka nga mowhiti parahi e wha ki ona pito e wha.
- 5
- A me whakanoho e koe taua mea ki raro i te awhi o te aata, ki raro iho, kia takapu ai taua mea ripekapeka ki waenganui o te aata.
- 6
- Me hanga e koe etahi amo mo te aata, etahi amo hitimi ka whakakikorua hoki ki te parahi.
- 7
- A ka kuhua nga amo ki nga mowhiti, a hei nga taha e rua o te aata nga amo, hei amo.
- 8
- Kia tuwhera kau a roto, me hanga e koe ki te papa: kia rite tau e hanga ai ki tera i whakakitea atu ki a koe ki runga i te maunga.
- 9
- Me hanga ano e koe te marae o te tapenakara: hei te rinena miro pai he pa mo te taha ki te tonga whaka-te-tonga; kia kotahi rau whatianga te roa mo tetahi taha:
- 10
- Me parahi ano nga pou e rua tekau, me nga turanga e rua tekau o aua mea; me hiriwa ia nga matau o nga pou, me nga awhi.
- 11
- Me nga pa mo te taha ki te nota kia kotahi rau te roa, me nga pou parahi e rua tekau, me nga turanga parahi e rua tekau: nga matau hiriwa o nga pou, me nga awhi hiriwa.
- 12
- Me nga pa ano hoki mo te whanui o te marae ki te taha ki te hauauru kia rima tekau nga whatianga: kia kotahi tekau nga pou, me nga turanga kotahi tekau.
- 13
- Kia rima tekau hoki nga whatianga o te whanui o te marae, ki te taha ki te rawhiti whaka-te-rawhiti.
- 14
- Kia kotahi tekau ma rima nga whatianga o nga pa o tetahi taha o te kuwaha, kia toru nga pou, kia toru hoki nga turanga.
- 15
- Kia kotahi tekau hoki ma rima nga whatianga o nga pa o tera taha: kia toru nga pou, kia toru hoki nga turanga.
- 16
- Kia rua tekau hoki nga whatianga o te pa, mo te kuwaha o te marae, he puuru, he papura, he ngangana, he rinena miro pai, he mea whakairo ki te ngira: kia wha hoki nga pou, kia wha hoki nga turanga.
- 17
- Me whakawhaiawhi nga pou katoa o te marae, a taka noa, ki te hiriwa; me hiriwa nga matau, me parahi nga turanga.
- 18
- Kia kotahi rau whatianga te roa o te marae, kia rima tekau hoki te whanui i nga wahi katoa, kia rima hoki whatianga te teitei, ki te rinena miro pai, me parahi hoki nga turanga.
- 19
- Me parahi nga oko katoa o te tapenakara mo nga mahi katoa o reira, nga titi katoa o reira, me nga titi katoa o te marae.
- 20
- Me whakahau ano e koe nga tamariki a Iharaira kia kawea mai ki a koe he hinu oriwa, he mea para-kore, he mea tuki, mo te whakamārama, kia ka tonu ai te rama.
- 21
- Me whakapai e Arona, ratou ko ana tamariki, taua mea i roto i te tapenakara o te whakaminenga, i waho mai o te arai e iri ana i mua mai o te whakaaturanga, i te ahiahi, a tae noa ki te ata, ki te aroaro o Ihowa; hei tikanga tenei mo ake tonu atu, ma o ratou whakatupuranga, hei meatanga hoki ma nga tamariki a Iharaira.
Address: 
Phone: 
Email: