- 1
- Na, ka mea a Ihowa ki a Mohi, Haere, turia atu ki runga, koutou ko te iwi i kawea mai e koe i te whenua o Ihipa, ki te whenua i oati ai ahau ki Aperehama, ki a Ihaka, ki a Hakopa, i mea ai, Ka hoatu e ahau ki ou uri:
- 2
- A ka unga he anahera e ahau ki mua i a koe, maku ano hoki e pei nga Kanaani, nga Amori, nga Hiti, nga Perihi, nga Hiwi, me nga Iepuhi:
- 3
- Ki te whenua e rerengia ana e te waiu, e te honi: e kore hoki ahau e haere atu i roto i a koe; he iwi kaki maro hoki koe: kei pau koe i a au ki te ara.
- 4
- A, te rongonga o te iwi i tenei rongo kino, na, ka pouri ratou, kihai ano hoki i whakanohoia e tetahi tangata ona mea whakapaipai.
- 5
- Na Ihowa hoki i ki ki a Mohi, Mea atu ki nga tamariki a Iharaira, He iwi kaki maro koutou: kia mea kau ka puta atu ahau ki waenganui i a koe, a ka ngaro koe i a au: na, whakarerea atu ou mea whakapaipai, a ka mohio ahau ki taku e mea ai ki a koe.
- 6
- Na, ka whakarerea atu o ratou mea whakapaipai e nga tamariki a Iharaira i Maunga Horepa.
- 7
- Na, ka tango a Mohi i te tapenakara, a whakaturia ana e ia ki waho o te puni, ki tetahi wahi e mamao atu ana i te puni, a huaina ana e ia ko te Tapenakara o te whakaminenga. A i haere mai nga tangata katoa e rapu ana i a Ihowa ki te tapenakara o te whakaminenga, ki waho o te puni.
- 8
- A i a Mohi e haere atu ana ki te tapenakara, ka whakatika te iwi katoa, a ka tu ia tangata ia tangata ki te kuwaha o tona teneti, a ka titiro atu ratou ki muri i a Mohi, a haere noa ia ki roto ki te tapenakara.
- 9
- A, i a Mohi e haere ana ki roto ki te tapenakara, ka heke iho te pou kapua, a tu ana i te whatitoka o te tapenakara, a ka korero a Ihowa ki a Mohi.
- 10
- A te kitenga o te iwi katoa i te pou kapua e tu ana i te whatitoka o te tapenakara, na ka whakatika te iwi katoa, ka koropiko hoki ia tangata ia tangata, i te whatitoka o tona teneti.
- 11
- Na, ka korero mai a Ihowa ki a Mohi, he kanohi he kanohi, pera hoki me te tangata e korero nei ki tona hoa. A hoki ana ia ki te puni: ko tana tangata ia ko Hohua tama a Nunu, kihai taua taitamariki i neke atu i waenganui i te tapenakara.
- 12
- A i mea a Mohi ki a Ihowa, Titiro, kua mea mai nei koe ki a au, Kawea tenei iwi ki runga: a kahore i whakaaturia mai e koe ki a au tau e unga ai hei hoa moku. Kua mea mai ano hoki koe ki a au, E mohio ana ahau ki a koe, ki tou ingoa hoki, kua manakohia ano hoki koe e ahau.
- 13
- Na, ki te mea kua manakohia ahau e koe, tena, whakaaturia mai ki a au tou ara, kia mohio ai ahau ki a koe, kia manakohia ai ahau e koe; kia mahara hoki he iwi nou tenei iwi.
- 14
- Na, ka mea mai ia, Ka haere atu toku aroaro, a ka mea ahau i a koe kia okioki.
- 15
- Na, ka mea ia ki a ia, Ki te kahore tou aroaro e haere, kaua matou e kawea ki runga i konei.
- 16
- Ma te aha hoki e mohiotia ai kua manakohia matou ko tou iwi e koe? he teka ianei mau kia haere tahi i a matou? penei ka motuhia mai matou ko tou iwi i nga iwi katoa i runga i te mata o te whenua.
- 17
- Na, ko te meatanga mai a Ihowa ki a Mohi, Ko tenei mea ano hoki, i korerotia mai nei e koe, ka rite i a au: no te mea e manakohia ana koe e ahau, a e mohio ana ahau ki a koe, ki tou ingoa hoki.
- 18
- Na, ka mea atu ia, Tena ra, whakakitea mai ki a au tou kororia.
- 19
- Na, ka mea mai ia, Ka meatia e ahau toku pai katoa kia haere atu i tou aroaro, a ka karangatia e ahau te ingoa o Ihowa ki tou aroaro, ka atawhai hoki ahau i taku e atawhai ai, ka tohu hoki i taku e tohu ai.
- 20
- A i mea mai ano ia, E kore e taea e koe te titiro ki toku mata: no te mea hoki e kore tetahi tangata e titiro ki a au, a e ora.
- 21
- I mea mai ano a Ihowa, Nana, he wahi tenei kei a au, a me tu koe ki runga ki te kamaka:
- 22
- A ka haere atu taku kororia, na, ka kawea koe e ahau ki roto ki te kapiti kohatu, a ka taupokina koe e ahau ki toku ringa, i a au e haere atu ana.
- 23
- A ka tangohia e ahau toku ringa, ka kite koe i muri oku: ko toku mata ia e kore e kitea.
Address: 
Phone: 
Email: