- 1
- Na, ka mea a Ihowa ki a Mohi, Taraia mai mau etahi papa kohatu, kia rua, kia rite ki o mua: a ka tuhituhia e ahau ki aua papa nga kupu i mau ki o mua papa, i wahia na e koe.
- 2
- A kia takatu i te ata, ka haere ake ai i te ata ki Maunga Hinai, a me tu koe ki toku aroaro ki reira, ki runga ki te tihi o te maunga.
- 3
- Kaua hoki tetahi tangata e haere ake i a koe, kei kitea hoki tetahi tangata puta noa i te maunga katoa; ko nga hipi ano hoki, me nga kau, kaua ratou e kai ki te ritenga mai o taua maunga.
- 4
- Na, taraia ana e ia nga papa kohatu e rua, he mea rite tonu ki o mua; a ka maranga wawe a Mohi i te ata, ka piki atu ki Maunga Hinai, ka pera ano me ta Ihowa i whakahau ai ki a ia, me te mau ano i nga papa kohatu e rua ki tona ringaringa.
- 5
- Na, ka heke iho a Ihowa i roto i te kapua, a ka tu tahi me ia ki reira, ka karanga hoki i te ingoa o Ihowa.
- 6
- Na, ka haere atu a Ihowa i tona aroaro, a ka karangatia, Ko Ihowa, Ko Ihowa, ko te Atua tohu, atawhai, e tukuroa nei i te riri, e nui nei te aroha, te pono,
- 7
- E rongoa nei i te aroha mo nga mano, e muru nei i te kino, i te tutu, i te hara, e kore rawa ano hoki e tuku noa i te he; e mea nei i te hara o nga mātua kia tau iho ki nga tamariki, ki nga tamariki a nga tamariki, a, te toru te wha ra ano o nga whakatupuranga.
- 8
- Na, ka hohoro a Mohi, a ka tuohu iho ki te whenua, a koropiko ana:
- 9
- A ka mea, Ki te mea kua manakohia mai ahau e koe, e te Ariki, kia haere ra toku Ariki i waenganui i a matou; he iwi kaki maro hoki tenei; murua atu hoki to matou kino, me to matou hara, waiho hoki matou hei taonga tupu mou.
- 10
- Na, ka mea mai ia, Nana, ka whakarite kawenata ahau ki te aroaro o te iwi katoa: ka meatia e ahau nga mea whakamiharo kihai i meatia puta noa i te whenua katoa, i nga iwi katoa ano hoki: a ka kitea te mahi a Ihowa e te iwi katoa kei roto nei koe i a ratou: he mea whakamataku hoki taku e mahi tahi ai ahau me koe.
- 11
- Kia mau ki taku e whakahau atu nei ki a koe inaianei: nana, ka peia atu e ahau nga Amori, nga Kanaani, nga Hiti, nga, Perihi, nga Hiwi, nga Iepuhi.
- 12
- Kia tupato kei whakarite kawenata koe ki nga tangata o te whenua e haere nei koe ki reira, kei waiho hei rore i waenganui i a koe:
- 13
- Engari me wawahi a ratou aata, me pakarukaru a ratou whakapakoko, me tua hoki a ratou motu rakau.
- 14
- No te mea hoki kahore atu he atua hei koropikotanga mau: ta te mea hoki ko Ihowa, ko Hae nei tona ingoa, he Atua hae ia:
- 15
- Kei whakarite kawenata koe ki nga tangata o te whenua, a ka whai atu ratou, ka puremu atu ki o ratou atua, a ka patu whakahere ma o ratou atua, a ka karangatia koe, na, ka kai koe i tetahi wahi o tana patunga tapu.
- 16
- Kei tango hoki koe i a ratou tamahine ma o tama, a ka whai atu, ka puremu atu a ratou tamahine ki o ratou atua, a ka meinga o tamariki kia whai atu, kia puremu atu ki o ratou atua.
- 17
- Kaua e whakarewaina he atua mou.
- 18
- Kia mau ki te hakari taro rewenakore. E whitu nga ra e kai ai koe i te taro rewena-kore, e pera ai me taku i whakahau atu ai ki a koe, i te wa ano i whakaritea o te marama o Apipi: ko Apipi hoki te marama i haere mai ai koe i Ihipa.
- 19
- Ko nga mea katoa e orokoputa mai ana i te kopu, naku; me nga whanau matamua a o kararehe, a nga kau, a nga hipi.
- 20
- Otiia me utu e koe ki te reme te matamua a te kaihe; a ki te kahore e utua e koe, whatiia tona kaki. Me utu e koe nga matamua o au tama. E kore ano hoki tetahi e puta kau mai ki toku aroaro.
- 21
- E ono nga ra e mahi ai koe, i te whitu ia o nga ra me okioki koe: me okioki ano koe i te ruinga, i te kotinga.
- 22
- Me whakarite e koe te hakari o nga wiki, o te matamua, o te kotinga witi, me te hakari o te kohikohinga i te takanga o te tau.
- 23
- E toru nga wa o te tau e kitea ai ou tane katoa ki te aroaro o te Ariki, o Ihowa, o te Atua o Iharaira.
- 24
- Ka peia nei hoki e ahau nga tauiwi i tou aroaro, ka whakanuia ano hoki e ahau o rohe: a e kore tetahi e minamina ki tou whenua, ina haere koe ki runga kia kitea ki te aroaro o Ihowa o tou Atua i nga wa e toru o te tau.
- 25
- Kaua e whakahekea tahitia me te rewena te toto o taku patunga tapu; kei toe ano hoki ki te ata te patunga tapu o te hakari o te kapenga.
- 26
- Me kawe e koe ki te whare o Ihowa o tou Atua nga mea mataati o nga matamua o tou oneone. Kaua e kohuatia te kuao koati ki te waiu o tona whaea.
- 27
- Na, ka mea mai a Ihowa ki a Mohi, Tuhituhia enei kupu: kei enei kupu hoki te tikanga o te kawenata e whakaritea nei e ahau ki a koe, ki a Iharaira.
- 28
- A i reira ia i a Ihowa, a, e wha tekau nga ra, e wha tekau hoki nga po; kihai i kai i te taro, kihai ano hoki i inu i te wai. Na, tuhituhia ana e ia ki nga papa nga kupu o te kawenata, nga ture kotahi tekau.
- 29
- A, i te hekenga iho o Mohi i runga i Maunga Hinai, me nga papa e rua o te kawenata i te ringa o Mohi, i tona hekenga iho i runga i te maunga, na, kihai a Mohi i mohio e wheriko ana te kiri o tona mata i a ia e korero ana ki a ia.
- 30
- A te tirohanga mai a Arona ratou ko nga tamariki katoa a Iharaira ki a Mohi, na, e wheriko ana te kiri o tona mata; a ka wehi ratou ki te whakatata atu ki a ia.
- 31
- Na, ka karanga atu a Mohi ki a ratou; a ka hoki mai ki a ia a Arona ratou ko nga rangatira katoa o te whakaminenga; a ka korero a Mohi ki a ratou.
- 32
- A muri iho ka whakatata mai nga tamariki katoa a Iharaira; a ka whakahaua iho e ia ki a ratou nga mea katoa i korerotia mai e Ihowa ki a ia i Maunga Hinai.
- 33
- A mutu iho ta Mohi korero ki a ratou, i meatia hoki tona mata ki te arai.
- 34
- A ka haere a Mohi ki te aroaro o Ihowa, ki te korero ki a ia, ka tangohia e ia te arai, a puta noa mai ia ki waho. A, tona putanga mai ki waho, na, ka korerotia e ia ki nga tamariki a Iharaira nga mea i whakahaua mai ki a ia.
- 35
- A i kite nga tamariki a Iharaira i te mata o Mohi, e wheriko ana te kiri o te mata o Mohi: na, ka whakahokia mai e Mohi te arai ki tona mata, a haere noa ia ki te korero ki a ia.
Address: 
Phone: 
Email: