- 1
- Na, ka huihuia e Mohi te whakaminenga katoa o nga tamariki a Iharaira, a ka mea ia ki a ratou, Ko nga kupu enei i whakahaua mai e Ihowa kia mahia.
- 2
- E ono nga ra e mahia ai te mahi; ko te ra whitu ia me waiho e koutou hei ra tapu, hei hapati okiokinga ki a Ihowa: ki te mahia he mahi e tetahi tangata i taua ra, me whakamate.
- 3
- Kei tahuna e koutou he ahi, puta noa i o koutou nohoanga, i te ra hapati.
- 4
- A i korero mai ano a Mohi ki te whakaminenga katoa o nga tamariki a Iharaira, i mea, Ko te mea tenei i whakahau mai ai a Ihowa, i mea ai,
- 5
- Tangohia mai i roto i a koutou he whakahere ma Ihowa: ko nga tangata katoa he ngakau hihiko o ratou, me kawe mai e ratou taua mea hei whakahere ki a Ihowa; he koura, he hiriwa, he parahi,
- 6
- He puuru, he papura, he ngangana, he rinena pai, he huruhuru koati.
- 7
- Me nga hiako hipi kua oti te whakawhero, me nga hiako pateri, me etahi rakau, ki te hitimi,
- 8
- Me te hinu mo te whakamārama, me nga mea kakara mo te hinu whakawahi, mo te whakakakara reka hoki,
- 9
- Me nga kohatu onika, me nga kohatu hei whakanoho ki te epora, ki te kouma.
- 10
- A me haere mai ano nga tangata ngakau mohio katoa i roto i a koutou, ki te hanga i nga mea katoa i whakahaua mai e Ihowa;
- 11
- I te tapenakara, i tona teneti, i tona uhi hoki, i ona toromoka, i ona papa, i ona kaho, i ona pou, i ona turanga pou,
- 12
- I te aaka, me ona amo, i te taupoki whakamarietanga, me te arai hipoki,
- 13
- I te tepara, me ona amo, me ona oko katoa, me te taro aroaro,
- 14
- I te turanga rama hoki mo te whakamārama, me ona mea, me ona rama, me te hinu hoki mo te whakamārama,
- 15
- Me te aata whakakakara, me ona amo, me te hinu whakawahi, me te whakakakara reka, me te pa mo te whatitoka i te tomokanga atu o te tapenakara,
- 16
- I te aata mo te tahunga tinana, me tona kaanga-ahi parahi, i ona amo, me ona mea katoa, i te takotoranga wai me tona turanga,
- 17
- I nga pa o te marae, i ona pou, me nga turanga pou, me te pa mo te whatitoka o te marae,
- 18
- I nga titi o te tapenakara, me nga titi o te marae, me nga aho,
- 19
- I nga kakahu mo te mahi minita, ina minita ki te wahi tapu, i nga kakahu tapu mo Arona mo te tohunga, me nga kakahu mo ana tama, mo te mahi tohunga.
- 20
- Katahi ka haere atu te whakaminenga katoa o nga tamariki a Iharaira i te aroaro o Mohi.
- 21
- Na, ka haere mai ratou, nga tangata katoa i toko ake o ratou ngakau, me nga tangata i hihiko noa ake o ratou wairua, me te kawe mai ano ratou i te whakahere ma Ihowa, mo te mahi o te tapenakara o te whakaminenga, mo ona mahi katoa, mo nga kakahu tapu ano hoki.
- 22
- I haere mai hoki ratou, nga tane me nga wahine, nga mea i hihiko noa te ngakau, a kawea mai ana e ratou nga poroporo, nga whakakai, nga mowhiti, nga heitiki, he mea koura katoa: i tukua mai ano hoki e ia tangata e ia tangata he whakahere koura ki a Ihowa.
- 23
- A ko nga tangata katoa i kitea nei he puuru ki a ratou, he papura, he ngangana, he rinena pai, he huruhuru koati he hiako hipi kua oti te whakawhero, me nga hiako pateri, i kawea mai ano e ratou.
- 24
- Ko nga tangata katoa i tuku nei i te hiriwa, i te parahi, hei whakahere, i kawea mai e ratou te whakahere ki a Ihowa: me nga tangata katoa i kitea nei he rakau hitimi ki a ratou, mo tetahi meatanga o te mahi, i kawea mai ano e ratou.
- 25
- Me nga wahine ngakau mohio katoa hoki, i whatu o ratou ringaringa, a kawea mai ana ta ratou i whatu ai, te mea puuru, papura, ngangana, me te rinena pai.
- 26
- A i whatu ano nga wahine katoa, i toko ake nei o ratou ngakau ki te mohio, i te huruhuru koati.
- 27
- A i kawea mai ano e nga rangatira nga kohatu onika, me nga kohatu hei whakanoho, mo te epora, mo te kouma;
- 28
- Me te mea kakara, me te hinu mo te whakamārama, mo te hinu whakawahi, mo te whakakakara reka ano hoki.
- 29
- I kawea mai he whakahere tuku noa ki a Ihowa e nga tamariki a Iharaira, e nga tane, me nga wahine katoa, i toko ake nei o ratou ngakau ki te kawe mai mo nga tini mahi, i whakahaua mai e Ihowa kia mahia, a i korerotia mai e Mohi.
- 30
- Na, ka mea a Mohi ki nga tamariki a Iharaira, Titiro, kua karangatia e Ihowa te ingoa o Petareere tama a Uri, ko ia nei te tama a Huru, o te iwi o Hura;
- 31
- Kua whakakiia ano hoki e ia ki te wairua o te Atua, ki te ngakau tupato, ki te whakaaro, ki te mohio, ki nga mahi katoa ano hoki:
- 32
- Hei whakaaro ki nga mahi a te tohunga, mo te mahi i te koura, i te hiriwa, i te parahi,
- 33
- Mo te tuhi kohatu hoki, mo te whakanoho hoki, mo te whakairo rakau, mo te mahi ano hoki i nga mahi katoa a te tohunga.
- 34
- Kua homai ano hoki te tohutohu e ia ki roto ki tona ngakau, ki a raua ko Ahoriapa tama a Ahihamaka, o te iwi o Rana.
- 35
- Kua whakakiia raua e ia ki te ngakau mahara, hei mahi i nga tini mahi a te kai mahi, a te mea mohio, a te kai whakairo puuru, papura, ngangana, rinena pai, a te kai whatu hoki, a nga kai mahi hoki i nga tini mahi, a nga tohunga ano hoki ki te mahi.
Address: 
Phone: 
Email: