- 1
- I puta mai ano te kupu a Ihowa ki a au, i mea,
- 2
- E te tama a te tangata, meinga a Hiruharama kia mohio ki ana mea whakarihariha.
- 3
- Mea atu, Ko te kupu tenei a te Ariki a Ihowa ki Hiruharama: to take, to wahi i whanau ai koe, ko te whenua o Kanaana: he Amori tou pāpā; tou whaea he Hiti.
- 4
- Na, i to whanautanga, i te ra i whanau ai koe, kihai to uho i tapahia, kihai ano koe i horoia ki te wai, kia ma ai, kihai rawa ano koe i meatia ki te tote, kihai rawa i takaia ki roto ki te popoki.
- 5
- Kihai tetahi kanohi i aroha ki a koe, kihai i meatia ki a koe tetahi o enei mea, he mahi tohu ki a koe; heoi he mea maka atu koe ki te mata o te parae, he mea whakarihariha koe i te ra i whanau ai koe.
- 6
- Na, taku haerenga atu i to taha, ka kite ahau i a koe e poke rawa ana i ou toto: na, ko taku kianga atu ki a koe, i a koe ano i ou toto, E ora; ae ra, i mea ahau ki a koe, i a koe ano i ou toto, E ora.
- 7
- I meinga ano koe e ahau kia tini, kia rite ki nga tupu o te mara; heoi kua tokomaha koe, kua nui, kua tae ano koe ki nga whakapaipai ataahua, kua pupuku nga u, kua tupu o makawe; i mua hoki e noho tahanga ana koe, kahore he kakahu.
- 8
- A, taku haerenga atu i tou taha, ka kite ahau i a koe, na, he wa no te aroha nga wa i a koe; na, hipokina iho e ahau te remu o toku ki runga ki a koe, uhia ana koe e ahau, i a koe e noho tahanga ana, ae ra, oati ana ahau ki a koe, uru ana taua ki te kawenata, e ai ta te Ariki ta Ihowa, a riro mai ana koe i a au.
- 9
- Na, horoia ana koe e ahau ki te wai; ata horoia atu ana e ahau ou toto i piri ki a koe; pania ana koe e ahau ki te hinu.
- 10
- Taku kakahu mou he mea whakairo; aku hu mou he hiako pateri; taku whitiki mou he rinena pai; hipokina ana koe e ahau ki te hiraka.
- 11
- He mea whakapaipai ano hoki koe naku ki nga whakapaipai, whakanohoia ana e ahau he poroporo ki o ringaringa, he hei ki to kaki.
- 12
- I kuhua ano e ahau te mowhiti ki tou ihu, me nga whakakai ano ki ou taringa, me te karauna ataahua ano hoki ki tou māhunga.
- 13
- Na, kua oti koe te whakapaipai ki te koura, ki te hiriwa; he rinena pai ano hoki to kakahu, he hiraka, he mea whakairo; i kai koe i te paraoa pai, i te honi, i te hinu; nui whakaharahara tou ataahua, kake ana koe hei kingitanga.
- 14
- Paku ana to ingoa ki nga iwi, he ataahua nou; i tino pai rawa hoki, he honore hoki noku i tukua atu e ahau ki a koe, e ai ta te Ariki ta Ihowa.
- 15
- Heoi whakawhirinaki ana koe ki tou ataahua, puremu ana koe, he whakaaro hoki nou ki to ingoa, ringitia ana e koe o puremutanga ki nga tangata katoa e haere atu ana i tou taha; i a ia tena.
- 16
- I tikina atu ano e koe etahi o o kakahu, a mahia ana e koe au wahi tiketike, whakakotingotingo rawa, puremu ana koe i runga i aua mea: e kore nga mea pena e puta mai a mua, e kore ano e pena.
- 17
- I tikina atu ano e koe o mea whakapaipai, he koura naku, he hiriwa naku, aku ra i hoatu ki a koe, a hangā ana e koe etahi whakapakoko tane mau, puremu atu ana ki aua mea.
- 18
- I tikina atu ano e koe o kakahu whakairo, a hipokina ana e koe aua mea, hoatu ana e koe taku hinu, me taku whakatakara ki to ratou aroaro.
- 19
- Taku kai ano hoki i hoatu e ahau ki a koe, te paraoa pai, te hinu, te honi i whangaia ai koe e ahau, hoatu ana ano tera e koe ki to ratou aroaro hei kakara reka; ko to tikanga tena, e ai ta te Ariki ta Ihowa.
- 20
- I tikina atu ano hoki o tamariki me o tamahine, ā taua whanau, pareho ake. He iti ianei o puremutanga,
- 21
- Ara, to patunga i aku tamariki, to hoatutanga i a ratou kia tika na roto i te ahi, hei mea ki a ratou?
- 22
- Na, i o mea whakarihariha katoa, i o puremutanga, kihai koe i mahara ki nga ra o to tamahinetanga, i a koe e noho tahanga ana, kahore he kakahu, i a koe i poke ra i ou toto.
- 23
- Na, i muri i to he katoa, (aue te mate mou, aue te mate mou! e ai ta te Ariki ta Ihowa,)
- 24
- Kei te hanga koe i te wahi ikeike mau, mahia ana e koe te wahi tiketike mau i nga waharoa katoa.
- 25
- Kua hangā ano e koe to wahi tiketike ki nga ahunga katoa o nga huarahi, meinga ana e koe to ataahua kia whakariharihangia, whewhera tonu o waewae ki nga tangata katoa e haere ana i tou taha, whakamahā ana e koe o puremutanga.
- 26
- A puremu ana koe ki nga Ihipiana, ki o hoa tata, he hunga kikokiko nui, whakamahā ana e koe o puremutanga, hei whakapataritari i a au.
- 27
- Nana, na reira i totoro atu ai toku ringaringa ki a koe, whakaititia ana e ahau nga kai i rite mau, hoatu ana koe e ahau ki ta o hoa riri i pai ai, ki nga tamahine a nga Pirihitini e whakama nei ki to ara puremu.
- 28
- I puremu ano koe ki nga Ahiriana, he kore hoki nou e makona; ina, puremu ana koe ki a ratou, a kihai ano koe i makona.
- 29
- I whakamahā ano e koe o puremutanga ki te whenua o Kanaana, a Karari atu ra ano, heoi kihai ano koe i makona i tenei.
- 30
- Ano te ngoikore o to ngakau, e ai ta te Ariki ta Ihowa, i to mahinga i enei mea katoa, he mahi na te wahine puremu, na te mea taikaha;
- 31
- I to hanganga i to wahi ikeike ki te ahunga mai o nga huarahi katoa, i to mahinga i to wahi tiketike ki nga whakaroa katoa; a kihai ano i rite ki ta te wahine puremu; e whakahawea ana hoki koe ki te utu;
- 32
- Engari e rite ana ki te wahine moe hoa e puremu ana, e tuku mai ana i nga tangata ke ehara nei i te hoa nona!
- 33
- E hoatu ana he mea ki nga wahine puremu katoa; tau ia he hoatu i o taonga ki te hunga katoa e aroha ana ki a koe, a utua ana ratou e koe, he mea kia haere mai ai ratou ki a koe i nga taha katoa ki o puremutanga.
- 34
- Na, rereke ana tau i ta etahi wahine i o puremutanga, kahore hoki te kai puremu e aru i a koe: i te mea ano hoki ka hoatu e koe he utu, a kahore he utu e homai ki a koe, na, ka rereke tau.
- 35
- Mo reira whakarongo, e te wahine puremu, ki te kupu a Ihowa,
- 36
- Ko te kupu tenei a te Ariki a Ihowa, Na, kua ringitia atu na e koe to parahi, kua kitea ano hoki koe e noho tahanga ana i o puremutanga ki te hunga i aroha ki a koe, ki o whakapakoko whakarihariha katoa ano hoki, he meatanga ki te toto o o tamariki i hoatu na e koe ki a ratou;
- 37
- Mo reira, te hunga katoa i aroha ki a koe, au i ahuareka atu ai, ratou ko te hunga katoa i aroha ai koe, ko te hunga katoa ano hoki i kino ai koe, ina, ka huihuia mai ratou e ahau ki a koe i tetahi taha, i tetahi taha, ka whakakitea ano koe e ahau ki a ratou e noho tahanga ana, a ka kite ratou i ou wahi katoa e takoto kau ana.
- 38
- Taku whakawakanga ano hoki i a koe ka rite ki te whakawakanga o nga wahine puremu, o nga wahine whakaheke toto; ka hoatu ano e ahau ki a koe he whakaheke toto, he weriweri, he hae.
- 39
- Ka tukua atu ano koe e ahau ki to ratou ringa, a ka whakahoroa e ratou to wahi ikeike, ka wahia iho ano o wahi tiketike, ka huia atu ano e ratou ou kakahu, ka tangohia ano e ratou o mea whakapaipai, ka waiho ano hoki koe kia noho tahanga ana, kahore he kakahu.
- 40
- Ka kawea mai ano e ratou he ropu hei whawhai ki a koe, a ka akina koe ki te kohatu, ka werohia ano hoki koe ki ā ratou hoari.
- 41
- Ka tahuna ano e ratou o whare ki te ahi, ka mahia ano hoki nga whakaritanga whakawa ki a koe i te tirohanga mai a nga wahine tokomaha, a ka whakamutua e ahau o puremutanga, e kore ano he utu e homai e koe a muri ake nei.
- 42
- Katahi ka marie iho taku riri ki a koe, ka tahuri atu ano hoki taku hae i a koe, a ka ata noho ahau, e kore ano e riri ki a koe a muri ake nei.
- 43
- Kihai na koe i mahara ki nga ra o to taitamahinetanga, heoi whakaohokia ana ahau e koe ki enei mea katoa; mo reira, tenei ahau te hoatu nei i to tikanga ki runga ki to māhunga, e ai ta te Ariki ta Ihowa; e kore ano taua ritenga kino e mahia e koe ki runga ake i o mea whakarihariha katoa.
- 44
- Nana, te hunga katoa e korero ana i nga whakatauki, ta ratou whakatauki mou ko te kupu nei, Te whaea, tana tamahine, rite tonu.
- 45
- Ko koe te tamahine a to whaea, a te mea e whakarihariha nei ki tona tahu, ki ana tamariki; ko koe ano te teina o o tuakana i whakarihariha nei ki o raua tahu, ki a raua tamariki: he Hiti to koutou whaea, he Amori to koutou pāpā.
- 46
- Na, to tuakana ko Hamaria, ratou ko ana tamahine e noho na i tou taha ki maui: a to teina e noho na i to taha ki matau ko Horoma ratou ko ana tamahine.
- 47
- Heoi kihai koe i haere i runga i o raua ara, kihai ano to mahi i rite ki ā raua mea whakarihariha, he nohinohi hoki, he mea e whakaparahakotia ana, na, heke rawa iho to tupu i to raua i o ara katoa.
- 48
- E ora ana ahau, e ai ta te Ariki ta Ihowa, kihai te mahi a to teina a Horoma ratou ko ana tamahine i rite ki tau mahi, ki tau, ki ta o tamahine.
- 49
- Nana, ko te he tenei o to teina, o Horoma, he whakapehapeha i roto i a ia ratou ko ana tamahine, he makonatanga i te taro, he ngakau tatu i runga i te rangimarie, kihai ano ia i whakau ake i nga ringaringa o te ware, o te rawa-kore.
- 50
- A, to ratou whakakaketanga, ta ratou mahinga i te mea whakarihariha ki toku aroaro, na, peia ana ratou e ahau, (ko taku hoki ia i kite ake ai.)
- 51
- Na, te hara o Hamaria kihai i rite ki te hawhe o o hara, kua maha ke ano hoki au mea whakarihariha i ā ratou, ka ai ano au mea whakarihariha katoa i mahia e koe hei whakatika mo ta to tuakana, mo ta to teina.
- 52
- Nau ano hoki i whakarite te whakawakanga o to teina, o to tuakana; me waha ano hoki e koe to whakama mo ou hara i meinga nei e koe kia nui atu te whakarihariha i o raua, nui atu to raua tika i tou; na, ka numinumi kau ano hoki koe, ka waha i to whakama; kua whakatikaia na hoki e koe ta to teina, ta to tuakana.
- 53
- I te wa e whakatahuritia ai e ahau to raua whakaraunga, te whakaraunga o Horoma ratou ko ana tamahine, me te whakaraunga ano o Hamaria ratou ko ana tamahine, ka whakatahuritia ano te whakaraunga o o whakarau i roto i a ratou.
- 54
- Kia wahā ai e koe to whakama, kia numinumi kau ai mo nga mea katoa i mea ai koe, i a koe na ka ai hei whakamarie mo ratou.
- 55
- Ka hoki to teina, to tuakana, a Horoma, ratou ko ana tamahine, ki to ratou tu o mua, a ka hoki a Hamaria ratou ko ana tamahine ki to ratou tu o mua, katahi koutou ko o tamahine ka hoki ki to koutou tu o mua.
- 56
- Kihai na hoki to teina a Horoma i rangona i roto i to mangai i te ra o to whakakake,
- 57
- I te mea kiano to he i hurahia, i te mea kiano i rite ki te wa o te tawainga a nga tamahine a Hiria ratou ko te hunga katoa i tetahi taha ona, i tetahi taha, ko nga tamahine ano a nga Pirihitini e whakahawea na ki a koe i tetahi taha, i tetahi taha.
- 58
- Kua wahā na e koe to tikanga he, me o mea whakarihariha, e ai ta Ihowa.
- 59
- Ko te kupu hoki tenei a te Ariki a Ihowa; Taku mahi ki a koe ka rite ki tau mahi; kua whakahawea na hoki koe ki te oati, whakatakā ana e koe te kawenata.
- 60
- Otiia ka mahara ano ahau ki taku kawenata ki a koe i nga ra o to taitamahinetanga, ka whakapumautia ano e ahau ki a koe he kawenata e mau tonu ana.
- 61
- A ka mahara koe ki o ara, ka whakama ano hoki, ina riro mai i a koe to tuakana, to teina, ina hoatu raua e ahau ki a koe hei tamahine, he mea ano kihai i kawenatatia e koe.
- 62
- Ka whakapumautia ano e ahau taku kawenata ki a koe, a ka mohio koe ko Ihowa ahau,
- 63
- Kia mahara ai, kia numinumi kau ai koe, kia kaua ai ano hoki e puaki to mangai i muri iho i to whakama, ina marie ahau ki a koe ki nga mea katoa i mea ai koe; e ai ta te Ariki ta Ihowa.
Address: 
Phone: 
Email: