Ezekiel Chapter 17 - Paipera Tapu 1868 | Te Paipera Tapu 1868

Ezekiel Chapter 17 - Paipera Tapu 1868

1
I puta mai ano te kupu a Ihowa ki a au; i mea,
2
E te tama a te tangata, korerotia atu tetahi kai, makā atu tetahi whakatauki ki te whare o Iharaira,
3
Mea atu, Ko te kupu tenei a te Ariki a Ihowa; He ekara nui, he nui ano nga parirau, he roa nga hou, kapi tonu i te huruhuru, he mea kotingotingo, haere mai ana ia ki Repanona, tangohia ana e ia te manga o runga rawa o te hita.
4
Katohia ana e ia te pito o ona manga ngawari, kawea atu ana ki te whenua hokohoko, waiho iho e ia i te pa o nga kai hokohoko.
5
I tikina atu ano e ia etahi o nga purapura o te whenua, whakatokia iho e ia ki te mara hua, kawea atu ana e ia ki te taha o nga wai maha, whakaturia ake hei wirou.
6
Na, te tupunga ake, he waina e tautorotoro ana, he papaku, ona manga anga tonu mai ki a ia, i raro ano i a ia ona pakiaka: na, ka whakawaina, ka tupu ona manga, ka totoro ona peka.
7
Na, ko tetahi atu ekara, he nui nga parirau, he maha nga huruhuru, na kua anga mai nga pakiaka o tenei waina ki a ia; totoro mai ana ona manga ki a ia, kia whakamakukuria ai e ia i nga wahi i whakatokia ai.
8
He mea whakato ia ki te mara pai ki te taha o nga wai nui, kia tupu ai nga manga, kia hua ai nga hua, kia tino pai ai taua waina.
9
Mea atu, Ko te kupu tenei a te Ariki a Ihowa, E tupu ranei? e kore ianei e hutia atu e ia ona pakiaka? e kore ianei e tapahia atu ona hua, a ka maroke? ka maroke ano ona rau katoa e pihi mai ana, e kore ano hoki e nui te ringa, e kore e nui te iwi hei huaranga atu.
10
Na, whakatokia atu, e tupu ranei? e kore ianei e maroke rawa, ina pa atu te hau, te marangai, ki a ia? ka maroke ano i te tupuranga i pihi ake ai.
11
A, i puta mai ano te kupu a Ihowa ki a au, i mea,
12
Tena, mea atu ki te whare whakakeke, E kore ranei koutou e mohio ki te tikanga o enei mea? mea atu, Nana, kua tae mai te kingi o Papurona ki Hiruharama, a, tangohia atu ana e ia to reira kingi, ratou ko ona rangatira, kawea atu ana ratou e ia ki Papurona;
13
Na, kua mau ia ki te uri kingi, whakaritea ana e ia he kawenata ki a ia, whakaoatitia ana ia e ia; kua tangohia ano e ia te hunga nunui o te whenua;
14
Kia iti ai tana kingitanga, kia kaua ai e neke ake, a, he turanga mona, ko runga ano i te pupuri i tana kawenata.
15
Heoi whakakeke ana ia ki a ia, ungā ana e ia ana karere ki Ihipa kia homai ai etahi hoiho ki a ia, etahi tangata ano hoki, he tokomaha. E tika ranei tana? e mawhiti ranei te kai mahi o enei mea? e whakatakā ranei e ia te kawenata, a mawhiti ake?
16
E ora ana ahau, e ai ta te Ariki ta Ihowa, ina, i te wahi ano o te kingi nana nei ia i whakakingi, nāna nei te oati i whakahaweatia e ia, nāna nei te kawenata i whakatakā e ia, i tona taha ano i waenganui o Papurona ka mate ia.
17
Na, ahakoa he nui te ope, he nui te huihui, kahore he wahi a Parao ki a ia i te whawhaitanga, i te mea ka haupuria ake he pukepuke, a ka hangā nga taumaihi e hatepea atu ai nga tangata tokomaha.
18
Whakahaweatia iho e ia te oati, whakatakā ana e ia te kawenata, i te mea nei ano kua hoatu e ia tona ringa, a kua mahia enei mea katoa: e kore ia e mawhiti.
19
Mo reira ko te kupu tenei a te Ariki a Ihowa; E ora ana ahau, ka utua e ahau ki runga ki tona mātenga taku oati i whakahaweatia e ia, me taku kawenata ano i whakatakā nei e ia.
20
Ka horahia ano hoki e ahau taku kupenga ki runga ki a ia, a ka mau ia i taku rore, ka kawea ano ia e ahau ki Papurona, ka whakawakia ano hoki ia e ahau ki reira mo tona he i he ai ia ki a au.
21
Na, ona whati katoa, me ona ropu katoa, ka hinga ratou i te hoari, ka whakamararatia atu ano hoki nga morehu ki nga hau katoa; a ka mohio koutou naku na Ihowa te kupu.
22
Ko te kupu tenei a te Ariki a Ihowa, Ka tangohia mai ano hoki e ahau tetahi wahi o to runga manga a te hita tiketike, a ka whakatupuria; ka katohia mai e ahau tetahi mea ngawari i te matamata o ona rārā hou, a ka whakatokia ki runga ki te maunga tiketike e purero ana ki runga:
23
Ka whakatokia ano e ahau ki te maunga tiketike o Iharaira, a ka wana ona manga, ka hua nga hua; te putanga he hita pai, ka noho ano hoki nga manu katoa, ia parirau, ia parirau, ki raro i a ia; ka noho ratou ki te taumarumarunga iho o ona manga.
24
A, ka mohio nga rakau katoa o te parae, naku na Ihowa i whakaiti te rakau tiketike, naku i tiketike ai te rakau papaku; naku i whakamaroke te rakau kaiota, naku hoki i tupu ai te rakau maroke: naku na Ihowa te kupu, naku ano i mahi.