- 1
- Na, i te tekau ma tahi o nga tau, i te tahi o nga ra o te marama, ka puta mai te kupu a Ihowa ki a au; i mea ia,
- 2
- E te tama a te tangata, kua mea na a Taira ki Hiruharama, Ha, kua pakaru! ko nga kuwaha ano ia o nga iwi: kua anga mai ia ki a au; ka maha aku, i te mea ka whakaururuatia nei ia.
- 3
- Mo reira ko te kupu tenei a te Ariki a Ihowa; Nana, hei hoa riri tenei ahau mou, e Taira, a ka meinga e ahau nga iwi maha kia eke mai ki a koe, kia pera ano me te moana e mea nei i ona ngaru kia eke ake.
- 4
- A ka kore i a ratou nga taiepa o Taira, ka pakaru ano hoki ona pourewa i a ratou; ka tahia atu ano e ahau tona puehu i runga i a ia, ka meinga ano ia e ahau kia rite ki te tihi o te kamaka.
- 5
- Ka waiho hei horahanga kupenga i waenga moana: naku hoki te kupu, e ai ta te Ariki ta Ihowa: ka waiho ano hei pahuatanga ma nga iwi.
- 6
- Na, ana tamahine i te mara, ka tukitukia ratou e te hoari; a ka mohio ratou ko Ihowa ahau.
- 7
- No te mea ko te kupu tenei a te Ariki a Ihowa; Tenei te kawea atu nei e ahau i te nota ki Taira a Nepukararetara kingi o Papurona, kingi o nga kingi, me nga hoiho, me nga hariata, me nga hoia eke hoiho, me te huihui, me te iwi nui.
- 8
- Ka patua e ia ki te hoari o tamahine i te mara: ka hangā ano e ia he taumaihi hei tatauranga atu ki a koe, ka haupuria ake ano he pukepuke hei tatauranga atu ki a koe, ka ara ano i a ia te puapua ki a koe.
- 9
- Ka whakaturia ano e ia nga mea whawhai ki o taiepa, ka wahia ano hoki e ia ou pourewa ki ana titaha.
- 10
- He tini ke ana hoiho, a ka taupokina koe e to ratou puehu: o taiepa, oioi rawa i te haruru o nga hoia eke hoiho, o nga wira, o nga hariata, ina tomokia e ia o kuwaha, ina pera ia me te hunga e tomo ana ki roto ki te pa kua pakaru.
- 11
- Ka takatakahia o huarahi katoa e nga waewae o ana hoiho: ka tukitukia e ia tou iwi ki te hoari, ka riro iho ano hoki o pou kaha ki te whenua.
- 12
- Ka pahuatia ano hoki e ratou o taonga, a hei taonga parakete o mea hokohoko: ka wahia iho ano hoki e ratou o taiepa, ka pakaru ano o whare, e matenuitia ana e koe: ka makā ano e ratou o kohatu, o rakau, me to puehu, ki te wai.
- 13
- Ka mutu ano i a au te ngahau o o waiata, e kore ano hoki te tangi o o hāpa e rangona a muri ake nei.
- 14
- A, ka meinga koe e ahau kia rite ki te tihi o te kamaka: ka waiho koe hei horahanga kupenga; e kore koe e hangā a muri ake nei: naku hoki na Ihowa te kupu, e ai ta te Ariki ta Ihowa.
- 15
- Ko te kupu tenei a te Ariki a Ihowa ki a Taira, E kore ianei nga motu e wiri i te haruru o to hinganga, ina aue te tangata i werohia, ina hinga te parekura i roto i a koe?
- 16
- Ko reira ano nga rangatira katoa o te moana heke iho ai i runga i o ratou torona; o ratou koroka whakarere rawa, o ratou kakahu whakairo unu rawa: te kakahu mo ratou ko te wiri; ka noho ki runga ki te whenua, hono tonu te wiri, ketekete tonu ki a koe.
- 17
- Ka maranga ano ta ratou tangi ki a koe, ka mea ratou ki a koe, Taukiri e, kua ngaro koe, e te pa o te hunga rere moana; e te pa ingoa-nui i kaha nei i runga i te moana, a ia me ona tangata ano, e mea nei i to ratou wehi kia pa atu ki te hunga katoa e noho ana i reira!
- 18
- Akuanei nga motu wiri ai i te ra e hinga ai koe; ina, ka ohorere nga motu o te moana i te mea ka riro nei koe.
- 19
- No te mea ko te kupu tenei a te Ariki a Ihowa; I te wa e meinga ai koe e ahau hei pa kua ururuatia, e rite ana ki nga pa kahore e nohoia; i te wa e kawea atu ai e ahau te rire ki runga ki a koe, a ka taupokina koe e nga wai nui;
- 20
- I te wa ano e whakahokia iho ai koe e ahau ki raro, i roto i te hunga e heke atu ana ki te rua, i nga tangata ano onamata, a ka meinga koe kia noho i nga wahi o raro o te whenua, i nga wahi mokemoke onamata, i roto i te hunga e heke atu ana ki te poka, kore iho koe e nohoia; a ka hoatu ano e ahau he kororia ki te whenua o te hunga ora;
- 21
- Ka meinga koe e ahau hei wehi, a moti iho koe: ka rapua ano koe, a kore noa iho e kitea, a ake ake ake, e ai ta te Ariki ta Ihowa.
Address: 
Phone: 
Email: