- 1
- I puta mai ano te kupu a Ihowa ki a au, i mea,
- 2
- Kia anga atu akuanei to tangi, e te tama a te tangata, ki Taira;
- 3
- Mea atu hoki ki Taira, Nou te kāinga i te tapokoranga mai o te moana, ko koe te kai hokohoko o nga iwi ki nga motu maha, Ko te kupu tenei a te Ariki a Ihowa; E Taira, kua mea na koe, Ko au te mea ataahua rawa.
- 4
- Kei waenga moana o rohe, oti rawa koe te whakaataahua e o kai hanga.
- 5
- No nga kauri o Heniri nga papa katoa i hanga ai koe hei kaipuke; i tikina atu ano e ratou he hita i Repanona hei hanga rewa mou.
- 6
- No nga oki o Pahana nga hoe i hangā mou, o taumanu he mea hanga ki te rei, he mea kua oti te whakanoho ki te ake i kawea mai i nga motu o Kitimi.
- 7
- He rinena pai, he mea whakairo no Ihipa te mea i wherahia e koe hei ra mou; te hipoki mou, he pūru, he papura no nga motu o Eriha.
- 8
- Ou kai whakatere ko nga tangata o Hairona, o Arawara; o kai urunga ko o tangata whakaaro nui i roto na i a koe, e Taira.
- 9
- I roto nga kaumatua o Kepara i a koe, me nga tangata whakaaro nui o reira ano hei kai mono mou: i a koe nga kaipuke katoa o te moana, me o ratou kai whakatere ano, hei hoko i o taonga.
- 10
- I roto i to ope ko Pahia, ko Ruru, ko Putu, he tangata whawhai nau: whakairihia ake ana e ratou te puapua me te potae i roto i a koe; he mea whakahonore koe na ratou.
- 11
- I runga i o taiepa nga tangata o Arawara me to ope ano, a tawhio noa, i roto i o pourewa nga Kamarimi: whakairihia ana e ratou a ratou whakangungu rakau ki o taiepa a tawhio noa: oti rawa koe te whakaataahua e ratou.
- 12
- He kai hokohoko a Tarahihi ki a koe, he nui hoki no o taonga katoa: ta ratou i tuku ai i o hokohokonga he hiriwa, he rino, he tine, he matā.
- 13
- Ko Tawana, ko Tupara, ko Meheke, he kai hokohoko ratou nau; ta ratou i tuku ai i o kāinga hoko, he tangata, he oko parahi.
- 14
- Nga tangata o te whare o Tokarama, ta ratou i tuku ai i o hokohokonga he hoiho, he tangata eke hoiho, he muera.
- 15
- He kai hokohoko nau nga tangata o Rerana, he maha nga motu i hokohokona ai nga taonga e koe: kawea mai ana e ratou he hakari ki a koe, he haona rei, he eponi.
- 16
- He kai hokohoko nau a Hiria, i te nui hoki o o mahi: ta ratou i tuku ai i o hokohokonga he emerara, he papura, he mea whakairo, he rinena pai, he peara, he akate.
- 17
- Ko Hura, ko te whenua o Iharaira, ko ratou o kai hokohoko: ta ratou i tuku ai i o kāinga hoko he witi no Miniti, no Panaka, he honi, he hinu, he pama.
- 18
- He kai hokohoko nau a Ramahiku, he nui no o mahi, he nui no nga taonga katoa; ta ratou, he waina no Herepono, he huruhuru hipi ma.
- 19
- I tuku taonga a Rana, a Tawana, a Meutara i roto i o hokohokonga; i to kāinga hoko ko te rino kua oti te mahi, ko te kahia, te kakahu pai.
- 20
- Ko Rerana to kai hokohoko i nga kakahu utu nui mo nga hariata.
- 21
- Ko Arapia, ko nga rangatira katoa o Kerara, i hokohokona o ratou taonga e koe, nga reme, nga hipi toa, nga koati: ko nga mea ena i hokohoko ai ratou ki a koe.
- 22
- Nga kai hokohoko o Hepa, o Raama, he kai hokohoko ano ratou nau: ta ratou i tuku ai i o hokohokonga ko nga mea pai rawa o nga kinaki reka katoa, ko nga kohatu utu nui katoa, ko te koura.
- 23
- Ko Harana, ko Kane, ko Erene, ko nga kai hokohoko o Hepa, ko Ahuru, ko Kirimara, he kai hokohoko nau.
- 24
- Ko ratou hei hoko i nga mea pai rawa ki a koe, i nga kakahu pūru, i te mea whakairo, i nga pouaka kakahu pai, he mea paihere ki nga aho, he hita, i roto ano i o taonga hoko.
- 25
- I waiatatia koe e nga kaipuke o Tarahihi i to kāinga hoko: he maha rawa o mea, a, nui atu tou kororia i waenga moana.
- 26
- I kawea koe e o kai hoe ki nga wai maha: i pākarua koe e te hau, e te marangai, i waenga moana.
- 27
- O taonga, o hokohokonga, o whakawhitiwhitinga, o kai whakatere kaipuke, o kai urunga, o kai mono, me nga kai whakawhitiwhiti i o taonga, me o tangata whawhai katoa i roto i a koe, i roto ano i to whakaminenga katoa i waenganui i a koe,—ka taka ratou ki waenga moana i te ra e hinga ai koe.
- 28
- Ka ngateri a waho o te pa i te ngangau, i te hamamatanga a o kai urunga.
- 29
- Na, nga tangata katoa e rahurahu ana i te hoe, nga kai whakatere, nga kai urunga katoa o te moana,—ka mahuta mai ratou i runga i o ratou kaipuke, ka tu ki te tuawhenua.
- 30
- Ka meinga ano e ratou to ratou reo mou kia rangona, tiwerawera ana ta ratou tangi, ka opehia ano e ratou he puehu ki o ratou māhunga, ka takaoriori ano hoki ratou ki te pungarehu.
- 31
- Moremore rawa ratou i te whakaaro hoki ki a koe, he kakahu taratara te whitiki, mamae rawa te ngakau, tiwerawera te tangi e tangi ai ratou ki a koe.
- 32
- I a ratou ano e tangi ana, ka maranga ta ratou tangi whakaoriori mou, ka uhunga ratou ki a koe, ka mea, Ko tehea pa i rite ki Taira, ki tenei i whakangaromia nei i waenga moana?
- 33
- I te putanga atu o o taonga i nga moana, he maha nga iwi i makona i tau; i whai taonga nga kingi o te whenua i a koe, i te nui hoki o o taonga, o o rawa.
- 34
- I te wa e pakaru ai koe i nga moana, i nga wahi hohonu o te moana, ka taka o rawa, me to whakaminenga katoa i waenganui i a koe.
- 35
- Nga tangata katoa o nga motu, ketekete ana ratou ki a koe, nui atu te wehi o o ratou kingi, o ratou mata kohikohi ana.
- 36
- Ka whakahi mai ki a koe nga kai hokohoko i roto i nga iwi; ka ai koe hei whakawehi; kore tonu ake koe.
Address: 
Phone: 
Email: