- 1
- I puta mai ano te kupu a Ihowa ki a au, i mea,
- 2
- E te tama a te tangata, mea atu ki te rangatira o Taira; Ko te kupu tenei a te Ariki a Ihowa; Na, kua whakakake na tou ngakau, a kua mea na koe, He atua ahau, e noho ana i te nohoanga o te Atua i waenga moana; heoi he tangata nei ano koe, ehara i te atua, i te mea ka whai ake to ngakau ki to te Atua ngakau.
- 3
- Nana, nui atu o whakaaro i o Raniera, kahore he mea ngaro e taea te huna i a koe.
- 4
- He nui no o whakaaro, he matauranga nou i mahia ai e koe he taonga mou, i mahia ai e koe he koura, he hiriwa, ki roto ki o whare taonga.
- 5
- He nui noa atu no o whakaaro, he hokohoko nau, i whakaraneatia ai e koe o rawa, a whakakake ana to ngakau i o rawa.
- 6
- Mo reira ko te kupu tenei a te Ariki a Ihowa, Na, kua whai ake to ngakau ki to te Atua ngakau;
- 7
- Mo reira, tenei ahau te kawe atu nei i nga tautangata ki a koe, te hunga nanakia rawa o nga iwi; a ka unuhia e ratou a ratou hoari, hei whawhai ki te ataahua o o whakaaro nui, ka whakapokea ano hoki e ratou to kanapatanga.
- 8
- Ka whakahokia iho koe e ratou ki te poka, a, to matenga ko nga matenga o te hunga e patua ana i waenga moana.
- 9
- E mea ake ano ranei koe ki te aroaro o to kai patu, Ko te Atua ahau? otiia hei tangata ano koe, e kore ano koe e whaka-atua i roto i te ringa o to kai patu.
- 10
- To matenga ko nga matenga o te hunga kokoti-kore i te ringaringa o nga tautangata: naku hoki te kupu, e ai ta te Ariki ta Ihowa.
- 11
- I puta mai ano te kupu a Ihowa ki a au; i mea.
- 12
- E te tama a te tangata, kia ara to tangi mo te kingi o Taira, mea atu hoki ki a ia, Ko te kupu tenei a te Ariki a Ihowa; Kua oti te toitutanga te hīri e koe, kī tonu koe i nga whakaaro nui, he ataahua e rite rawa ana.
- 13
- I Erena koe i te kāri a te Atua e noho ana; to hipoki ko nga kohatu utu nui katoa, ko te harariu, ko te topaha, ko te raimona, ko te perira, ko te onika, ko te ahapa, ko te hapaira, ko te emerara, ko te kapukara, ko te koura: i whakapaia ano te mahi o o timipera, o o putorino i roto i a koe i te ra i hangā ai koe.
- 14
- Ko koe te herupa hipoki, te mea i whakawahia; naku ano koe i mea hei pena: i runga koe i te maunga tapu o te Atua; i haereere ano koe i roto i nga kohatu ahi.
- 15
- Tapatahi tonu koe i o ara, i te rangi ra ano i hangā ai koe, a taea noatia te kitenga o te he i roto i a koe.
- 16
- He nui no o hokohokonga i ki ai a roto i a koe i te tutu, a hara iho koe; mo reira ka makā atu koe te mea poke e ahau i te maunga o te Atua: ka ngaro ano koe, e te kerupa hipoki, i roto i nga kohatu ahi.
- 17
- Kua whakakake to ngakau ki to ataahua, na tou kanapatanga i he ai o whakaaro nui: ka pangā koe e ahau ki te whenua, ka tukua koe e ahau ki te aroaro o nga kingi, kia matakitaki ai ratou ki a koe.
- 18
- Kua whakapokea e koe o wahi tapu ki te maha o o kino, ki te he, i a koe i hokohoko ra; mo reira ka whakaputaina mai e ahau he ahi i roto i a koe, hei kai i a koe, ka meinga ano koe e ahau hei pungarehu ki runga ki te whenua i te tirohanga mai a te hunga katoa e kite ana i a koe.
- 19
- Te hunga katoa e mohio ana ki a koe i roto i nga iwi ka miharo ki a koe: ka ai koe hei whakawehi, kore tonu ake koe.
- 20
- I puta mai ano te kupu a Ihowa ki a au; i mea,
- 21
- E te tama a te tangata, anga atu to mata ki Hairona, poropititia hoki te he mo reira,
- 22
- Mea atu, Ko te kupu tenei a te Ariki a Ihowa; Nana, hei hoa riri ahau mou, e Hairona; ka whai kororia ano hoki ahau i roto i a koe: a ka mohio ratou ko Ihowa ahau, ina mahia e ahau nga whakaritenga whakawa i roto i a ia, ina ka whakatapua ahau i roto i a ia.
- 23
- Ka ungā atu hoki e ahau te mate uruta ki a ia, me te tote ki ona huarahi; ka whakawakia ano hoki te hunga i werohia i roto i a ia; mea rawa ki te hoari i runga i a ia a tawhio noa; a ka mohio ratou ko Ihowa ahau.
- 24
- Kahore hoki he tataramoa ngau a muri ake nei o te whare o Iharaira, kahore he tumatakuru whakamamae a te hunga katoa i tetahi taha o ratou, i tetahi taha, a te hunga ra i whakahawea ki a ratou; a ka mohio ratou ko te Ariki ahau ko Ihowa.
- 25
- Ko te kupu tenei a te Ariki a Ihowa; Ka oti te whare o Iharaira te kohikohi e ahau i roto i nga iwi i whakamararatia atu ai ratou, a ka oti ahau te whakatapu i runga i a ratou i te tirohanga mai a nga iwi, ko reira ratou noho ai ki to ratou oneone i hoatu e ahau ki taku pononga ki a Hakopa.
- 26
- Ka noho ano ratou ki reira, tē ai he wehi, ka hanga whare ano ratou, ka whakato mara waina, ka ata noho ano hoki, ina mahia e ahau nga whakaritenga whakawa ki te hunga katoa i whakahawea ki a ratou i tetahi taha o ratou, i tetahi taha; a ka mohio ratou ko ahau a Ihowa, ko to ratou Atua.
Address: 
Phone: 
Email: