Genesis Chapter 23 - Paipera Tapu 1868 | Te Paipera Tapu 1868

Genesis Chapter 23 - Paipera Tapu 1868

1
A kotahi rau e rua tekau ma whitu nga tau i ora ai a Hara: ko nga tau enei i ora ai a Hara.
2
Na, ka mate a Hara ki Kiriata-arapa; ara, ki Heperona, i te whenua o Kanaana: a ka haere mai a Aperahama ki te uhunga ki a Hara, ki te tangi hoki ki a ia.
3
A ka whakatika ake a Aperahama i mua mai i tana tupapaku, ka korero atu ki nga tamariki a Hete, ka mea atu,
4
He manene, he noho noa iho ahau i roto i a koutou: homai ki a au tetahi wahi hei tanumanga i roto i a koutou, kia tanumia ai e ahau taku tupapaku, kia ngaro atu i taku tirohanga.
5
Na, ka whakahokia mai e nga tamariki a Hete ki a Aperahama, a ka mea ki a ia,
6
Whakarongo mai ki a matou, e toku ariki: he rangatira nui koe i roto i a matou: whiriwhiria e koe tetahi o a matou urupa, ka tanu ai i to tupapaku; e kore e kaiponuhia tana urupa ki a koe e tetahi o matou hei tanumanga mo to tupapaku.
7
Na, ka whakatika ake a Aperahama, ka tuohu iho ki nga tangata whenua, ki nga tamariki a Hete.
8
A ka korero ki a ratou, ka mea, Ki te whai ngakau koutou kia tanumia e ahau taku tupapaku kia ngaro atu i taku tirohanga; whakarongo mai ki a au, korerotia ahau ki a Eperona tama a Tohara,
9
Kia homai e ia ki a au tana ana a Makapera, i te pito o tona wahi oneone; kia homai e ia ki a au mo nga moni e rite ana hei utu, kia puritia e ahau hei urupa i waenganui i a koutou.
10
A i roto ano i nga tamariki a Hete a Eperona e noho ana: na ka whakahokia mai e Eperona Hiti ki a Aperahama, me te whakarongo mai ano nga tamariki a Hete, nga tangata katoa hoki i tomo i te kuwaha o tana pa, a ka mea mai,
11
Kahore, e toku ariki, whakarongo mai ki a au: me hoatu e ahau tena wahi ki a koe, me te ana i reira; ina, me hoatu e ahau ki a koe; ka hoatu nei ahau ki a koe i te tirohanga mai o nga tamariki a toku iwi: tanumia ra to tupapaku.
12
Na, ka tuohu iho a Aperahama i te aroaro o nga tangata whenua.
13
A ka korero atu ki a Eperona, me te whakarongo mai nga tangata whenua, ka mea, Erangi ki te homai e koe, whakarongo mai ra ki a au: me hoatu e ahau he hiriwa ki a koe mo taua wahi; tangohia atu, a ka tanumia e ahau taku tupapaku ki reira.
14
Na, ko te whakahokinga mai a Eperona ki a Aperahama, ka mea ki a ia,
15
Whakarongo mai, e toku ariki, ki a au: E wha rau hekere hiriwa nga utu e rite mo taua wahi; hei aha tena ma taua? tanumia ra to tupapaku.
16
Na, ka whakarongo a Aperahama ki a Eperona; a paunatia atu ana e Aperahama ki a Eperona te hiriwa i korerotia e ia i te aroaro o nga tamariki a Hete, e wha rau nga hekere hiriwa, no nga moni e tangohia ana e nga kai hokohoko.
17
Na, whakapumautia ana te wahi oneone o Eperona, i Makapera, i te ritenga mai o Mamere, te oneone, me te ana i reira, me nga rakau katoa hoki i runga i te oneone, i roto i ona rohe katoa, a tawhio noa,
18
Hei kāinga mo Aperahama i te tirohanga a nga tamariki a Hete, i te aroaro o nga tangata katoa i tomo i te kuwaha o tona pa.
19
A muri iho ka tanumia e Aperahama a Hara tana wahine ki roto ki te ana i te wahi i Makapera i te ritenga mai o Mamere, ara, o Heperona i te whenua o Kanaana.
20
Heoi whakapumautia ana e nga tamariki a Hete taua wahi, me te ana i reira, mo Aperahama kia puritia hei tanumanga.