Genesis Chapter 24 - Paipera Tapu 1868 | Te Paipera Tapu 1868

Genesis Chapter 24 - Paipera Tapu 1868

1
Na, kua koroheketia a Aperahama, kua maha haere ona ra: a he mea manaaki a Aperahama na Ihowa i nga meatanga katoatanga.
2
Na, ka mea a Aperahama ki te kaumatua o ana pononga i roto i tona whare, ki te kai whakahaere o ana mea katoa, Tena, whakapakia mai tou ringa ki raro ki toku huha:
3
A me whakaoati koe e ahau ki a Ihowa, ki te Atua o te rangi ki te Atua hoki o te whenua, kia kaua e tangohia mai e koe he wahine ma taku tamaiti i roto i nga tamahine a nga Kanaani, a te iwi e noho nei ahau i roto i a ratou:
4
Engari me haere ki toku whenua, me oku whanaunga, ka tango mai ai i tetahi wahine ma taku tamaiti ma Ihaka.
5
Na, ka mea atu te pononga ki a ia, Tera pea e kore e pai te wahine ki te whai mai i muri i a au ki tenei whenua: me whakahoki atu ranei e ahau to tamaiti ki te whenua i haere mai nei koe i reira?
6
A ka mea a Aperahama ki a ia, Kia tino mohio koe, kei whakahokia atu e koe taku tamaiti ki reira.
7
Ko Ihowa, ko te Atua o te rangi, nana nei ahau i tango mai i roto i te whare o toku papa, i te whenua hoki i whanau ai ahau, nana nei hoki i korero mai ki a au, i oati mai koki ki a au, i mea, Ka hoatu e ahau tenei whenua ki ou uri; mana e tono tana anahera ki mua i a koe, a ka riro mai i a koe tetahi wahine ma taku tamaiti i reira.
8
A, ki te kahore te wahine e pai ki te whai mai i a koe, katahi koe ka watea i tenei oati aku: otiia kaua e whakahokia atu e koe taku tamaiti ki reira.
9
Na, ka whakapakia e te pononga tona ringa ki raro i te huha o Aperahama o tona ariki, a rite tonu ki tenei kupu tana oati ki a ia.
10
Na, ka tangohia e te pononga etahi kamera kotahi tekau i roto i nga kamera a tona ariki, a haere ana; i tona ringa hoki nga rawa katoa o tona ariki: a whakatika ana ia, haere ana ki Mehopotamia, ki te pa o Nahora.
11
Na, ka mea ia i nga kamera kia tuturu nga turi ki te taha o te puna wai i waho o te pa i te ahiahi, i te wa e puta mai ai nga wahine ki te utu wai.
12
A ka mea ake, E Ihowa, e te Atua o toku ariki o Aperahama, tena ra, kia whai wahi ahau akuanei, whakaputaina mai hoki he aroha ki toku ariki ki a Aperahama.
13
Tenei ahau te tu nei i te taha o te puna wai; a e haere mai ana nga tamahine a nga tangata o te pa ki te utu wai:
14
A ko te kotiro e mea ai ahau ki a ia, Tukua iho ra to oko kia inu ai ahau; a ka mea mai ia, Inumia, a me whakainu ano hoki e ahau o kamera: kia rite mai ia i a koe ma to pononga ma Ihaka; a ma reira ka mohio ai ahau e whakaputa aroha ana koe ki toku ariki.
15
Heoi, kiano i mutu noa tana korero, na, kua puta mai a Ripeka tamahine a Petuere, tama a Mireka, ko te wahine hoki tera a Nahora teina o Aperahama, me tana oko i runga i tona pokohiwi.
16
A he pai rawa te kotiro ki te titiro atu, he wahina, kahore ano tetahi tangata kia mohio ano ki a ia: na, ka heke iho ia ki te puna, ka whakaki hoki i tana oko, a ka haere ake.
17
Na, ka rere iho te pononga ki te whakatau i a ia, a ka mea atu, Tukua ahau kia inu, ne? i tetahi wahi o te wai o to oko.
18
A ka mea mai ia, Inumia, e toku ariki: na, ka hohoro ia te tuku iho i tana oko ki runga ki tona ringa, a whakainumia ana ia.
19
A ka mutu tana whakainu i a ia, na ka mea mai ia, Me utu ano hoki e ahau mo o kamera, kia poto ra ano ratou te whakainu.
20
Na, ka hohoro ia te riringi atu i te wai o tana oko ki roto ki te kumete, a rere ana ano ki te puna, ki te utu, a utuhia mai ana e ia mo ana kamera katoa.
21
Ko taua tangata hoki, matatau tonu mai tana titiro ki a ia, kihai hoki i hamumu, kia mohio ai ia e whakatikaia ranei e Ihowa tana ara, kahore ranei.
22
A ka mutu te inu o nga kamera, na, ka tikina e taua tangata tetahi whakakai koura, he hawhe hekere tona taimaha, me nga poroporo e rua mo ona ringa, kotahi tekau nga hekere koura te taimaha;
23
A ka mea mai, Na wai koe tamahine? tena, korerotia mai ki a au: kei te whare ranei o tou papa tetahi wahi hei moenga mo matou?
24
Na, ka mea ia ki a ia, He tamahine ahau na Petuere na te tama a Mireka, i whanau nei i a raua ko Nahora.
25
A i mea ano ia ki a ia, He nui a matou kakau witi, me a matou otaota hei kai, me tetahi wahi hoki hei moenga.
26
Na, tuohu ana taua tangata, a koropiko ana ki a Ihowa.
27
A ka mea, Kia whakapaingia a Ihowa te Atua a toku rangatira o Aperahama, kihai nei i whakahapa i toku rangatira ki tona aroha me tona pono: i a au ano i te ara ka aratakina mai ahau e Ihowa ki te whare o nga teina o toku rangatira.
28
Na, ka oma atu te kotiro, a korerotia atu ana e ia enei mea ki te whare o tona whaea.
29
A he tungane ano to Ripeka, tona ingoa ko Rapana; na, ka rere atu a Rapana ki taua tangata, ki waho ki te puna.
30
A, i tona kitenga i te whakakai me nga poroporo i nga ringa o tona tuahine, a ka rongo ki nga kupu a Ripeka a tona tuahine, ki tana meatanga mai, I penei mai nga korero a taua tangata ki a au; na, ka haere mai ia ki taua tangata, a i te taha ano o nga kamera i te puna ia e tu ana.
31
A ka mea, Haere mai, e te manaakitanga a Ihowa; na te aha koe i tu ai i waho? kua oti hoki i a au te whare te whakapai, me tetahi wahi hoki mo nga kamera.
32
Na, ka haere atu taua tangata ki te whare: a wetekina ana e ia nga mea o nga kamera, i homai ano he kakau witi me tetahi otaota hei kai ma nga kamera, me tetahi wai hei horoi mo ona waewae, mo nga waewae hoki o ona hoa.
33
Na, ka whakatakotoria he kai ki tona aroaro; a ka mea ia, E kore ahau e kai, kia korerotia ra ano e ahau taku korero. A ka mea mai tera, Korerotia.
34
Na, ka mea atu ia, He pononga ahau na Aperahama.
35
A kua manaakitia rawatia toku ariki e Ihowa; kua nui ia: a kua homai ano ki a ia he hipi, he kau, he hiriwa, he koura, he pononga tane, he pononga wahine, he kamera, he kaihe.
36
A kua whanau ano hoki tetahi tamaiti ma toku ariki i a Hara, i te wahine a toku ariki, i a ia kua ruruhitia: a kua hoatu e ia ana mea katoa ki a ia.
37
A i whakaoati ano toku ariki i a au, i mea mai, Kei tangohia mai e koe tetahi wahine ma taku tamaiti i roto i nga tamahine a nga Kanaani, e noho nei ahau i to ratou whenua:
38
Engari me haere koe ki te whare o toku papa, ki oku whanaunga hoki, ka tango mai ai i tetahi wahine ma taku tamaiti.
39
Na, ko taku meatanga atu ki toku ariki, E kore pea te wahine e aru mai i a au.
40
A ka mea mai ia ki a au, Ma Ihowa, kei tona aroaro nei taku haereerenga, mana e tono tana anahera hei hoa, mana hoki e whakatika to ara; a ka tango mai koe i tetahi wahine ma taku tamaiti i roto i oku whanaunga, i roto hoki i te whare o toku papa:
41
Katahi koe ka watea i taku oati, ki te haere koe ki oku whanaunga; a ki te kahore e homai e ratou ki a koe, na, ka watea ano koe i taku oati.
42
A taku haerenga mai inaianei ki te poka, na, ka mea ahau, E Ihowa, e te Atua o toku ariki o Aperahama, ki te mea e whakatika ana koe i taku ara e haere nei ahau:
43
Na, tenei ahau te tu nei i te taha o te poka wai; a te kotiro e puta mai ki te utu, a ka mea ahau ki a ia, Homai he wai moku i roto i to oko kia inu ahau;
44
A ka mea mai ia ki a au, Inumia, a me utu ano e ahau mo o kamera: kia rite mai ano ia i a Ihowa hei wahine ma te tamaiti a toku ariki.
45
Kiano i mutu noa taku korero i roto i toku ngakau, na, ko te putanga mai o Ripeka me tana oko i runga i ona pokohiwi: a ka heke atu ki te poka ki te utu: na, ka mea ahau ki a ia, Homai, kia inu ahau, ne?
46
Na, ka hohoro ia, a tukua iho ana e ia tana oko i runga i a ia, a ka mea mai, Inumia, a me whakainu ano hoki e ahau o kamera: na, inu ana ahau, a i whakainumia ano hoki e ia nga kamera.
47
Na, ka ui atu ahau ki a ia, ka mea atu, He tamahine koe na wai? A ka mea mai ia, He tamahine na Petuere, na te tama a Nahora, i whanau nei ma raua ko Mireka: na, ka kuhua e ahau te whakakai ki tona ihu, me nga poroporo ano hoki ki ona ringaringa.
48
Na, ka tungou iho ahau, a ka koropiko atu ki a Ihowa, ka whakapai hoki i a Ihowa i te Atua o toku ariki o Aperahama, mona i arahi i a au i te huarahi tika ki te tiki mai i te tamahine a te teina o toku ariki ma tana tamaiti.
49
Na, ki te mea e whai aroha ana koutou, e whai pono ana ki toku ariki, korerotia mai ki a au: a ki te kahore, korerotia mai ki a au; kia tahuri atu ai ahau ki matau ranei, ki maui ranei.
50
Na, ka whakahokia mai e Rapana raua ko Petuere a ka mea, I puta mai tenei mea i a Ihowa: e kore e taea te pai, te kino ranei te korero atu e maua ki a koe.
51
Nana, kei tou aroaro a Ripeka, tangohia, haere, a kia meinga ia hei wahine ma te tamaiti a tou ariki, hei pera me ta Ihowa i korero ai.
52
A ka rongo te pononga a Aperahama i a raua korero, na koropiko ana ia ki te whenua, ki a Ihowa.
53
A ka tangohia mai e te pononga he mea hiriwa, he mea koura, he kakahu, hoatu ana e ia ki a Ripeka: a i hoatu ano e ia etahi mea tino papai ki tona tungane raua ko tona whaea.
54
Na, ka kai ratou, ka inu, ratou tahi ko ona hoa haere, a ka moe ratou; a ka ara ratou i te ata, na, ka mea atu ia Tukua ahau kia haere ki toku ariki.
55
Na, ka mea mai tona tungane raua ko tona whaea, Kia noho te kotiro ki a matou i etahi ra, kia kotahi pea tekau; muri iho, ka haere.
56
Na, ka mea ia ki a raua, Kaua ahau e whakawarea, he mea hoki kua whakatikaia nei taku ara e Ihowa; tukua atu ahau kia haere ki toku ariki.
57
Na, ka mea mai raua, Me karanga te kotiro e maua, a ka ui atu ki tona mangai.
58
Na, ka karanga raua i a Ripeka, a ka mea ki a ia, Ka haere ranei koe i tenei tangata? A ka mea ia, Ka haere ano.
59
Na, tukua atu ana e ratou a Ripeka to ratou tuahine, ratou ko tona kai whakangote, ko te pononga hoki a Aperahama, me ana tangata.
60
Na, ka manaaki ratou i a Ripeka, a ka mea ki a ia, Ko to matou tuahine koe, kia meinga koe hei whaea mo nga mano tini, a kia riro mai i ou uri te kuwaha o o ratou hoa riri.
61
Na, ka whakatika a Ripeka, ratou ko ana kotiro, a eke ana ratou ki runga ki nga kamera, aru ana i taua tangata: Na, ka tango taua pononga i a Ripeka, a haere ana.
62
Na, ka hoki mai a Ihaka i te haere ki te puna i Rahai-roi; i te wahi hoki ki te tonga ia e noho ana.
63
A ka puta mai a Ihaka ki te parae ki te whakaaroaro, i te tuaahiahi: a, te marangatanga ake o ona kanohi, ka titiro mai ia, na ko nga kamera e haere atu ana.
64
A, te marangatanga ake o nga kanohi o Ripeka, na, ka kite i a Ihaka, a ka marere ki raro i te kamera.
65
I mea hoki ia ki te pononga, Ko wai tena tangata e haere mai ra i te parae ki te whakatau i a tatou? A ka mea mai te pononga, Ko toku ariki tena: na, ka mau ia ki tetahi arai-kanohi, a ka hipoki i a ia.
66
Na, ka korerotia mai e te pononga ki a Ihaka nga mea katoa i mea ai ia.
67
Na, ka kawea ia e Ihaka ki te teneti o tona whaea o Hara, a tangohia ana e ia a Ripeka, a ka waiho hei wahine mana; a aroha ana ia ki a ia: a ka whai whakamarietanga a Ihaka i muri iho i tona whaea.