Genesis Chapter 45 - Paipera Tapu 1868 | Te Paipera Tapu 1868

Genesis Chapter 45 - Paipera Tapu 1868

1
A kihai i taea e Hohepa te whakamanawanui i te aroaro o te hunga katoa e tu ana i tona taha; na, ka karanga ia, Kia haere katoa atu nga tangata i toku taha. A kihai i tu tetahi tangata i tona taha, i a Hohepa e whakaatu ana i a ia ki ona tuakana.
2
A, he rahi tona reo ki te tangi: a ka rongo nga Ihipiana, ka rongo ano hoki te whare o Parao.
3
Na, ka mea mai a Hohepa ki ona tuakana, Ko Hohepa ahau; e ora ana ano ranei toku papa? A kihai ona tuakana i ahei te whakahoki kupu mai ki a ia; i pororaru hoki ratou i tona aroaro.
4
A ka mea mai a Hohepa ki ona tuakana, Whakatata mai ra ki a au. A ka whakatata atu ratou. A ka mea ia, Ko Hohepa ahau, ko to koutou teina, i hokona nei e koutou ki Ihipa.
5
Na, kaua ra e pouri, kaua hoki e mumura o koutou kanohi, mo koutou i hoko i a au ki konei: no te mea hoki he mea tono mai ahau e te Atua ki mua i a koutou hei whakaora tangata.
6
No te mea hoki ka rua enei tau o te mate-kai ki te whenua: a kei muri etahi atu tau e rima, e kore ai e parau, e kore ai e kokoti.
7
A kua tonoa mai nei ahau e te Atua ki mua i a koutou kia whai putanga ai koutou ki te ao, kia ora ai hoki koutou i runga i te whakaoranga nui.
8
Ina, ehara i a koutou nana ahau i tono mai, engari na te Atua; a kua waiho ano hoki ahau e ia hei matua ki a Parao, hei ariki ano hoki mo tona whare katoa, hei kawana hoki mo te whenua katoa o Ihipa.
9
Hohoro, haere atu ki runga, ki toku papa, a ka mea atu ki a ia, He penei te kupu a to tamaiti a Hohepa, Kua meinga ahau e te Atua hei ariki mo Ihipa katoa; haere mai ki a au, kaua e whakaroa:
10
A me noho koe ki te whenua o Kohena, a ka tata koe ki a au, koutou, ko o tamariki, ko nga tamariki hoki a o tamariki, me o kahui, me o kau, me o mea katoa:
11
A ka atawhai ahau i a koe ki reira; no te mea hoki e rima enei tau mate-kai kei muri nei; kei rawa-koretia koutou, ko tou whare, me au mea katoa.
12
Na, ka kite nei o koutou kanohi, me nga kanohi hoki o toku teina o Peniamine, ko toku waha tenei te korero atu nei ki a koutou.
13
A ma koutou e korero atu ki toku papa taku kororia katoa i Ihipa, me nga mea katoa i kite nei koutou; a kia hohoro koutou ki te kawe mai i toku papa ki konei.
14
Na, ka hinga ia ki runga ki te kaki o Peniamine o tona teina, a ka tangi, a ka tangi ano hoki a Peniamine i runga i tona kaki.
15
A ka kihi ano ia i ona tuakana katoa, ka tangi hoki ki a ratou: a, muri iho ka korero mai ona tuakana ki a ia.
16
Na, ka tae te rongo ki te whare o Parao, a ka korerotia, Kua tae mai nga tuakana o Hohepa: a he mea pai tena ki te whakaaro a Parao, ki te whakaaro hoki a ana tangata.
17
Na, ka mea mai a Parao ki a Hohepa, Korerotia atu ki o tuakana, Ko tenei ta koutou e mea ai; Whakawahā a koutou kararehe, a whakatika atu, haere ki te whenua o Kanaana;
18
Tikina atu hoki to koutou papa, me nga tangata o o koutou whare, a haere mai ki a au: a ka hoatu e ahau ki a koutou nga mea pai o te whenua o Ihipa, a ka kai koutou i te momonatanga o te whenua.
19
Na, kua whakahaua atu nei koe, meatia tenei e koutou; kawea atu etahi kaata ma koutou i te whenua o Ihipa mo a koutou tamariki, me a koutou wahine, a kawea mai to koutou papa, haere mai hoki.
20
A kaua e whakaaro ki a koutou mea; no te mea hoki mo koutou nga mea pai o te whenua katoa o Ihipa.
21
Na, ka pera ano nga tamariki a Iharaira: o ka hoatu he kaata e Hohepa ki a ratou, ka pera me ta Parao i ki ai, a ka homai ano hoki e ia he o mo ratou ki te ara.
22
A ka homai e ia ki a ratou katoa he whakatakirua mo nga kakahu o tetahi o tetahi; ki a Peniamine ia i homai e ia e toru rau hiriwa, takirima tonu hoki nga kakahu.
23
A ko nga mea tenei i hoatu e ia kia kawea ki tona papa; kotahi tekau nga kaihe e waha ana i nga mea pai o Ihipa, me nga kaihe uha kotahi tekau, ta ratou kawenga he witi, he taro, he kai ma tona papa ki te ara.
24
Na, ka tonoa atu e ia ona tuakana, a haere ana ratou: a ka mea ia ki a ratou, Kei ngangau koutou ki te ara.
25
Na, haere ana ratou ki runga i Ihipa, a ka tae ki te whenua o Kanaana, ki a Hakopa ki to ratou papa,
26
A ka korero ki a ia, ka mea, E ora ana ano a Hohepa, a ko ia ano te kawana o te whenua katoa o Ihipa. Na, ka whakapau te manawa o Hakopa, kihai hoki ia i whakapono ki a ratou.
27
Na, ka korerotia mai e ratou ki a ia nga kupu katoa a Hohepa, i korero ai ia ki a ratou: a ka kite ia i nga kaata i tukua mai e Hohepa hei tiki mai mona, na, ka ora ake te wairua o Hakopa o to ratou papa:
28
Katahi a Iharaira ka mea, Heoi ano; e ora ana ano taku tamaiti a Hohepa: ka haere ahau kia kite i a ia keiwha mate ahau.