- 1
- Na, ka turia atu e Iharaira me ana mea katoa, a ka tae mai ki Peere-hepa, a ka patua e ia etahi patunga tapu ma te Atua o tona papa o Ihaka.
- 2
- Na, ka korero moemoea mai te Atua ki a Iharaira i te po, a ka mea, E Hakopa, e Hakopa. A ka mea ia, Tenei ahau.
- 3
- A ka mea mai ia, Ko te Atua ahau, ko te Atua o to papa: kaua e wehi ki te haere ki raro ki Ihipa; ka meinga hoki koe e ahau hei iwi nui ki reira:
- 4
- Ka haere tahi ahau i a koe ki raro ki Ihipa; a maku ano koe e whakahoki mai ki runga nei: a ma te ringa o Hohepa e pehi ou kanohi.
- 5
- Na, ka whakatika atu a Hakopa i Peere-hepa, a ka kawea atu a Hakopa to ratou papa e nga tamariki a Iharaira, me a ratou tamariki, me a ratou wahine, i runga i nga kaata i tukua mai e Parao hei tiki mai i a ia.
- 6
- A i kawea ano e ratou a ratou kararehe, me o ratou taonga, i whiwhi ai ratou ki te whenua o Kanaana, a haere ana ki Ihipa a Hakopa, ratou tahi ko ona uri katoa:
- 7
- Ko ana tamariki, ko nga tamariki hoki a ana tamariki: ana tamahine, me nga tamahine a ana tamariki, me ona uri katoa i kawea e ia ki Ihipa.
- 8
- A ko nga ingoa enei o nga tamariki a Iharaira, i haere nei ratou ko Hakopa ko ana tamariki ki Ihipa: Ko Reupena, ko te matamua a Hakopa.
- 9
- A ko nga tamariki a Reupena; ko Hanoka, ko Paru, ko Heterono, ko Karami.
- 10
- A ko nga tamariki a Himeona; ko Iemuere, ko Ohara, ko Iakini, ko Tohara, ratou ko Hauru, ko te tamaiti a tetahi wahine Kanaani.
- 11
- A ko nga tamariki a Riwai; ko Kerehona, ko Kohata, ko Merari.
- 12
- Ko nga tamariki hoki a Hura; ko Ere, ko Onana, ko Heraha, ko Parete, ko Taraha: ko Ere ia raua ko Onana i mate ki te whenua o Kanaana. A ko nga tamariki, a Parete, ko Heterono raua ko Hamuru.
- 13
- A nga tamariki a Ihakara; ko Tora, ko Puwa, ko Hopa, ko Himirono.
- 14
- A, nga tamariki a Hepuruna; ko Herete, ko Erono, ko Iahareere.
- 15
- Ko nga tamariki enei a Rea, i whanau nei i a raua ko Hakopa ki Parana-arama, ratou ko tana tamahine ko Rina: e toru tekau ma toru nga wairua katoa o ana tamariki me ana tamahine.
- 16
- A ko nga tamariki a Kara; Ko Hipiona, ko Haki, ko Huni, ko Etepono, ko Eri, ko Arori, ko Areri.
- 17
- A nga tamariki a Ahera; ko Imina ko Ihua, ko Ihui, ko Peria, ratou ko Hera ko to ratou tuahine: a ko nga tamariki a Peria, ko Hepere raua ko Marakiere.
- 18
- Ko nga tamariki enei a Tiripa, a te wahine i homai nei e Rapana ki a Rea ki tana tamahine, a ko enei a raua ko Hakopa i whanau ai, kotahi tekau ma ono nga wairua.
- 19
- Nga tamariki a Rahera wahine a Hakopa; ko Hohepa raua ko Peniamine.
- 20
- A whanau ake a Hohepa i te whenua o Ihipa, ko Manahe raua ko Eperaima, he whanau enei na raua ko Ahenata tamahine a Poti-whera tohunga o Ono.
- 21
- A nga tamariki a Peniamine; ko Peraha, ko Pekere, ko Ahapere, ko Kera, ko Naamana, ko Ehi, ko Roho, ko Mupimi, ko Hupimi, ko Arare.
- 22
- Ko nga tamariki enei a Rahera, i whanau nei ma Hakopa: nga wairua katoa, kotahi tekau ma wha.
- 23
- A nga tamariki a Rana; ko Huhimi.
- 24
- A nga tamariki a Napatari; ko Iahateere, ko Kuni, ko Ietere, ko Hireme.
- 25
- Ko nga tamariki enei a Piriha a te wahine i homai nei e Rapana ki tana tamahine ki a Rahera, a whanau ake enei i a raua ko Hakopa: e whitu aua wairua katoa.
- 26
- Nga wairua katoa i haere tahi nei i a Hakopa ki Ihipa, i puta mai nei i roto i tona hope, e ono tekau ma ono nga wairua katoa; hāunga nga wahine a nga tamariki a Hakopa.
- 27
- A nga tamariki a Hohepa, i whanau nei mana ki Ihipa, e rua nga wairua: e whitu tekau nga wairua katoa o te whare o Hakopa i haere nei ki Ihipa.
- 28
- Na, ka tonoa mai e ia a Hura ki mua i a ia ki a Hohepa, hei arahi i a ia ki Kohena; a ka tae mai ratou ki te whenua o Kohena.
- 29
- Na, ka whakanohoia e Hohepa tana hariata, a haere ana ki te whakatau i tona papa i a Iharaira ki Kohena, a ka tae atu ki tona aroaro; na, ka hinga ia ki runga ki tona kaki, a he roa tana tangihanga i runga i tona kaki.
- 30
- Na, ka mea mai a Iharaira ki a Hohepa, He pai ki te mate ahau aianei, noku hoki ka kite i tou mata, no te mea e ora ana ano koe.
- 31
- Na, ka mea atu a Hohepa ki ona tuakana, ki te whare ano hoki o tona papa, Ka haere ahau ki runga ki te korero ki a Parao, a ka mea atu ki a ia, Kua tae mai ki a au oku tuakana, me te whare o toku papa, i noho ra i te whenua o Kanaana;
- 32
- A he hepara aua tangata, he hunga whangai kararehe hoki ratou; a kua kawea mai ano hoki e ratou a ratou kahui, me a ratou kau, me a ratou mea katoa.
- 33
- A ka karanga mai a Parao i a koutou, a ka mea, He aha ta koutou mahi?
- 34
- Na, me ki atu e koutou, He hunga whangai kararehe o pononga, o to matou taitamarikitanga ake, a mohoa noa nei, matou, me o matou mātua: kia noho ai koutou ki te whenua o Kohena; no te mea hoki he mea whakarihiariha ki nga Ihipiana nga hepara katoa.
Address: 
Phone: 
Email: