Isaiah Chapter 5 - Paipera Tapu 1868 | Te Paipera Tapu 1868

Isaiah Chapter 5 - Paipera Tapu 1868

1
Na, me waiata e ahau aianei te waiata a taku i aroha ai ki taku i aroha ai, he mea mo tana mara waina. He mara waina ta taku e aroha nei i tetahi pukepuke momona.
2
Na taiepatia ana e ia, kohikohia ana e ia nga kohatu o reira, whakatokia iho e ia ki te waina pai rawa, hangā ana e ia he pourewa ki waenganui, keria ana ano e ia he poka waina ki reira: a tona tāringa atu kia whai karepe, na he karepe maori ona hua.
3
Na, e te hunga e noho ana i Hiruharama, ratou ko nga tangata o Hura, whakaritea ta maua whakawa ko taku mara waina.
4
Ko te aha ake kia meatia e ahau ki taku mara, ko te aha kua mahue i a au te mahi ki reira? he aha ra i taku tāringa atu kia hua nga karepe, i puta ake ai ko nga karepe maori?
5
Na, tena, maku e whakakite atu ki a koutou taku e mea ai ki taku mara waina, Ka tangohia atu e ahau tona taiepa tataramoa, a ka kainga noatia iho; ka wawahia ano hoki tona taiepa, a ka takatakahia.
6
Ka meinga ano e ahau hei ururua, e kore e tapatapahia, e kore e ngakia: engari ka puta ake te tataramoa me te tumatakuru: ka ako atu ano ahau ki nga kapua kia kaua te ua e ua ki reira.
7
Na, te mara waina o Ihowa o nga mano, ko te whare o Iharaira; ko nga tangata ano o Hura tana mea ahuareka i whakatongia e ia; heoi tana tāringa atu ki te whakarite whakawa, na, ko te tukino, ki te tika, na ko te aue.
8
Aue te mate o te hunga e hono ana i tetahi whare ki tetahi whare, e whakapiri mai nei i tetahi mara ki tetahi mara, a kore noa he wahi, he mea kia noho ai koutou, ko koutou anake, i waenganui i te whenua.
9
Ko ta Ihowa o nga mano tenei ki oku taringa, He pono, tini nga whare, mokemoke kau; nui, pai, kahore he tangata hei noho.
10
No te mea kotahi tekau nga eka o te mara waina, maea ake kotahi tonu te pāti: i ki te homa i te purapura, maea ake kotahi te epa.
11
Aue te mate mo te hunga e maranga wawe ana i te ata ki te whai i te wai kaha, na, roa iho ta ratou i te po, mumura tonu ano hoki ratou i te waina.
12
Kei ā ratou hakari ano hoki te hāpa me te hatere, te timipera, te putorino, me te waina; heoi kahore a ratou maharatanga atu ki te mahi a Ihowa, kahore hoki he whakaaro ki te mahi a ona ringa.
13
Mo reira ka riro toku iwi i te pārau, kahore hoki he matauranga; o ratou tangata ingoa nui ano hoki, ka hemo i te kai; to ratou mano tini, maroke rawa te mangai i te mate-wai.
14
Na reira te reinga i whakanui ai i a ia, nui noa atu te hamamatanga o tona mangai; na, heke atu ana ki reira to ratou kororia, o ratou mano tini, to ratou ngangau, me te tangata ano e whakamanamana ana.
15
Ka whakapikoa iho ano hoki te ware, ka whakaititia ano te tangata nui, ka whakahokia iho ano nga kanohi o te hunga whakakake.
16
A ka whakanekehia ake a Ihowa o nga mano i runga i te whakarite whakawa, ka whakatapua ano te Atua tapu i runga i te tika.
17
Ko reira ano nga reme kai ai i ta ratou wahi e ki ake ai, ka kainga ano e nga mea ke nga wahi o te hunga tetere kua ururuatia nei.
18
Aue te mate mo te hunga e kumea mai ana e ratou te he ki nga aho horihori, te hara ano hoki me te mea ki nga taura o te kāta:
19
E mea nei, Kia hihiko ia, kia hohoro tana mahi, kia kite atu ai matou: kia tata mai ano hoki, kia tae mai te whakaaro a te Mea Tapu o Iharaira, kia mohio ai matou.
20
Aue te mate mo te hunga e mea nei ki te kino, He pai, a ki te pai, He kino; e mea nei i te pouritanga hei māramatanga, a i te māramatanga hei pouritanga, e mea nei i te kawa hei reka, a i te reka hei kawa.
21
Aue te mate mo te hunga he nui nei o ratou whakaaro ki ta ratou titiro iho, he hunga mohio ano ratou ki ta ratou whakaaro iho.
22
Aue te mate mo te hunga e kaha ana ki te inu waina, he hunga uaua ano ki te whakaranu i te wai kaha:
23
E whakatikatika nei ki ta te tangata hē, he whakaaro ki te utu; a whakakahoretia iho e ratou te tika o te hunga tika.
24
Mo reira ka rite ki te kainga o te kakau witi e te arero o te ahi, ki te papapa ano hoki kua pau i te mura; ka rite ano to ratou pakiaka ki te pirau, ka rere to ratou puawai ki runga ano he puehu; mo ratou i whakakahore ki te ture a Ihowa o nga mano, i whakahawea ano hoki ki te kupu a te Mea Tapu o Iharaira.
25
Na reira te riri a Ihowa i mura ai ki tona iwi; maro tonu mai tona ringa ki te whawhai ki a ratou; patua iho ratou e ia; ngaueue ana nga maunga; o ratou tinana ano hoki ano he paru i waenganui o nga huarahi. Na, ahakoa ko tenei katoa, e kore tana riri e tahuri atu, maro tonu mai tona ringa.
26
Ka whakaarahia ano hoki e ia he kara ki nga iwi i tawhiti; ka whiowhio ano ki a ratou ki te pito o te whenua. Nana, hohoro tonu, kakama tonu, ta ratou haere mai.
27
E kore tetahi o ratou e ngenge, e kore e tapepa te waewae; e kore tetahi e parangia, e kore e moe, e kore te whitiki o o ratou hope e mawheto, e kore ano te here o o ratou hu e motu.
28
A ratou pere, koi tonu, he mea piko katoa a ratou kopere, nga waewae o o ratou hoiho ka kiia he kiripaka, o ratou wīra he awhiowhio:
29
To ratou hamama, koia ano kei to te raiona, ka hamama ratou, ano he kuao raiona, ka ngengere, ka hopukina atu ta ratou tupapaku, kawhakina tonutia atu, kahore hoki he tangata hei whakaora.
30
Ka ngengere mai ano ratou ki a ratou i taua ra, me te mea ko te moana e haruru ana: a, te tirohanga atu ki te whenua, nana, he pouri, he tuatea, kua pouri ano hoki te māramatanga i ona rangi.