Isaiah Chapter 57 - Paipera Tapu 1868 | Te Paipera Tapu 1868

Isaiah Chapter 57 - Paipera Tapu 1868

1
Ka riro ki te kore te tangata tika, kahore e maharatia iho e te ngakau o tetahi tangata: e tangohia atu ana hoki te hunga tohu tangata, tē mahara tetahi, e tangohia atu ana te tangata tika kei kite i te he e haere mai ana.
2
Ka haere ia i runga i te rangimarie, ka okioki ratou ki runga ki o ratou takotoranga, tetahi, tetahi, haere tonu i runga i tana whakaaro tapatahi.
3
Ko koutou ia, awhitia mai ki konei, e nga tamariki a te wahine makutu, e nga uri o te tangata puremu, o te wahine puremu.
4
He takaro ta koutou ki a wai? ki a wai te hamama nui o o koutou mangai, te whetero roa o te arero? He teka ianei he whanau koutou no te poka ke, he uri no te teka?
5
Ano he ahi to koutou hiahia ki nga whakapakoko i raro i nga rakau kouru nui katoa, i a koutou ka patu tamariki ra i nga awaawa, i raro i nga pari kohatu?
6
Kei nga kohatu maenene o te awa tau wahi; ko ena, ko ena te rota i a koe: ringitia ana e koe he ringihanga ki ena, whakaekea atu ana e koe he whakahere. E marie ranei ahau ki ena mea?
7
I runga i te maunga tiketike, purero rawa ki runga, i hangā e koe to takotoranga, piki ana ano koe ki reira ki te mea patunga tapu.
8
Kua oti ano hoki tou whakamahara te whakatu e koe ki tua o te tatau o nga pou: ehara hoki i a au nana koe i hura, piki ana koe ki runga; whakanuia ana e koe to takotoranga, whakaritea ana e koe he kawenata ki a ratou; i matenuitia ano hoki e koe to ratou takotoranga i te wahi i kite ai koe.
9
I haere atu ano koe ki te kingi, mea rawa ki te hinu, whakanuia ana e koe o hinu whakaranu; ungā ana e koe o karere ki tawhiti, whakaititia ana koe e koe ano ki raro rawa ki te reinga.
10
Mauiui ana koe i te nui o to ara, tē ki koe, Kahore he whakawhirinakitanga mo te whakaaro: kua kitea e koe te oranga o to ringa, koia koe tē pouri ai.
11
I pawera koe, i wehi koe i a wai, i korero teka ai koe, i kore ai koe e mahara ki a au, i kore ai tou ngakau e mea mai? kihai ianei ahau i whakarongo puku i mua ra ano, a kahore ou wehi ki a au?
12
Maku e whakaatu to tika, me o mahi; e kore hoki koe e whai pai i aua mea.
13
Ka tangi koe, ma o huihui koe e whakaora; otiia ka kahakina katoatia ratou e te hau; ka riro ratou i te horihori: te tangata ia e whakawhirinaki ana ki a au, nana te whenua, ka riro hoki i a ia toku maunga tapu;
14
Ka ki ano ia, Opehia ake, opehia ake, whakapaia te ara, hapainga atu te tutukitanga waewae i te ara o toku iwi.
15
Ko te kupu hoki tenei a te Mea tiketike o runga rawa, tona kāinga nei kei nga wa onamata; tona ingoa ko Tapu; Te wahi e noho nei au kei te tiketike, kei te tapu, kei te tangata ano hoki he maru rawa nei tona ngakau, kahore he whakakake, hei whakahauora i te wairua o te hunga whakakake-kore hei whakahauora i te ngakau o nga mea kua maru.
16
E kore hoki ahau e whawhai a ake ake ake, e kore ano e mau tonu taku riri: pena ka pehia rawatia te wairua i toku aroaro, me nga manawa i hangā e ahau.
17
He hē no tona apo taonga i riri ai ahau, i patu ai i a ia; i huna ahau i a au, i riri, a haere kotiti ke ana ia i runga i te ara o tona ngakau.
18
Kua kite ahau i ana ara, ka rongoatia ano ia e ahau: ka arahi ano ahau i a ia, ka whakahoki atu ano hoki i nga whakamarietanga ki a ia, ki ona tangata ano hoki e tangi ana.
19
Ko au te kai hanga o nga hua o nga ngutu; Ka mau, ka mau te rongo ki te hunga i tawhiti, ki te hunga i tata, e ai ta Ihowa; maku ano ia e rongoa.
20
Te hunga kino ia rite tonu ratou ki te moana ina akina e te hau, e kore nei e marino; heoi kei te ā mai ona wai i te puehu, i te paru.
21
Kahore he maunga rongo ki te hunga kino, e ai ta toku Atua.