Isaiah Chapter 58 - Paipera Tapu 1868 | Te Paipera Tapu 1868

Isaiah Chapter 58 - Paipera Tapu 1868

1
Kia rahi te karanga, kaua e kaiponuhia, kia rite ki te tētere te nui o tou reo, whakaaturia atu ki toku iwi to ratou pokanga-ketanga, o ratou hara ki te whare o Hakopa.
2
He rapu ano ia ta ratou i a au i tenei ra, i tenei ra, e ahuareka ana hoki ratou ki te mohiotanga ki oku ara, me te mea he iwi ratou e mahi ana i te tika, a kihai i whakarere i te whakaritenga a tona Atua: e ui mai ana ratou ki a au ki nga whakaritenga o te tika, e ahuareka ana ki te whakatata mai ki te Atua.
3
Ta ratou ki, He aha matou i noho puku ai, a kahore koe e titiro mai? whakapouritia ana e matou o matou wairua, tē mohio mai koe. Nana, i te ra e noho puku ai koutou e kitea ana e koutou te ahuareka, e akiakina ana hoki e koutou a koutou mea whakamauiui katoa.
4
Nana, ta koutou noho puku hei mea totohe, hei mea ngangare, kino iho, moto iho: kei rite ta koutou noho puku ki to tenei ra, kei meinga to koutou reo kia rangona i runga.
5
Ko taku noho puku ianei tenei i whiriwhiri ai ahau? he rangi hei whakapouritanga ma te tangata i tona wairua? he tuohutanga koia no te mahunga o te tangata, ano he kakaho? he wharikitanga i te kakahu taratara, i te pungarehu, ki raro i a ia? E karangatia ranei tenei e koe he noho puku, he rangi e manakohia ana e Ihowa?
6
He teka ianei ko te noho puku tenei i whiriwhiria e ahau? kia whakatangorotia nga here a te kino, kia wetekina nga paihere o te ioka, kia tukua te hunga e tukinotia ana kia haere noa atu, kia wawahia ano hoki nga ioka katoa?
7
He teka ianei ko te tuwha atu i to taro ma te tangata e mate ana i te kai? nga rawa-kore, nga ngakau mamae, kia kawea ratou ki te whare? kia hipokina ano hoki te tangata e tu tahanga ana, ina kitea atu e koe? kia kaua ano koe e huna i a koe kei kitea e ou kikokiko ake?
8
Ko reira to māramatanga puta mai ai, ano ko te puaotanga, ka hohoro ano hoki ou mate te mahu: ka haere to tika ki mua i a koe, ko te kororia ano o Ihowa hei hiku mou.
9
Ko reira koe karanga ai, a ka whakao atu a Ihowa; ka tangi koe, a ka mea ia, Tenei ahau. Ki te whakarerea atu e koe te ioka i waenganui i a koe, te kokirihanga atu o te maihao, me te korero horihori;
10
Ki te mea ano ka whai ngakau koe ki te tangata mate-kai, a ka makona i a koe te wairua e pehia ana e te mamae, ko reira to māramatanga puta ai i roto i te pouritanga, ka rite hoki to pouritanga ki te poutumarotanga:
11
Ka arahina tonutia ano hoki koe e Ihowa, ka makona ano to wairua i a ia i nga wa mate-wai, ka whakamomonatia ano hoki o wheua, a ka rite koe ki te kāri kua oti te whakamakūkū, ki te wai e pupu ake ana, e kore nei ona wai e tinihanga.
12
Ka hangā ano hoki e ou uri nga wahi kua ururuatia noatia ake, ka ara ano i a koe nga turanga o nga whakapaparanga maha, a ka karangatia koe, Ko te kai hanga o te taiepa pakaru, ko te kai whakahou o nga wahi i nga ara hei nohoanga.
13
Ki te mea ka tahuri atu tou waewae i te hapati, i te meatanga i tau i pai ai i taku rangi tapu, a ka karangatia e koe te hapati he ahuareka, he tapu no Ihowa, he mea honore, a ka whakahonoretia ia e koe, ka kore hoki e mahi i au ara ake, e kite i au ake e ahuareka ai, e korero i o korero ake:
14
Katahi koe ka whai oranga ngakau i roto i a Ihowa; ka meinga ano hoki e ahau nga wahi tiketike o te whenua hei hoiho mou, ka whangaia ano koe e ahau ki te wahi tupu a to pāpā, a Hakopa: na te mangai nei hoki o Ihowa te kupu.