Isaiah Chapter 60 - Paipera Tapu 1868 | Te Paipera Tapu 1868

Isaiah Chapter 60 - Paipera Tapu 1868

1
E ara, kia mārama; kua tae mai hoki to māramatanga, kua whiti ano te kororia o Ihowa ki runga ki a koe.
2
No te mea tera e hipokina te whenua e te pouri, nga iwi e te pouri kerekere: ka whiti mai ia a Ihowa ki runga ki a koe, ka kitea hoki ki runga ki a koe tona kororia.
3
A ka haere mai nga tauiwi ki tou māramatanga, nga kingi ki o hihi, ina whiti mai.
4
Kia ara o kanohi i tetahi taha, i tetahi taha, titiro atu hoki; kei te huihui ratou katoa, e haere mai ana ki a koe; ka haere mai o tama i tawhiti, ka whakatupuria ano hoki o tamahine ki to taha.
5
Ka kite koe i reira, ka rere a wai ano hoki, ka wehi ano to ngakau, ka nui; no te mea ka tahuri mai ki a koe nga mea maha o te moana, ka tae mai ano ki a koe nga ope o nga tauiwi.
6
Ka kapi koe i nga kamera, he tini, i nga kamera tere o Miriana, o Epa; ka haere mai era katoa i Hepa: ka maua mai e ratou he koura, he whakakakara; ka kauwhautia ano hoki e ratou nga whakamoemiti ki a Ihowa.
7
Ka huihuia mai nga hipi katoa o Kerara ki a koe, hei kai mahi mau nga hipi toa o Nepaioto: ka manakohia ratou ina eke ki runga ki taku aata, ka whakakororiatia ano hoki e ahau te whare o toku kororia.
8
Ko wai enei e rite nei ki te kapua i a ratou e rere ana, ano he kukupa, ki o ratou matapihi?
9
He pono ka tatari nga motu ki a au, nga kaipuke ano hoki o Tarahihi i te tuatahi, ki te kawe mai i o tama i tawhiti: ko ratou, ko ta ratou hiriwa, ko ta ratou koura, hei mea ki te ingoa o Ihowa, o tou Atua, ki te Mea Tapu o Iharaira, ka oti hoki koe te whakakororia e ia.
10
Ka hangā ano hoki o taiepa e nga tama a te tangata ke, ko o ratou kingi ano hei kai mahi mau: he riri hoki noku i patu ai ahau i a koe, a he manakohanga atu naku i atawhai ai ahau i a koe.
11
Ka tuwhera tonu ano hoki o kuwaha; i te ao, i te po; e kore e tutakina, he mea kia kawea mai ai nga ope o nga Tauiwi ki a koe, kia arahina mai ai ano hoki o ratou kingi.
12
Te iwi hoki, me te kingitanga, e kore e mahi ki a koe, ka ngaro ratou, ina, ka moti rawa aua iwi.
13
Ka tae mai te kororia o Repanona ki a koe, te kauri, te rimu, me te ake, hei whakapaipai mo te wahi i toku kāinga tapu; ka whakakororiatia ano hoki e ahau te wahi o oku waewae.
14
Ka haere mai ano hoki, ka piko iho ki a koe nga tama a ou kai tukino, ka piko iho ano te hunga katoa i whakahawea ki a koe ki nga kapu o ou waewae, a ka karangatia koe, Ko te pa o Ihowa, Ko te Hiona o te Mea Tapu o Iharaira.
15
He mea whakarere nei koe i mua, he mea i kinongia, kahore hoki tetahi kia haere i waenganui i a koe, na ka meinga koe e ahau hei mea nui e mau tonu ana, he koanga ngakau ki tera whakatupuranga, ki tera whakatupuranga.
16
Ka ngotea ano hoki e koe te waiu o nga tauiwi, ka ngotea ano te u o nga kingi: ka mohio ano hoki koe ko ahau ko Ihowa tou Kai whakaora, tou Kai hoko, te Mea nui o Hakopa.
17
Te parahi ka whakaputaina ketia e ahau hei koura, te rino ka whakaputaina ketia hei hiriwa, ka puta ke te rakau hei parahi, ka puta ke nga kohatu hei rino; ou kai tohutohu ano hoki ka meinga e ahau he rongo e mau ana, ou kai akiaki he tika.
18
E kore e rangona i muri te mahi nanakia ki tou whenua, te whakamoti, te wawahi ki o rohe; ka karangatia ano hoki o taiepa Ko te Whakaoranga, o kuwaha Ko te Whakamoemiti.
19
E kore te ra e waiho i muri hei whakamārama mou i te awatea; na, te marama e tiaho nei, e kore tera e whakamārama i a koe; engari ko Ihowa hei whakamārama mou, ake ake ake, ko tou Atua hoki hei whakakororia i a koe.
20
Heoi ano hekenga o tou ra, e kore ano to marama e pewa, no te mea ko Ihowa hei whakamārama mou e mau tonu ana, ka mutu ano hoki nga ra o to tangihanga.
21
Tou iwi ano hoki, he tika to ratou katoa, ka pumau tonu ki a ratou te whenua, he peka whakato naku, he mahi na oku ringa, kia whai kororia ai ahau.
22
To te mea nohinohi putanga ake he mano, to te mea iti he iwi kaha: maku ma Ihowa e whakahohoro i tona wa e rite ai.