- 1
- Kei runga i a au te Wairua o te Ariki o Ihowa; na Ihowa nei hoki ahau i whakawahi hei kauwhau i te rongo pai ki te hunga mahaki, kua ungā mai ahau e ia ki te takai i te hunga ngakau maru, ki te kauwhau ki nga whakarau kia haere noa, ki nga herehere, Kua tuwhera te whare herehere:
- 2
- Kia karangatia te tau manakohanga atu o Ihowa, te ra rapu utu o to tatou Atua; kia whakamarietia te hunga katoa e tangi ana.
- 3
- Kia whakatakotoria he tikanga mo te hunga katoa o Hiona e tangi ana, kia whakaputaia ketia o ratou pungarehu hei ataahua, te tangihanga ano hei hinu koa, te wairua pouri hei kakahu whakamoemiti; a ka karangatia ratou he rakau na te tika, he mea whakato na Ihowa, kia whai kororia ai ia.
- 4
- Ka hangā ano hoki e ratou nga wahi kua ururuatia noatia ake, ka ara i a ratou nga wahi kua kore rawa i mua, ka whakahoutia e ratou nga pa kua ururuatia, nga mea kua kore i era whakatupuranga noa atu.
- 5
- A ka tu nga tangata ke, ka whangai i ā koutou hipi, ko nga tama ano a te tangata ke hei kai parau ma koutou, hei kai tiaki waina ma koutou.
- 6
- Ko koutou ia ka karangatia Ko nga Tohunga o Ihowa, ka korerotia koutou Ko nga Minita a to tatou Atua: ko nga taonga o nga Tauiwi hei kai ma koutou, ko to ratou kororia hei whakamanamananga ma koutou.
- 7
- Mo to koutou whakamātanga e rua nga whakautu ki a koutou; mo te numinuminga kautanga ka koa ratou ki ta ratou wahi: ae ra, i to ratou whenua ano ka haere rua mai nga mea ma ratou, ka mau tonu ano hoki to ratou koa.
- 8
- No te mea hoki e aroha ana ahau a Ihowa ki te whakarite whakawa, e kino ana ahau ki te pahua, ki te whakahaere he; ka hoatu ano e ahau i runga i te pono ta ratou i mahi ai, ka whakaritea ano hoki e ahau he kawenata mau tonu ki a ratou.
- 9
- Ka matauria ano hoki to ratou uri i roto i nga Tauiwi, o ratou whanau ano i roto i nga iwi: te hunga katoa e kite ana i a ratou ka mohio ki a ratou he uri ratou no ta Ihowa i manaaki ai.
- 10
- Ka nui toku koa ki a Ihowa, ka whakamanamana toku wairua ki toku Atua, no te mea kua oti ahau te whakakakahu e ia ki te whakaoranga hei kakahu, ropia mai ana e ia te tika ki a au hei koroka; kei ta te tane marena hou whakapaipai i a ia ki nga mea whakaataahua te rite, kei ta te wahine marena hou whakapaipai i a ia ki ana mea,
- 11
- Ka rite hoki ki ta te whenua e mea nei i tana tupu kia kokiri ake, ki ta te kāri ano hoki e mea nei i nga mea kua whakatokia ki reira kia tupu, ka pena ano ta te Ariki ta Ihowa, ka meinga e ia te tika me te whakamoemiti kia tupu ki te aroaro o nga iwi katoa.
Address: 
Phone: 
Email: