- 1
- He whakaaro ki Hiona i kore ai ahau e noho hu, he whakaaro hoki ki Hiruharama tē ata noho ai ahau, kia puta mai ra ano tona tika ano he kanapatanga, tona whakaoranga ano he rama e ka ana.
- 2
- A ka kite nga Tauiwi i to tika, nga kingi katoa i to kororia; a he ingoa hou e karangatia ki a koe, he mea whakahua, na te mangai o Ihowa.
- 3
- Hei karauna ataahua ano hoki koe i te ringaringa o Ihowa, hei potae kingi i te ringa o tou Atua.
- 4
- E kore koe e kiia a muri ake nei, He mea whakarere; heoi ano kianga o to whenua, he ururua; no te mea ka karangatia koe, Ko Hepeti-pa, to whenua, Ko Peura: no te mea ka ahuareka a Ihowa ki a koe, a ka whai tahu to whenua.
- 5
- No te mea ka rite ki te marenatanga o te taitamariki ki te wahina; ka pena ano te marenatanga o o tamariki ki a koe; kei te koa hoki o te tane marena hou ki te wahine marena hou te rite o te koa o tou Atua ki a koe.
- 6
- Kua oti he kai tiaki te whakarite e ahau ki ou taiepa, e Hiruharama; e kore e whakamutua ta ratou kīkī i tetahi ra, i tetahi po. E nga kai whakahua o to Ihowa ingoa, kei whakarongo puku koutou,
- 7
- Kaua hoki e whakamutua ta koutou ki a ia, kia whakapumautia ra ano a Hiruharama e ia, kia meinga ra ano hei whakamoemititanga i runga i te whenua.
- 8
- Kua oatitia e Ihowa tona ringa matau, tona tākakau kaha, E kore e hoatu e ahau to witi a muri ake nei hei kai ma o hoa riri, e kore ano nga tamariki a te tangata ke e inu i to waina i mauiui ai koe:
- 9
- Engari nga tangata nana i whawhaki, ma ratou ano e kai, whakamoemiti tonu atu ki a Ihowa: nga tangata nana i kohikohi mai, ka inumia ano e ratou ki nga marae o toku tapu.
- 10
- Tika atu, tika atu ma nga kuwaha; whakapaia te ara o te iwi; opehia ake, opehia ake te huanui; kohikohia atu nga kamaka; whakaarahia te kara ki nga iwi.
- 11
- Nana, kua korero a Ihowa ki te pito o te whenua, Mea atu ki te tamahine a Hiona, Nana, tou whakaoranga te haere mai nei! nana, kei a ia tona utu, kei tona aroaro ano tana mahi.
- 12
- A ka karangatia ratou, Ko te iwi tapu, Ko ta Ihowa i hoko ai; ka karangatia ano koe, He mea i rapua, he pa kahore i mahue.
Address: 
Phone: 
Email: