- 1
- Na, i nga ra o Ahata tama a Iotama, tama a Utia, kingi o Hura ka haere mai a Retini kingi o Hiria raua ko Peka tama a Remaria kingi o Iharaira ki Hiruharama tatau ai ki reira; kihai ia a reira i taea e raua i te whawhaitanga.
- 2
- A, te korerotanga mai o te kupu ki te whare o Rawiri, Ko Hiria kei te okioki atu ki Eperaima. Na, kapakapa ana tona ngakau, me te ngakau ano o tona iwi, me te mea ko nga rakau o te ngahere e oioi ana i te hau.
- 3
- Katahi a Ihowa ka mea ki a Ihaia, Tena, haere atu ki te whakatau i a Ahata, korua ko to tama ko Heara-tahupu ki te pito o te awa-keri o to runga puna-wai, ki te huarahi o te mara o te kai horoi kakahu;
- 4
- Ka mea atu ki a ia, Kia mahara, kia ata noho, kaua e wehi, kaua hoki tou ngakau e pawera ki nga pito e rua o enei ngotungotu e paowa nei, ki te riri nui a Retini ratou ko Hiria, ki te tama ano a Remaria.
- 5
- Na, kua whakaaroa nei e Hiria, ratou ko Eperaima, ko te tama a Remaria, he kino mou, kua mea nei ratou,
- 6
- Tatou ka haere ki a Hura whakatupu kino ai i a ia, me wawahi mai ano tetahi wahi ma tatou, me whakakingi ano tetahi kingi i waenganui i a ia, ara, te tama a Tapeara:
- 7
- Ko te kupu tenei a te Ariki, a Ihowa, E kore e tu, e kore ano e taea.
- 8
- Na, te upoko o Hiria ko Ramahiku, a, te upoko o Ramahiku ko Retini; na, i enei tau e ono tekau ma rima ka pakarukaru a Eperaima, kore ake tena iwi.
- 9
- Ko Hamaria ano hoki te upoko o Eperaima, a, te upoko o Hamaria ko te tama a Remaria. Ki te kore koutou e whakapono, e kore ano ta koutou e u.
- 10
- Na ka korero mai ano a Ihowa ki a Ahata, a ka mea,
- 11
- Inoia tetahi tohu mau i a Ihowa, i tou Atua; inoia he mea i te hohonu, i te wahi tiketike ranei i runga.
- 12
- Ano ra ko Ahata, E kore au e inoi, e kore ano e whakamatautau i a Ihowa.
- 13
- Katahi tera ka ki mai, Tena, whakarongo, e te whare o Rawiri, He mea iti ianei ki a koutou kia hoha nga tangata i ta koutou? me mea ano ranei e koutou toku Atua kia hoha?
- 14
- Mo reira ma te Ariki ano e hoatu he tohu ki a koutou, Nana, ka hapu he wahina, ka whanau hoki he tamaiti, a ka huaina e ia tona ingoa ko Emanuera.
- 15
- He pata, he honi, hei kai mana, a mohio noa ia ki te paopao ki te kino, ki te whiriwhiri i te pai.
- 16
- No te mea mohio rawa ake te tamaiti ki te paopao ki te kino, ki te whiriwhiri i te pai, kua mahue te whenua e whakariharihangia nei e koe i ona kingi e rua.
- 17
- Tera e kawea mai e Ihowa ki a koe, ki tou iwi, ki te whare o tou pāpā nga ra kihai nei i tae mai, no te rangi ra ano i mawehe atu ai a Eperaima i roto i a Hura, ara, te kingi o Ahiria.
- 18
- Na, i taua rangi ano ka whiowhio atu a Ihowa ki te ngaro i te wahi whakamutunga mai o nga awa o Ihipa, ki te pi ano hoki i te whenua o Ahiria.
- 19
- A ka rere mai ratou, ka tau katoa ratou ki nga awaawa ka ururuatia nei, ki nga rua o nga kamaka, ki nga tataramoa katoa, ki nga urupuia rakau katoa.
- 20
- I taua rangi ano ka heua e te Ariki ki te heu i utua, ki te hunga i tera taha o te awa, ara, ki te kingi o Ahiria, te mahunga me te huruhuru o nga waewae, ka pau ano hoki te pahau.
- 21
- Na, i taua rangi ano ka atawhaitia e te tangata he kuao kau me nga hipi e rua;
- 22
- A he nui te waiu e tukua mai e ratou, no ka kai pata ia: ka kainga hoki he pata, he honi e te hunga katoa ka mahue ki te whenua.
- 23
- A i taua rangi ano, na, nga wahi katoa i reira nei nga waina kotahi mano, a, te utu kotahi mano nga hiriwa, hei wahi ano tera mo nga tataramoa, mo nga tumatakuru.
- 24
- He pere, he kopere a nga tangata ina haere ki reira; no te mea ka riro katoa te whenua i te tataramoa, i te tumatakuru.
- 25
- Na, nga maunga katoa e ngakia ana ki te karaone, e kore e tae ki reira te wehi o te tataramoa, o te tumatakuru; engari he wahi tera e tukua ai nga kau, e takahi ai nga hipi.