- 1
- I ki mai ano hoki a Ihowa ki a au, Tikina atu tetahi pukapuka nui mau, tuhituhia ki roto te mea mo Mahere-harara-ha-paha ki te pene a te tangata.
- 2
- Katahi ahau ka mea i etahi kai whakaatu pono hei whakaatu mo taku, ara, i a Uria tohunga raua ko Tekaria tama a Teperekia.
- 3
- Na, ko taku haerenga atu ki roto ki te poropiti wahine, kua hapu, whanau ake he tamaiti. Katahi a Ihowa ka ki mai ki a au, Karangatia tona ingoa ko Mahere-harara-ha-paha.
- 4
- No te mea mohio rawa ake te tamaiti ki te karanga, E toku pāpā, e toku whaea, ka riro nga taonga o Ramahiku, me nga mea parakete o Hamaria i te aroaro o te kingi o Ahiria.
- 5
- A i korero mai ano hoki a Ihowa ki a au, i mea,
- 6
- Na, kua paopao nei tenei iwi ki nga wai ata rere o Hiroa, a e koa ana ki a Retini raua ko te tama a Remaria;
- 7
- Na, tenei te takina mai nei e te Ariki nga wai o te awa ki runga ki a ratou, he kaha, he nui, ara, te kingi o Ahiria, me tona kororia katoa: ka ngawha ano ia ki runga i ona parengarenga katoa, ka pari ano hoki ki runga i ona tahatika katoa:
- 8
- Ka huri atu ano ki runga ki a Hura, taupoki iho, koni tonu atu, pa noa atu ki te kaki; a ka roha ona parirau, ka kapi te whanuitanga o tou whenua, e Emanuera.
- 9
- Huihui koutou, e nga iwi, ka pakaru ano hoki koutou, kia whai taringa mai ano hoki koutou, e te hunga katoa o nga whenua i tawhiti; whitikiria koutou, a ka pakaru koutou; whitikiria koutou, a ka pakaru koutou.
- 10
- Whakatakotoria he whakaako, a ka taka noa iho, korerotia te kupu, e kore ano e tu; kei a matou nei hoki te Atua.
- 11
- Ko ta Ihowa korero hoki tenei ki a au, he meatanga mai i runga i te ringa kaha, me tana whakaako ano i a au kia kaua e haere i te ara o tenei iwi; i ki mai,
- 12
- Kaua e ki, He hē te whakatakotoria nei i nga mea katoa e ki atu ai tenei iwi, He hē te whakatakotoria nei; kaua hoki e wehi i ta ratou e wehi ai, kaua ano e pawera.
- 13
- Ko Ihowa o nga mano, ko ia ta koutou e whakatapu ai, ko ia ta koutou e wehi ai, ko ia ta koutou e pawera ai.
- 14
- A ka ai ia hei wahi tapu; hei kohatu tūtukitanga waewae ia, hei kamaka e hinga ai nga whare e rua o Iharaira, hei rore ano hoki, hei mahanga ki nga tangata o Hiruharama.
- 15
- He tokomaha ano hoki o ratou e tūtuki te waewae, e hinga, pakaru iho, mahangatia ake, mau tonu iho.
- 16
- Takaia te whakaaturanga, hīritia te ture i roto i aku akonga.
- 17
- Ka tatari ano ahau ki a Ihowa e huna nei i tona mata ki te whare o Hakopa, ka tumanako atu ano hoki ki a ia.
- 18
- Nana, ko matou ko nga tamariki i homai nei e Ihowa ki a au hei tohu, hei mea whakamiharo i roto i a Iharaira, he mea na Ihowa o nga mano e noho nei i Maunga Hiona.
- 19
- Na, ki te mea mai ratou ki a koutou, Me rapu tikanga koutou i te hunga he atua maori nei o ratou, i nga matakite, i te hunga e kowhetewhete ana, e ngunguru ana: kaua ianei te iwi e rapu tikanga ki to ratou Atua? kei nga mea mate ianei te korero mo nga mea ora?
- 20
- Kei te ture, kei te whakaaturanga: ki te kore e rite ta ratou korero ki tenei kupu, ina, kahore he māramatanga i roto i a ratou.
- 21
- A ka tika ano ratou na reira, ruha noa iho, e mate ana i te kai, a i a ratou ka mate nei i te kai, ka tupu te riri, a ka kanga ratou ki to ratou kingi, ki to ratou Atua, ka titiro ano whakarunga.
- 22
- A to ratou tirohanga atu ki te whenua, na, he whakapawera, he pouri, he mamae whakapouri, ka aia atu ano hoki ratou ki te pouri.
Address: 
Phone: 
Email: